Pasti nggo latih akap Jesus ertoto sada berngin janah milih 12 kalak arah muridna jadi rasul-rasul. Gundari nggo ciger, tapi lit denga gegehna janah isampatina denga atena kalak. Si e ilakokenna i deleng i Galilea, mungkin la ndauh arah Kapernaum, inganna tading.

Enterem kalak reh ndahi Jesus arah erbage daerah. Piga-piga reh arah selatan, eme Jerusalem ras piga-piga daerah i Judea. Si debanna reh arah kota Tirus ras Sidon si lit i deher lawit. Engkai maka idarami kalak e Jesus? “Guna megiken Jesus janah ate kalak e gelah ipepalem pinakitna.” Janah eme si terjadi, “kerina kalak ipepalem” Jesus. Cuba bayangkenndu! Kerina kalak si sakit ipepalem. Jesus pe nampati kalak si rate mesui, “kalak si iganggu malekat jahat.”​—Lukas 6:​17-​19.

Idat Jesus me ingan si rata i deleng e janah jelma si nterem pulung i sekelilingna. Murid-muridna, khususna 12 rasulna mungkin kundul i deherna. Kerina kalak e merhat kel megiken guru enda si banci ngelakoken perbahanen si luar biasa. Ipeseh Jesus kotbah si tuhu-tuhu erguna man si megiken ia seh asa gundari. Kita pe banci ndatken manpaat perban mbages kel kebenaren si ipesehna alu jelas ras menukah ngangkaisa. Igunakenna pengalamen si biasa ras contoh-contoh si itandai nterem jelma. Alu bage, menukah akap kalak si ndarami keriahen ukur i bas dalan Dibata guna ngangkaisa. Kai si erbanca kotbah Jesus i deleng seh kel pentingna?

Kerina kalak merhat ermeriah ukur. Meteh si e, mulai iceritaken Jesus kerna uga kin kalak si tuhu-tuhu ermeriah ukur. Pasti tertarik kel kalak megikenca. Tapi lit si la iangkai kalak e.

Nina Jesus, “Ermeriah ukur me kalak si iakapna perlu itandaina Dibata, erkiteken man bana pagi Kerajan surga. Ermeriah ukur me kalak si erceda ate, erkiteken iapuli me ia pagi. . . . Ermeriah ukur me kalak si muas ras melihe nandangi kai si benar, erkiteken ipuasken me ia pagi. . . . Ermeriah ukur me kalak si isiksa perban kai si benar, erkiteken man bana pagi Kerajan surga. Ermeriah ukur me kena adi ihina ras isiksa kalak kena . . . erkiteken aku. . . . Senang janah ermeriah ukurlah.”​—Matius 5:​3-​12.

Uga kin “ermeriah ukur” si imaksud Jesus? Labo maksud Jesus senang ntah pe meriah saja. Keriahen ukur si tuhu-tuhu ndauh bagesen asangken si e. Kalak si ermeriah ukur tuhu-tuhu puas janah igejapkenna geluhna erguna.

Ikataken Jesus maka kalak si tuhu-tuhu ermeriah ukur eme kalak si perlu akapna itandaina Dibata, si erceda ate perban dosa, bage pe kalak si ngelayani Dibata. Aminna pe segat ate kalak ntah pe isiksa kalak ia perban ngelakoken peraten Dibata, meriah ukur kalak e, perban iteh kalak e maka nggo isenangken kalak e Dibata janah ialoken kalak e pagi kegeluhen si rasa lalap.

Enterem kalak erpengakap maka si erban ermeriah ukur eme melala sen ntah pe banci lalap ersenang-senang. Tapi menurut Jesus labo bage janah penjelasenna e erban si megi-megi rukur. Nina Jesus, “Cilaka me kena si bayak, sebap nggo ialoken kena kerina pengapul. Cilaka me kena si besur gundari, sebap melihe nge kena pagi. Cilaka me kena si tawa gundari, sebap erceda ate ras tangis nge kena pagi. Cilaka me kena adi kerina kalak ngataken si mehuli kerna kena, sebap bage ka nge nai si ilakoken nini bulang kalak e man nabi-nabi palsu.”​—Lukas 6:24-​26.

