Edenga iajari Jesus murid-muridna gelah meteruk ukur bagi anak si kitik si la lit kedudukenna. Alu ngelakoken si e, iusih kalak e Jesus.​—Matius 18:5.

Inasehati Jesus rasul-rasul e perban sijawapen kalak e kerna ise si belinna. Gundari, iceritaken rasul Johanes kejadin si deban, “Lit idah kami sekalak jelma mpelawes malekat jahat alu make gelarndu, emaka icubaken kami ngambati ia erkiteken la ia ikut ras kita.”​—Lukas 9:​49.

Banci saja iakap Johanes maka rasul-rasul ngenca si banci mpepalem kalak ntah pe mpelawes malekat jahat. Menurut Johanes, la banci ilakoken dilaki Jahudi ndai mukjizat perban la ia ikut erdalan radu ras Jesus bage pe rasul-rasul e. Adi bage, uga maka banci ipelawes dilaki ndai malekat jahat?

Tapi nina Jesus, “Ula cubaken kena ngambati ia, sebap la lit kalak si banci ngelakoken perbahanen si dem kuasa i bas gelarku jenari minter ka ikatakenna si la mehuli kerna aku. Sebap ise pe si la ngelawan kita, ras kita nge. Janah ise pe si mereken sada cangkir lau inemen man kena erkiteken kena pengikut Kristus, situhuna, ia pasti la kebenen upahna.” (Markus 9:​39-41) Banci saja, sengget Johanes megi si e.

I bas paksa si e, runggun Kristen lenga iban. Emaka, aminna pe dilaki ndai la ikut erdalan ras Jesus, labo ngertiken maka ilawanna Jesus ntah pe salah ajarenna. Jelas me, ia erkiniteken man gelar Jesus, janah ikataken Jesus maka ialokenna me upahna.

Inasehati Jesus me rasul-rasulna gelah ula sempat ranan ntah perbahanen kalak e erban bene kiniteken dilaki ndai, sebap si e perkara si serius. Nina Jesus, “Ise pe si erbanca bene kiniteken salah sada i bas kalak si kitik enda si nggo erkiniteken, ulin igantungken sada batu penggilingen si galang ku kerahungna, jenari ibenterken ia ku lawit.” (Markus 9:​42) Ikataken Jesus ka maka arus nggit pengikutna ngambekken kai pe si erban tertuktuk, aminna pe e seh kel mehergana, bagi tan, nahe, ntah pe mata. Ulin bene kai si meherga e tapi masuk ku bas Kerajan Dibata, asangken lit kerinana i bas kita tapi masuk ku Gehena (Lembah Hinom). Banci saja nggo pernah idah rasul-rasul e lembah ingan nutung sampah i darat Jerusalem. Emaka, iangkai kalak e maka si e ngertiken ukumen guna ikernepken seh rasa lalap.

Ingetken Jesus ka, “Ula iakap kena la meherga sada pe i bas kalak si kitik enda nari, sebap malekat-malekatna si i surga lalap lit i lebe-lebe Bapakku.” Uga mehergana kin “kalak si kitik” enda man Jahwe? Iceritaken Jesus kerna sekalak dilaki si lit 100 biri-birina. I bas sada wari bene me sada biri-birina e. Guna ndarami sada biri-biri e, itadingkenna 99 biri-birina si deban. Sanga idatna biri-biri e, lebih kel riahna akapna erkiteken nggo idatna sada biri-biri e asangken 99 si debanna. Nina Jesus ka, “Bapakku si i surga la ateNa bene sada pe i bas kalak si kitik enda.”​—Matius 18:​10, 14.

Kenca si e, banci saja perban inget Jesus rasul-rasul sijawapen kerna ise si belinna, inasehati Jesus ka, “Lit min sira i bas kena, janah tetaplah erdame sada ras si debanna.” (Markus 9:​50) Sira erban pangan jadi reh tabehna. Perumpaman e ngertiken maka adi sitama sira i bas rananta, lebih menukah ialoken kalak kai si nggo sikataken janah alu bage dame me. Tapi adi sijawapen labo lit kedamen.​—Kolose 4:6.

Maun-maun banci jadi lit masalah serius. Ijelasken Jesus cara ndungisa, nina, “Adi erban dosa seninandu, laweslah janah turiken kesalahenna sanga kam ras ia saja. Adi ibegikenna kam, nggo idatndu seninandu e.” Uga adi la ia nggit megikenca? Nina Jesus ka, “Babalah ras kam sekalak ntah dua kalak, gelah alu kesaksin arah dua ntah telu kalak saksi kerina masalah banci iperjelas.” Adi bage pe la terdungi, arus kita ngerana man “runggun” eme pertua-pertua. Kalak enda me si erban keputusen. Uga adi la nggit kalak si erdosa e megikenca? Nina Jesus, “Pediatlah ia bali bagi kalak i bas bangsa-bangsa si deban ras bagi pengalo cuke.” Enda ngertiken maka lanai banci kita erteman ras ia.​—Matius 18:​15-​17.

Pertua-pertua i bas runggun arus ngikutken Kata Dibata. Alu bage, adi ikataken kalak e maka kalak ndai salah janah perlu idisiplin, keputusen kalak e “nggo iiket i surga.” Tapi, adi ikataken kalak e maka kalak ndai labo salah, si e “nggo ilepasken i surga.” Petunjuk enda me si ipake i bas runggun Kristen. Adi arus ibuat pertua-pertua keputusen penting si bage, nina Jesus, “I ja lit dua ntah telu kalak pulung i bas gelarku, aku lit i tengah-tengah kalak e.”​—Matius 18:​18-​20.