Kenca dung Jesus ngajar kerna pengampunen i rumah Simon si kalak Parisi, erberita ka me ia ku Galilea. Enda tahun si peduaken i bas pelayanenna, janah labo ia sisada. Rasulna si 12 e ikut ras ia, bage ka pe diberu si nggo “ibebasken arah malekat-malekat jahat nari ras si ipepalem arah pinakit.” (Lukas 8:2) Diberu-diberu e eme Maria Magdalena, Susanna, bage pe Johana si dilakina erdahin ras Raja Herodes Antipas.

Reh teremna kalak si megi kerna Jesus, tapi lit si la senang. Enda jelas teridah sanga ibaba ku Jesus sekalak dilaki guna ipepalem. Ia irasuki malekat jahat, pentang, janah la banci ngerana. Gundari dilaki e nggo malem janah nggo banci ia erpengidah ras ngerana. Jengang jelma si nterem janah ning kalak e, “Banci jadi ia nge Anak Daud e!”​—Matius 12:23.

Enterem kel jelma pulung i sekeliling rumah ingan Jesus tading, emaka Jesus ras murid-muridna la sempat man. Tapi labo kerina kalak erpengakap Jesus e “Anak Daud” si ijanjiken. Piga-piga ahli Undang-Undang Musa ras kalak Parisi reh dauh-dauh nari arah Jerusalem, tapi labo guna erlajar ntah pe jadi pengikut Jesus. Ning kalak e man jelma si nterem, “Lit bas ia Balsebul”, ntah Setan, janah ia isampati “penguasa malekat jahat.” (Markus 3:22) Sanga ibegi keluarga Jesus kai si terjadi, reh kalak e ngelegi Jesus. Engkai?

Paksa si e, agi-agi Jesus la tek maka Jesus Anak Dibata. (Johanes 7:5) Jesus si itandai kalak e sanga radu ras ia i Nasaret la mungkin erban jelma si nterem guntar. Emaka iakap kalak e Jesus “nggo adon.”​—Markus 3:21.

Tapi la lit buktina. Edenga ipepalem Jesus kalak si irasuki malekat jahat, si gundari nggo banci erpengidah ras ngerana. Ise pe la banci mersokenca. Emaka ipitnah ahli Undang-Undang Musa ras kalak Parisi me Jesus. Ning kalak e, “Labo banci ipelawesna malekat jahat adi la kin isampati Balsebul, penguasa malekat jahat.”​—Matius 12:24.

Iteh Jesus perukuren kalak e, emaka nina Jesus, “Kerina kerajan si lit perpecahen i je, ugapa pe sontar nge, janah kota ntah rumah tangga si lit perpecahen i je, labo banci ertahan. Bage pe adi Setan mpelawes Setan, terpecah-pecah kap ia. Adi bage uga kerajanna banci ipertahanken?”​—Matius 12:​25, 26.

Masuk akal kel kata-kata Jesus e! Iteh kalak Parisi maka piga-piga kalak Jahudi nggit mpelawes malekat jahat. (Perbahanen Rasul-Rasul 19:13) Emaka nungkun Jesus, “Adi alu penampat Balsebul kin aku mpelawes malekat jahat, alu penampat ise pengikut kena mpelawessa?” Situhuna pengikut kalak e sendiri nge si ipandangina. Emaka nina Jesus, “Tapi adi alu penampat kesah Dibata aku mpelawes malekat jahat, e tandana Kerajan Dibata nggo tuhu-tuhu reh alu la isadari kena.”​—Matius 12:​27, 28.

Paksa ipelawes Jesus malekat jahat, e mbuktiken maka kuasa Jesus belinen asangken Setan, nina Jesus, “Ise pe labo banci masuk ku rumah kalak si megegeh guna ngerampasi erta-ertana, pala iketna lebe kalak si megegeh e. Emaka banci irampokna isi rumahna e. Ise si la mihak aku ngelawan aku kap, janah ise si la mpepulung ras aku, erban merap kap.” (Matius 12:​29, 30) Tuhu-tuhu kel Jesus ilawan ahli Undang-Undang Musa ras kalak Parisi, e mbuktiken maka kalak e pengikut Setan. Ipedauh kalak e jelma si nterem arah Anak Dibata, si ndatken kuasa arah Jahwe.

Ipersingeti Jesus kalak si jahat e, nina, “Kerina perbahanen manusia iampuni nge pagi, la soal dosa kai si ilakokenna ras penghinan kai si ibelaskenna. Tapi ise pe si ihinana kesah si badia, asa ndigan pe la banci iampuni erkiteken dosa e dosa si rasa lalap.” (Markus 3:28, 29) Adi lit kalak si ngataken maka mukjizat e rehna arah Setan, bahaya kel akibatna!