Engkai maka kalak si bayak, kalak si tawa, ras kalak si ipuji-puji kalak ikataken cilaka? Sebap adi nggo idat sekalak jelma janah keleng atena si e, banci saja lupa ia ngelayani Dibata, si erban tuhu-tuhu ermeriah ukur. Labo maksud Jesus kalak mesera ntah pe si melihe pasti ermeriah ukur. Tapi, biasana kalak si bage nggit megiken ajaren Jesus janah ialokenna pasu-pasu keriahen ukur.

Nina Jesus man murid-muridna, “Kena me sira doni.” (Matius 5:​13) Pastilah kalak e labo tuhu-tuhu sira. Sira banci erban pangan tahan ndekah. I deher batar-batar persembahen i rumah pertoton melala i je sira janah sira e ipake guna persembahen. Selain si e, sira pe ngertiken kai si la lit cedana ntah pe si la banci macik. (Imamat 2:​13; Esekiel 43:​23, 24) Murid-murid Jesus eme “sira doni” perban isampati kalak e jelma si nterem gelah tetap mehuli hubungen kalak e ras Jahwe, janah perbahanen kalak e pe tetap bersih ras mehuli. Berita si ipeseh kalak e erban kegeluhen kalak si megikenca tetap mehuli.

Nina Jesus ka man murid-muridna, “Kena me terang doni.” Labo itama kalak lampu i teruh tumba tapi itamana i bas inganna, gelah banci nerangi. Emaka nina Jesus, “Ersinarlah ban terang kena i lebe-lebe jelma si nterem, gelah banci idahna perbahanen kena si mehuli janah imuliakenna Bapak kena si i surga.”​—⁠Matius 5:​14-​16.

Menurut peminpin agama Jahudi, Jesus nggo ngelanggar Undang-Undang Dibata janah mbaru-mbaru enda ibunuh kalak e atena Jesus. Emaka nina Jesus alu terus terang, “Ula iakap kena aku reh guna nasapken Undang-Undang Musa ntah pe Ajaren Nabi-Nabi. Aku reh labo guna nasapkenca, tapi guna erbanca terjadi.”​—Matius 5:​17.

Jelas me, iergai Jesus kel Undang-Undang Dibata janah kalak si deban pe iarapkenna bage. Nina, “Ise pe si ngelanggar salah sada perentah si kitikna, janah iajarina kalak si deban ngelakoken si bage, la ia cocok masuk ku Kerajan surga.” Iteruskenna ka, “Tapi ise pe si ndalankenca ras ngajarkenca, cocok ia masuk ku Kerajan surga.”​—Matius 5:​19.

Aminna pe lenga ilakoken kalak perbahanen si ngelanggar Undang-Undang Dibata, tapi nggo lit i bas pusuhna mis ipersingeti Jesus. Ikataken Jesus bagi si lit itulis bas Undang-Undang Musa, “Ula munuh,” nina ka, “Ise pe si terus merawa man seninana ibaba pagi ku pengadilen.” (Matius 5:​21, 22) Terus merawa man kalak si deban e masalah serius, dungna banci munuh. Emaka kita arus erdame. Nina Jesus, “Emaka adi ibabandu persembahenndu ku batar-batar persembahen, janah i je ingetndu lit si la senang man bandu, tadingkenlah persembahenndu e i lebe batar-batar persembahen. Kenca si e, laweslah kam. Erdame kam lebe ras ia, jenari mulihken kam janah bereken persembahenndu e.”​—Matius 5:​23, 24.

Perentah si deban bas Undang-Undang Musa eme ula erlua-lua. Nina Jesus, “Enggo pernah ibegi kena ikataken, ‘Ula erlua-lua.’ Tapi kukataken man kena, ise pe si terus ngenen sekalak diberu seh ngasa turah napsuna man diberu e, ia nggo erlua-lua ras diberu e i bas pusuhna.” (Matius 5:​27, 28) Maksud Jesus labo pikiren kotor si mon-mon reh bas ukurta, tapi maksudna eme la banci “terus ngenen” perban banci erban turah napsu si salah. Janah adi lit kesempaten dungna erlua-lua. Uga carana gelah si e la terjadi? Perlu iban usaha si mbelin. Nina Jesus, “Emaka, gundari, adi matandu si kanan erbanca kam erdosa, cungkil janah ambekkenlah e. . . . Adi tanndu si kanan erban kam erdosa, potonglah e janah ambekken.”​—Matius 5:​29, 30.

