Sanga rasul-rasul Jesus erberita i Galilea, Johanes Peridiken ipenjaraken denga. Ia ipenjaraken nggo hampir dua tahun dekahna.

Pang kel Johanes nuriken kesalahen Raja Herodes Antipas. Kesalahenna e eme iceraikenna diberuna, jenari ibanna Herodias jadi diberuna. Herodias eme diberu Pilipus, senina Herodes. Herodes e patuh man Undang-Undang Musa, padahal kai si ilakoken Herodes e nggo ngelanggar Undang-Undang Musa. Perban ipersingeti Johanes ia, ipenjarakenna me Johanes, banci saja perban isuruh Herodias.

La iteh Herodes kai si arus ilakokenna man Johanes, perban iakap kalak “Johanes e nabi.” (Matius 14:5) Tapi merhat kel Herodias gelah Johanes ibunuh perban “dendam kel Herodias man Johanes.” (Markus 6:​19) Dungna, reh me kesempaten si nggo ndekah itima-timaina.

La ndekah ope Paskah tahun 32 M, iban Herodes pesta ulang tahun si meriah kel. Si reh ku pesta e eme kerina pejabat ras komandan militer Herodes bage pe kalak si penting i Galilea. I bas pesta e, landek me Salome, ia anak Herodias arah perbulangenna si pertama. Meriah kel akap kalak si lit bas pesta e.

Jadi kel ate Herodes nandangi anak tirina e, janah nina ersumpah, “Kai pe si ipindondu, pasti kubereken, seh asa setengah kerajanku enda pe kubere.” Ope ijawap Salome isungkunna lebe mamakna, nina, “Kai si arus kupindo?”​—Markus 6:​22-​24.

Enda me si nggo ndekah itima-timai Herodias! Emaka nina, “Takal Johanes Peridiken.” Minter mulihken Salome ndahi Herodes, nina, “Bereken bangku gundari takal Johanes Peridiken tare talam.”​—Markus 6:​24, 25.

Sedih kel akap Herodes megiken pemindonna e, tapi nggo ibegi tamu-tamuna sumpahna man Salome. Emaka, terpaksa me Herodes nepati sumpahna e, amin pe enda ertina arus ibunuhna kalak si la ersalah. Jenari isuruh Herodes me pengawal ku penjara alu perentah si kejam. La ndekah kenca si e, ibaba pengawal takal Johanes tare talam. Iberekenna man Salome, janah ibereken Salome ka man mamakna.

Sanga ibegi murid-murid Johanes kerna kai si terjadi, reh kalak e ibuatna mayat Johanes janah ikuburkenna. Jenari ilaporken kalak e man Jesus.

Sanga ibegi Herodes maka banci ipepalem Jesus kalak si sakit ras malekat jahat pe banci ipelawesna, mbiar ia. Akapna Jesus si ngelakoken kerina e eme Johanes Peridiken si “nggo ipekeke i bas si mate nari.” (Lukas 9:7) Emaka merhat kel Herodes Antipas jumpa ras Jesus. Labo atena megiken berita si ipeseh Jesus. Tapi merhat ia jumpa guna mastiken tuhu ntah lang Jesus e Johanes Peridiken.