Jesus ras empat muridna lawes erberita ku “ingan-ingan pulung kalak Jahudi i kerina daerah Galilea,” mbelang kel beritana kerna dahin Jesus si luar biasa enda. (Markus 1:​39) Berita kerna kai si ilakoken Jesus e ibegi sekalak dilaki si sakit kusta. Lukas si sekalak dokter ngataken kerna dilaki e, “kerina dagingna kena kusta.” (Lukas 5:​12) Adi sakit kusta enda nggo mekelek, alu manjar-anjar anggota dagingna banci keri.

Emaka seh kel sedihna keadan kalak si sakit kusta. Selain si e, arus ka ia tading bas ingan si ndauh arah nterem jelma. Janah adi lit kalak si ndeher ras ia, arus ikatakenna alu megang, “Najis, najis!” gelah ula kalak e ndeher janah langket penakit e man bana. (Imamat 13:45, 46, NW) Tapi kai si ilakoken kalak si sakit kusta e? Idahina Jesus janah erjimpuh ia i lebe-lebena, nina, “O Tuan, adi nggit kam, banci ipepalemndu aku.”​—Matius 8:2.

Mbelin kel kiniteken dilaki e man Jesus! Perban seh kel sedihna iakap dilaki e maka pang ia reh ku jelma si nterem! Uga tanggapen Jesus? Kai nge si ilakokenndu adi je kam? Perban mekuah ate Jesus, idudurkenna tanna janah ijemakna dilaki e. Nina Jesus, “Nggit nge aku! Malemlah kam.” (Matius 8:3) Piga-piga kalak mesera tek ngidah pinakit kusta e lanai lit bas dilaki ndai.

Uga perasanndu adi rajandu perkuah ate janah ngasup nampati kalak bagi Jesus? Cara Jesus mpepalem dilaki si sakit kusta e jadi jaminen man banta, maka adi Jesus jadi Raja nandangi doni, terjadi me kai si nggo itulis i bas Pustaka si Badia, “Ikelengina kalak si la ergegeh dingen musil, ikelinina geluh kalak si nggeluh i bas kekurangen.” (Masmur 72:13) Payo, isampati Jesus pagi kerina kalak si ngenanami kiniseran.

Ope lenga pe ipepalem Jesus kalak si sakit kusta e, pelayanen Jesus nggo icakapken nterem jelma. Janah, ibegi kalak e ka me kerna kai si nggo ilakoken Jesus. Tapi ate Jesus ula min kalak tek man bana erkiteken kai si iceritaken kalak kerna ia. Itehna kerna nubuat si nggo ikataken maka “i bas pasar pe la terbegi sorana ngerana,” maksudna Jesus la sombong. (Jesaya 42:​1, 2) Emaka nina man kalak si sakit kusta e, “Ula kataken man ise pe, tapi laweslah, cidahken dirindu man imam.”​—Matius 8:4.

Banci ibayangkenndu, pasti seh kel riahna ukurna perban nggo malem ia, janah labo tertahansa la ngerana man kalak kerna kai si nggo terjadi. Lawes ia janah iceritakenna kai si nggo terjadi ku japa pe ia lawes. Si enda erban kalak merhat kel jumpa ras Jesus. Erkiteken si e, lanai banci terang-terangen Jesus reh ku kota, emaka lawes ia ku ingan si melungen si la lit jelma i je. Tapi, lalap rehen kalak arah erbage-bage daerah guna iajar ras ipepalem Jesus.