Guna nelamatken kegeluhen, piga-piga kalak nggit ngambekken anggota dagingna si sakit. Jadi maksud Jesus, nggit kita ngambekken kai pe termasuk si seri ergana ras mata ntah pe tan, gelah ula kotor pikirenta janah ngelakoken si la mehuli. Ijelasken Jesus, “Padin sada anggota dagingndu bene asangken kerina dagingndu masuk ku Gehena.” Gehena eme ingan nutung sampah i darat tembok Jerusalem, si ngertiken kematen si rasa lalap.

Ibereken Jesus ka nasehat i bas ngadapi kalak si erban kita kitik ukur. Nina, “Ula lawan kalak jahat, sebalikna adi iparap kalak ayondu si sebelah kanan, bere ka ayondu si sebelah kiri.” (Matius 5:​39) Labo maksudna la banci silindungi dirita ntah pe keluargata adi iserang kalak. Si ikataken Jesus eme iparap, enda labo banci erban kalak luka parah ntah pe mate. Maksud Jesus eme adi lit si nokohi kita ntah pe ndarami perubaten ras kita, mungkin iparapna kita ntah pe ihinana, ula kita nggit mbalassa.

Nasehat e sue ras Undang-Undang Dibata i bas ngkelengi kalak si deban. Emaka ibereken Jesus nasehat, “Teruslah kelengi musuh-musuh kena janah totokenlah kalak si niksa kena.” Ikataken Jesus alasenna nina, “Alu bage terbukti me maka kena anak-anak Bapak kena si i surga, erkiteken nggo ibanNa pultak matawariNa man kalak si jahat bage pe man kalak si mehuli.”​—Matius 5:​44, 45.

Idungi Jesus rananna alu ngataken, “Emaka arus kena sempurna, bali bagi Bapak kena si i surga pe sempurna.” (Matius 5:​48) Maksud Jesus labo kita banci tuhu-tuhu sempurna. Tapi alu ngusih Dibata, banci reh kelengna ateta kalak si deban termasuk musuhta. Nina Jesus ka, “Teruslah rate mekuah, bagi Bapak kena pe rate mekuah.”​—Lukas 6:​36.

Iterusken Jesus kotbahna, nina, “Hati-hatilah, ula sempat ilakoken kena kai si benar i lebe-lebe kalak gelah iperdiatekenna.” Isalahken Jesus kalak si munapik, nina, “Adi mere kam man kalak mesera, ula lebe iembusndu trompet, bali bagi si ilakoken kalak si munapik.” (Matius 6:​1, 2) Emaka adi mere kita, ula min lit si metehsa.

Jenari nina Jesus, “Adi ertoto kena, ula bagi kalak si munapik, si meriah iakapna ertoto janahna cinder i bas ingan-ingan pulung kalak Jahudi bage pe i persimpangen dalan si mbelin gelah idah kalak. . . . Tapi adi ertoto kam, laweslah ku bas kamarndu janah tutup pintuna, kenca si e ertotolah man Bapakndu si la teridah.” (Matius 6:​5, 6) Labo ilarang Jesus kita ertoto i lebe-lebe jelma si nterem sebap ia pe pernah bage ertoto. Si ilarang Jesus eme toto si ibelasken guna ipujiken kalak.

Nina Jesus ka, “Sanga ertoto, ula terus ulih-ulihi kata-kata si seri bali bagi si ilakoken kalak i bas bangsa-bangsa si deban nari.” (Matius 6:7) Tapi maksud Jesus labo salah adi lit si perlu sitotoken alu mulih-ulih. Si salah eme toto si ihapal ras “terus ulih-ulihi.” Jenari ibereken Jesus contoh toto si isina pitu pemindon. Telu pemindon si pertama lit hubungenna ras peraten Dibata bage pe hakNa guna merentah, eme kap gelah gelarNa ipebadia, reh min KerajanNa, janah seh min peratenNa. Kenca si e banci sipindo keperlunta tiap wari, gelah kita iampuni, bage pe mindo gelah ula kita nyerah i bas percuban janah iselamatken i bas si jahat nari.

