Edenga iajari Jesus rasul-rasulna kerna carana ndungi masalah serius ras teman sada kiniteken. Kalak si lit masalahna e arus iusahakenna sendiri ndungi masalahna. Tapi, Petrus merhat meteh seh asa piga kali nge arusna ngelakoken si e. 

Isungkun Petrus, “O Tuan, adi seninaku erdosa man bangku, piga kali nge arus kuampuni? Ngayak pitu kali nge?” Piga-piga peminpin agama ngajari maka sekalak jelma perlu ngampuni seh asa telu kali. Emaka, banci saja nggo mehuli kel iakap Petrus bana adi ngampuni ia seh asa “pitu kali.”​—Matius 18:21.

Tapi, ngkirai kesalahen kalak si deban la cocok ras ajaren Jesus. Inasehati Jesus me Petrus, “Labo ngayak pitu kali, tapi ngayak 77 kali.” (Matius 18:22) Enda ngertiken maka labo lit batasna i bas ngampuni.

Jenari, iceritaken Jesus perumpaman guna ngajari uga pentingna ngampuni e. Eme kerna sekalak budak si la ngusih raja si perkuah ate. Sanga erkira ate raja e ras budak-budakna, ilebuhna me sekalak budak si melala kel utangna, eme 10.000 talenta [60 juta dinar]. La mungkin ia ngasup nggalari utangna e. Emaka gelah lit penggalarna, iperentahken raja gelah ia, ndeharana, ras anak-anakna bage pe kerina si lit i bas ia idayaken. Erjimpuh me budak e man bana, nina, “Sabarlah min kam bangku, kugalari nge pagi kerina.”​—Matius 18:26.

Mekuah kel ate raja e janah imasapkenna utang budak e. Sanga ndarat budak e, jumpa ia ras budak-budak si deban si lit utangna 100 dinar man bana. Itangkapna ia jenari icekakna, janah nina, “Galari utangndu.” Emaka erjimpuh temanna e janah mindo kel man bana, “Sabarlah min kam bangku, kugalari nge pagi.” (Matius 18:​28, 29) Jelas me, budak si nggo iampuni ndai la ngusih raja e. Malahen, imasukkenna temanna e ku penjara seh asa banci igalarina utangna, padahal labo melala kel utangna.

Sanga idah budak-budak si deban perbahanen budak si la perkuah e, iceritaken kalak e man raja. Merawa kel raja e, emaka ilebuhna budak e janah nina, “Kam budak si jahat, kusasapken kerina utangndu erkiteken mindo kel kam man bangku. La kin arusna kam pe rate mekuah man temanndu sapih-sapih budak bagi aku nggo rate mekuah bandu?” Erkiteken merawa kel raja e, ipenjarakenna ia seh ngasa igalarina kerina utangna. Jenari nina Jesus, “Bage ka me iban Bapakku si i surga man kena sekalak-sekalak, adi la kin iampuni kena turang senina kena i bas pusuh kena nari.”​—Matius 18:​32-​35.

Arah perumpaman e siteh maka penting kel ngampuni kalak! Enggo iampuni Dibata dosata si bali bagi utang si seh kel belinna. Adi sibandingken ras si e, la soal uga belinna pe salah turang seninata, labo japahna pe kesalahen si iban turang seninata man banta. Janah, labo sekali ngenca kita iampuni Dibata, tapi lanai terkira. Aminna pe megelut kita iban turang seninata, la kin kita pe arusna terus ngampuni turang seninata? Bagi si ikataken Jesus i bas Kotbahna i Deleng, iampuni Dibata me dosata adi nggo siampuni dosa kalak si deban.​—Matius 6:12.