Ihamati Jesus kel Johanes Peridiken, tapi uga kalak si deban? Nina Jesus, “Bagi ise nge ndia kuandingken kalak enda? Kalak enda bali bagi anak-anak si kundul bas pajak si ngelebuh temanna main-main, nina, ‘Enggo iembus kami suling tapi la kena landek, iendeken kami lagu tangis-tangis tapi la kena erceda ate.’”​—Matius 11:​16, 17.

Kai nge maksud Jesus? Ijelaskenna, “Johanes reh, la ia man ntah pe minem, tapi nina kalak, ‘Lit i bas ia malekat jahat.’ Anak manusia reh, man ras minem, tapi nina kalak, ‘Nenlah! Ia kalak rangap ras peminem anggur, temanna pe pengalo cuke ras kalak perdosa.’” (Matius 11:​18, 19) Johanes sekalak Nasir, anggur pe la inemna tapi ikataken kalak lit i bas ia malekat jahat. (Bilangen 6:​2, 3; Lukas 1:​15) Tapi Jesus nggeluh bali bagi jelma si nterem. Man ras minem ia, tapi ikataken kalak ia rangap. Jadi mesera kel erban manusia senang.

Ipeseri Jesus kalak e ras anak-anak si kundul bas pajak si la nggit landek sangana temanna main suling, ntah pe la kalak e erceda ate sanga iendeken lagu tangis-tangis. Nina Jesus, “Amin bage gia, kepentaren teridah arah perbahanen kap.” (Matius 11:​16, 19) Jadi, “perbahanen” Johanes ras Jesus mbuktiken maka tuduhen nandangi kalak enda la tuhu.

Kenca ikataken Jesus kalak e la ermediate, isumpahina piga-piga kota si pernah ibanna i je mukjizat, eme kota Korasin, Betsaida, ras Kapernaum. Ikataken Jesus bicara i bas kota Tirus ras Sidon si lit i Punike min ndai ibanna mukjizat e, nggom min ndai kalak e ertobat. Ikatakenna ka kerna kota Kapernaum si pernah jadi inganna tading. I je pe nterem kalak la ermediate. Nina Jesus kerna kota e, “I bas Wari Penghakimen pagi, beraten ukumen kena asangken ukumen man Sodom.”​—Matius 11:24.

Kenca si e, ipuji Jesus Bapakna si muniken pemeteh si meherga arah “kalak pentar ras erpemeteh” tapi ipebetehkenNa man kalak si biasa-biasa saja si bali bagi anak-anak. (Matius 11:25) Man kalak si bage, nina Jesus, “Marilah, kena kerina si latih janah beraten, gelah kupegegehi kena. Marilah, erdahinlah ras aku, janah erlajarlah i bas aku nari, sebap aku melias dingen lembut janah meteruk ukur, alu bage kena terpegegehi mulihi. Sebap erdahin ras aku labo mberat, janah babanku menahang kap.”​—Matius 11:​28-​30.

Engkai maka bage nina Jesus? Perban nggo latih iakap kalak iban peminpin-peminpin agama. Iban kalak e adat si mesera ndalankenca, contohna peraturen wari Sabat. Tapi ipegegehi Jesus kalak e alu ajarenna i bas Dibata nari si bersih arah adat kalak e. Iberekenna ka gegeh man kalak si latih perban pemerentah, bage pe man kalak si rusur salah akapna bana perban dosa. Jadi ipebetehken Jesus man kalak e maka dosa kalak e banci iampuni janah kalak e banci erdame ras Dibata.

Kerina kalak si nggit erdahin janah erlajar ras Jesus banci mereken dirina man Dibata janah ngelayani Bapak si dem perkuah ate. Ngelakoken si e labo mesera, sebap perentah-perentah Dibata labo mberat.​—1 Johanes 5:3.