 Uga arusna perukurenta kerna erta? Nina Jesus, “Ula nai ipepulungndu erta i doni, perban serangga ras karat banci ncedaisa janah pinangko banci nangkosa.” Masuk akal kel nasehat e! Erta banci ceda ras keri, janah la banci erban kita reh rembakna ras Dibata. Emaka nina Jesus, “Pepulunglah ertandu i surga.” Enda banci silakoken adi sipelebe kepentingen Dibata i bas geluhta. Ise pe la banci mbuat hubungenta si rembak ras Dibata ntah pe upahta eme kegeluhen si rasa lalap. Jadi tuhu kel kata-kata Jesus enda, “I ja ertandu, i je ka me ukurndu.”​—Matius 6:​19-​21.

Gelah reh jelasna, ikataken Jesus sada perumpaman, “Mata kap lampu man daging. Adi terang pengidahndu, kerina dagingndu pe terang. Tapi adi matandu percian, kerina dagingndu jadi gelap.” (Matius 6:​22, 23) Adi mejile pengidah matata e bali bagi lampu si nerangi kita. Emaka arus tutus ateta ngelayani Dibata. Adi erta saja lalap siukuri, la banci siidah kai si pentingna bas geluhta. Akibatna, ‘kerina dagingta jadi gelap,’ janah dungna silakoken me si la mehuli.

Kenca si e, nina Jesus, “Ise pe la banci jadi budak man dua tuan. Erkiteken pasti nembeh atena si sekalak janah ikelengina si deban, ntah pe setia ia man si sekalak tapi la diatena si deban. La kena banci jadi budak man Dibata bage pe man Kebayaken.”​—Matius 6:​24.

Piga-piga kalak si megiken Jesus kuatir kerna keperlunna. Emaka ipetetapna ukur kalak e alu ngataken maka adi ipelebena ngelayani Dibata  la perlu kalak e kuatir kerna keperlunna. “Perdiateken min perik-perik i langit. La ia nuan benih ntah pe rani ntah pe nimpan i bas lumbung, tapi ibere Bapak kena si i surga nge ia man.”​—Matius 6:​26.

Uga kerna bunga si turah i deleng e? Nina Jesus, “Salomo si seh kel muliana pe, pakenna la bagi salah sada bunga e jilena.” Kai pelajarenna? “Adi ibereken Dibata paken si bage man bunga-bunga si turah bage saja, si wari enda lit janah pagi itutung, terlebih ka kena!” (Matius 6:​29, 30) Inasehati Jesus, “Ula pernah kuatir janah ngataken, ‘Kai si ipan kami?’ ntah, ‘Kai si inem kami?’ ntah pe, ‘Kai si ipake kami?’ . . . Iteh Bapak kena si i surga maka iperluken kena kerina e. Teruslah pelebe Kerajan ras kai si benar menurut Dibata, emaka kerina si debanna ibereken kari man kena.”​—Matius 6:​31-​33.

Rasul-rasul bage pe kalak si benar merhat nggeluh sue ras si ngena ate Dibata, tapi la menukah ngelakokenca perban keadan kalak e. Enterem kalak Parisi si nggit nokohi ras nghakimi. Emaka iingetken Jesus si megi ia, nina, “Ula nai kena nghakimi gelah kena pe la ihakimi, erkiteken kena kari ihakimi menurut cara kena nghakimi.”​—Matius 7:1, 2.

