Kenca ipepalem Jesus kalak si lumpuh e, tetap ia tading i daerah Kapernaum i deher Lawit Galilea. Reh ka nterem jelma ndahi ia janah mulai iajarina kalak e. Sanga ia erdalan, idahna Matius, si igelari ka Lewi, paksana kundul i kantor pajak. Iundang Jesus ia, nina, “Jadilah pengikutku.”​—Matius 9:9.

Banci saja, bali bagi Petrus, Andreas, Jakup, ras Johanes, nggo iteh Matius kerna ajaren Jesus bage pe dahin si luar biasa si nggo ibanna i daerah e. Bali bagi empatna kalak e, minter ia ngikutken Jesus. Ijelasken Matius kerna si e i bas Injilna, nina, “Tedis ia [Matius] jenari ikutkenna Jesus.” (Matius 9:9) Emaka, itadingken Matius dahinna selaku pengalo cuke jenari ikutkenna Jesus jadi murid-muridna.

Perban riahna iakap Matius ilebuh Jesus jadi muridna, ibanna pesta si mbelin i rumahna. Ise saja si iundang selain Jesus ras murid-muridna? Si reh eme kalak si itandai selaku “kalak perdosa.” Janah piga-piga teman Matius erdahin sange, eme pengalo cuke. Ipepulung kalak e cuke guna pemerentah Roma si segat ate kalak. Cuke si ipepulung e eme arah kapal si reh ku pelabuhen, arah kalak si lewat bas dalan-dalan si utama, bage pe arah barang-barang si masuk arah luar negri nari. Uga pendapat kalak Jahudi nandangi pengalo cuke? Segat ate kalak e, perban rusur kalak e mindo cuke si galangen asangken situhuna.​—Lukas 7:​37-​39.

Paksa idah kalak Parisi man Jesus ras kalak si bage, isungkun kalak e murid-murid Jesus, “Engkai maka guru kena man ras pengalo cuke bage pe ras kalak perdosa?” (Matius 9:​11) Megi si e, ijawap Jesus, “Kalak si sehat labo perlu dokter, tapi kalak si sakit nge. Laweslah, jenari pelajari kai ertina enda: ‘Si kuarapken perkuah ate, labo korban.’ Aku reh labo ndilo kalak si benar, tapi kalak perdosa.” (Matius 9:12, 13; Hosea 6:6) Aminna pe kalak Jahudi ngelebuh Jesus “guru,” labo kalak e tek maka ia guru, emaka la kalak e nggit erlajar arah Jesus, si arusna banci ipelajari kalak e kerna si benar arah Jesus.

Mungkin iundang Matius pengalo cuke bage pe kalak perdosa ku rumahna, gelah banci kalak e megiken Jesus janah mpesikap hubungenna ras Dibata. “Sebap nterem i bas kalak e nari nggo jadi pengikutna.” (Markus 2:​15) Merhat Jesus nampati kalak e gelah rembak ras Dibata. Mekuah atena nandangi kalak e. Bali bagi dokter si nampati kalak sakit gelah sehat, bage ka me Jesus, isampatina kerina kalak si nggo ceda hubungenna ras Dibata.

Mekuah ate Jesus nandangi pengalo cuke ras kalak perdosa, tapi labo ia setuju nandangi perbahanen kalak e. Mekuah atena e bali bagi mekuah ate sanga ngenen kalak sakit. Contohna, perban mekuah atena kalak si sakit kusta, nina, “Nggit nge aku! Malemlah kam.” (Matius 8:3) Bagi Jesus, mekuah nge atendu janah nggit nge kam nampati kalak si merluken penampat, terlebih i bas nampati kalak gelah hubungenna ras Dibata mehuli?