I bas ingan pulung kalak Jahudi i Kapernaum, iajarken Jesus maka dirina kap roti arah surga. Kai si ijelaskenna e lit denga hubungenna ras rananna man kalak si iberena man alu mukjizat roti ras ikan i tepi Lawit Galilea sebelah timur.

Nina Jesus ka, “Nini bulang kena, ipanna manna i taneh mesawang, tapi mate ka nge ia. . . . Aku kap roti si mereken kegeluhen si nusur arah surga nari. Ise pe si man roti enda, nggeluh pagi si rasa lalap. Roti si nandangi kubereken man kena eme dagingku, gelah ialoken doni enda kegeluhen.”​—Johanes 6:​48-​51.

Sanga tahun 30 M, ikataken Jesus man Nikodemus maka keleng kel ate Dibata man doni enda, emaka ibereNa AnakNa jadi Juru Selamat. Gundari, ikataken Jesus maka arus ipan kalak e dagingna alu erkiniteken man pengorbanen si nandangi ilakokenna. Bage me carana ndatken kegeluhen si rasa lalap.

Tapi, segat ate kalak enda megi ranan Jesus e, nina, “Uga nge ibanna maka banci dagingna e iberekenna guna sipan?” (Johanes 6:​52) Ate Jesus min gelah kalak si megiken ia e ngangkai maka labo tuhu-tuhu ipan kalak e dagingna. Kai dage ertina? Ijelasken Jesus ka.

Nina, “Adi la kin ipan kena daging Anak manusia janah la inem kena darehna, labo lit bas kena kegeluhen. Ise pe si man dagingku ras minem darehku, ialokenna pagi kegeluhen si rasa lalap. . . . Dagingku eme pangan situhu-tuhu, janah darehku eme inemen situhu-tuhu. Ise pe si man dagingku ras minem darehku, tetap ia ersada ras aku janah aku ersada ras ia.”​—Johanes 6:​53-​56.

Cuba bayangken uga senggetna kalak Jahudi e! Banci saja iakap kalak e maka tuhu-tuhu isuruh Jesus kalak e minem darehna ras man dagingna, e perbahanen si ngelanggar Undang-Undang Dibata. (Kejadin 9:4; Imamat 17:​10, 11) Tapi labo bage si imaksud Jesus. Si imaksudna eme kerina kalak si atena nggeluh si rasa lalap arus erkiniteken man korban si nandangi iberekenna, eme dagingna si sempurna ras darehna. Tapi nterem i bas pengikutna pe si la ngangkai kerna si e. Lit si ngataken, “Sengget kel kita megi rananna e. Ise ka kin si nggit megikenca?”​—Johanes 6:​60.

Iteh Jesus maka piga-piga pengikutna erbuni-buni ncakapken si e, emaka isungkunna, “Kitik nge ukur kena perban si e? Uga ka adi idah kena Anak manusia nangkih ku ingan asalna? . . . Kai si kukataken man kena e rehna i bas kesah si badia nari janah mereken kegeluhen. Tapi lit piga-piga i bas kena nari si la tek.” Kenca bage nina Jesus, nterem kalak si lawes janah lanai jadi pengikutna.​—⁠Johanes 6:​61-​64.

Emaka isungkun Jesus 12 rasulna, “Kena pe itadingken kena ka ate kena aku?” Ijawap Petrus, “O Tuan, man ise nari kami arus lawes? Kata-katandu kap si mereken kegeluhen si rasa lalap. Kami nggo tek janah nggo iteh kami maka kam kap Si Badia i bas Dibata nari.” (Johanes 6:​67-​69) Aminna pe paksa si e la iangkai kalak e kel kai maksud Jesus, tapi ranan Petrus enda ncidahken maka Petrus ras rasul si deban e setia.

Meriah kel ukur Jesus megi jawapen Petrus. Tapi nina, “Enggo kupilih kena 12 kalak, tapi sekalak i bas kena nari tukang pitnah kap.” (Johanes 6:​70) Si imaksud Jesus eme Judas Iskariot. Banci saja nggom iteh Jesus perbahanen salah si nggo mulai ilakoken Judas.

Tapi, pasti meriah kel ukur Jesus perban terus ikutken Petrus ras rasul-rasul si deban ia janah meritaken berita si meriah gelah kalak iselamatken.