Bahaya kel adi ngikutken kata-kata kalak Parisi, emaka iceritaken Jesus sada perumpaman, “Me labo banci kalak pentang negu-negu kalak pentang? Me duana kari ia ndabuh ku lubang?” Emaka kalak si megiken Jesus e la banci rusursa mandangi ntah pe ngakimi kalak. Sebap e kesalahen si serius. Nungkun Jesus, “Uga banci ikatakenndu man seninandu, ‘O senina, pediat aku mpedarat rintep i bas matandu,’ padahal balok i bas matandu sendiri pe la idahndu? O kalak si munapik! Pedarat lebe balok i bas matandu nari, kenca si e banci jelas pengidahndu guna mpedarat rintep i bas mata seninandu.”​—Lukas 6:​39-​42.

Enda labo maksudna murid-murid Jesus la banci mandangi kai pe. Isuruh Jesus kalak e, nina, “Ula bereken kai si badia man biang janah ula benterken mutiara man babi.” (Matius 7:6) Kata Dibata seh kel ergana bali bagi mutiara. Adi lit kalak si pengelakona bagi binatang, eme si la ngergai kebenaren si meherga, padin itadingken murid-murid kalak si bage janah ndarami kalak si nggit megiken.

Kenca si e, iajarken Jesus kerna pentingna terus ertoto. “Teruslah pindo, maka pasti ibereken man kena.” Dibata siap njawap totota. Si e iperjelas Jesus alu penungkunen, “Ise i bas kena nari si mere batu man anakna adi roti nge si ipindona? . . . Adi kena saja si erdosa iteh kena carana mere si mehuli man anak-anak kena, terlebih ka Bapak kena si i surga! Pasti iberekenNa si mehuli man kalak si mindo baNa.”​—Matius 7:​7-​11.

Jenari ikataken Jesus kerna aturen i bas perbahanen, “Kai pe si ate kena ilakoken kalak man kena, lakoken ka si bage bana.” Pasti nggit kita ngelakoken nasehat e sanga erurusen ras kalak si deban tapi e la menukah. Nina Jesus, “Masuklah arah gerbang si sempit, erkiteken gerbang ras dalan si mbelang e nuju ku kematen, janah nterem kalak masuk arah e. Tapi gerbang si sempit ras dalan si mesera e nuju ku kegeluhen, janah piga-piga kalak ngenca si banci ndatkenca.”​—Matius 7:​12-​14.

Lit kalak si atena erban murid-murid ndauh arah dalan kegeluhen, emaka ipersingeti Jesus, “Hati-hatilah nandangi nabi-nabi palsu si reh man kena, si arah darat nari teridah bagi biri-biri, tapi situhuna kalak e srigala si merangap.” (Matius 7:​15) Batang si mejile banci itandai arah buahna. Bali bagi manusia. Nabi palsu pe banci itandai arah ajaren ras perbahanenna. Guna jadi murid-murid Jesus la bias terjeng ngerana saja, tapi arus ibuktiken arah perbahanen. Piga-piga kalak ngaku maka Jesus e Tuanna, tapi uga adi la ilakokenna peraten Dibata? Nina Jesus, “Kukataken pagi man kalak e, ‘La pernah kena kutandai! Laweslah i bas aku nari, o kalak jahat!’”​—Matius 7:​23.

Idungi Jesus kotbahna alu ngataken, “Ise si megi kata-kataku enda ras ndalankenca, ia bali bagi kalak pentar si majekken rumahna i datas batu. Rumah e labo runtuh aminna gia reh udan si meder ras banjir, bage pe ientam angin si meter, sebap rumah e ipajekken i datas batu.” (Matius 7:​24, 25) Engkai maka paguh rumah e? Erkiteken, “mbages ikurakna taneh seh asa jumpa batu, i je ibanna pondasina.” (Lukas 6:​48) La bias adi sibegiken saja ngenca Jesus. Tapi arus ‘sidalanken’ kai si ikatakenna e.

Uga kerna kalak “si megi kata-kata” Jesus tapi “la idalankenna”? Kalak e “bali ras kalak motu si majekken rumahna i datas kersik.” (Matius 7:​26) Udan, banjir, bage pe angin erban rumah e rontas.

Luar biasa kel kap kalak e ngidah cara Jesus ngajar. Ia ngerana bagi kalak si lit kuasana janah la seri ras peminpin-peminpin agama. Banci saja, nterem kalak si megiken ia dungna jadi murid-muridna.