Nggo iundang Jesus empat murid-muridna jadi si njala manusia. Kalak e eme Petrus, Andreas, Jakup, ras Johanes. Gundari wari Sabat, lawes kalak e ku ingan pulung kalak Jahudi i Kapernaum. Ngajar Jesus i je, janah i jenda pe kerina kalak jengang megi ia ngajar. Ia ngajar bagi kalak si lit kuasana janah la bagi ahli Undang-Undang Musa.

Bas wari Sabat e, reh sekalak dilaki si irasuki malekat jahat. I bas ingan pulung e serko ia, “O Jesus kalak Nasaret, kai urusenndu ras kami? Ikernepkenndu kin atendu kami? Kuteh nge ise kam situhuna, Si Badia i bas Dibata nari!” Isergang Jesus malekat jahat si ngerasuki dilaki e, nina, “Sinikken, ndaratlah i bas ia nari!”​—Markus 1:​24, 25.

Minter idampesken malekat jahat ndai dilaki e ku taneh janah serko kel ia. Tapi ndarat malekat jahat e janah “la ilukaina ia.” (Lukas 4:35) Jengang kel kerina kalak si lit i bas ingan pulung kalak Jahudi e! Nungkun kalak e, ‘Kai kin enda? Lit kuasana mpelawes malekat-malekat jahat janah patuh ka malekat jahat e bana.’ (Markus 1:​27) Berita kerna si enda terbegi i bas kerina daerah Galilea.

Mulih arah ingan pulung kalak Jahudi nari, Jesus ras murid-muridna lawes ku rumah Simon ntah pe Petrus. Mami Petrus sangana tinggi kel demamna. Ipindo kalak e gelah ipepalem Jesus ia. Emaka idahi Jesus ia, ijemakna tanna, jenari ipekundulna. Minter ia malem janah isikapkenna pangan man Jesus ras murid-muridna.

Kenca ben wari, nterem kalak sakit rehen ku rumah Petrus. La ndekahsa tempa-tempa kerina kalak i bas kota e nggo pulung i lebe-lebe pintuna. Engkai? Ate kalak e gelah ipepalem. “Ibaba me kerina kalak si erbage-erbage pinakitna man Jesus. Ipepalem Jesus kalak e alu namaken tanna ku datasna sekalak-sekalak.” (Lukas 4:​40) Kai pe pinakit kalak e banci ipepalem Jesus bagi si nggo ikataken. (Jesaya 53:⁠4) Kalak si irasuki malekat jahat pe banci ipepalemna. Kenca ndarat malekat jahat e, serko ia, “Kam kap Anak Dibata.” (Lukas 4:​41) Ieteh malekat-malekat jahat e Jesus eme Kristus. Tapi isergang Jesus malekat e janah lanai ipediatna ngerana. Sebap la merhat Jesus ngidah malekat-malekat jahat e tempa-tempa ngelayani Dibata si benar.