Jesus i Kapernaum denga sanga ipersingetina kalak Parisi. Jenari lawes ia ku deher Lawit Galilea. Nggo nterem kalak pulung i je. Emaka, naik ia ku datas perahu, janah ibanna perahu e miser arah tepi nari. Mulai me iajarina kalak e kerna Kerajan Dibata alu perumpaman ntah pe anding-andingen. Contoh si ipake Jesus sanga ia ngajar itandai kalak e, emaka menukah iakap kalak e ngangkai ajaren Jesus kerna Kerajan Dibata.

Si pemena, iceritaken Jesus kerna sekalak si ngambur benih. Lit benih si ndabuh i dalan jenari ipangani perik-perik. Lit ka benih si ndabuh i taneh si erbatu si la mbue tanehna. Turah ia tapi la mbages uratna, kenca kena las matawari melus ia. Benih si deban ndabuh i tengah-tengah peren duri, kicat sinuan-sinuan e iban peren duri e. Benih si terakhir ndabuh i taneh si mehumur. Benih e dungna erbuah, “lit si 100 kali lipat, lit si 60, ras si debanna 30.”​—Matius 13:8.

I bas perumpaman si deban ipeseri Jesus Kerajan Dibata ras sekalak dilaki si ngambur benih. Aminna pe dilaki e medem ntah pe medak, benih e usur-usurna turah. Uga perturahna “la itehna.” (Markus 4:​27) Benih e turah sisada jenari erbuah dungna banci iperanina.

Iceritaken Jesus me perumpaman si peteluken kerna kalak si ngambur benih. Isuan dilaki e benih si mejile tapi “sanga kerina kalak medem,” isuan musuh sesa i tengah-tengah page e. Isungkun budak-budak dilaki e ia gelah iruahi kalak e sesa e. Nina dilaki e, “Ula, sebap sanga iruahi kena sesa e, page e pe banci ikut meruah. Pediat saja duana radu turah seh asa rani. I bas paksa peranin e pagi kukataken man kalak si rani: Pepulung lebe sesa e, jenari iket gelah itutung. Kenca si e pepulung page ku bas lumbungku.”​—Matius 13:​24-​30.

Enterem si megiken Jesus itehna dahin ku juma. Iceritakenna ka kerna benih sawi si kitik si iteh kalak e. Kenca turah benih e dungna jadi batang kayu si galang, janah banci jadi ingan perik-perik rasar. Kerna benih enda nina Jesus, “Kerajan surga bali bagi sada benih sawi si isuan kalak i bas jumana.” (Matius 13:31) Labo ate Jesus ngajarken kerna dahin ku juma. Si iajarkenna eme uga benih si kitik kel banci turah jadi galang.

Kenca si e iceritaken Jesus ka kerna kai si itandai kalak si megiken ia. Ipeserina Kerajan surga ras “ragi si ibuat sekalak diberu, jenari iadukna ras tepung si buena telu sukaten si galang.” (Matius 13:33) Aminna pe ragi e la teridah, banci ia serser ku kerina janah kembang banna tepung e. Tapi uga si e terjadi la teridah.

Kenca iceritakenna perumpaman-perumpaman e, itadingkenna jelma si nterem e jenari mulih ia ku rumahna. Mis reh murid-muridna ndahi ia, merhat kalak e meteh erti perumpaman ndai.

Enggo pernah ibegi murid-murid perumpaman arah Jesus nari, tapi lenga pernah bage buena iceritaken Jesus i bas sada kesempaten. Emaka nungkun kalak e, “Engkai maka alu perumpaman kam ngerana man kalak e?”​—Matius 13:10.

Sada alasenna eme gelah nubuat Pustaka si Badia terjadi. Itulis Matius, “Adi la arah perumpaman labo kai pe ikatakenna man kalak e. Alu bage terjadi me kai si ikataken arah nabi, ‘Alu perumpaman-perumpaman me aku ngerana. Kukataken me kai si terbuni mulai kin tangtangna nari.’ ”​—Matius 13:​34, 35; Masmur 78:2.

Tapi labo e saja tujun perumpaman Jesus. Tujun si deban eme ncidahken isi pusuh kalak. Enterem kalak mujiken Jesus perban beluh ia ngajar janah banci erban mukjizat. Tapi, la ipatuhi kalak e ia selaku Tuan janah la ikutken kalak e ia. (Lukas 6:​46, 47) La kalak e nggit ngobah carana rukur bage pe perbahanenna. Kai si iajarken Jesus la masuk ku pusuh kalak e.

Ijawap Jesus penungkunen murid-muridna, nina, “Erkiteken si e me aku ngerana man kalak e alu perumpaman, sebap aminna gia inenna tapi la idahna, janah aminna gia ibegina tapi la iangkana. Alu bage terjadi me kai si nggo ikataken Jesaya man kalak e, . . . ‘Lanai erpenggejapen pusuh bangsa e.’”​—Matius 13:​13-​15; Jesaya 6:​9, 10.

Labo kerina si megiken Jesus bage. Nina, “Ermeriah ukurlah kena, sebap mata kena erpengidah janah cuping kena erpemegi. Situhuna, nterem nabi bage pe kalak bujur, merincuh ngidah kai si idah kena gundari e, tapi la banci, janah merincuh ia megi kai si ibegi kena, tapi la banci.”​—Matius 13:​16, 17.

Jelas me 12 rasul ras murid-murid si deban erpenggejapen pusuhna. Emaka nina Jesus, “Man kena nggo ibereken kengasupen guna ngangkai rahasia si badia Kerajan surga, tapi man kalak enda lang.” (Matius 13:11) Erkiteken merhat kel kalak e ngangkai perumpaman e, ijelasken Jesus ertina.

Nina Jesus, “Benih eme kata Dibata.” (Lukas 8:​11) Taneh eme isi pusuh kalak. Alu meteh si e, banci siangkai erti perumpaman Jesus.

Nina Jesus kerna benih si ndabuh i tepi dalan, “Reh Iblis, ibuatna kata Dibata e i bas pusuh kalak e nari gelah lanai ia tek janah la iselamatken.” (Lukas 8:​12) Benih si ndabuh i datas batu ertina kalak si ngaloken kata Dibata alu ermeriah ukur, tapi la mbages uratna i bas pusuhna. “Kenca reh kiniseran ntah pe peniksan erkiteken berita e,” mis bene kiniteken kalak e. “Paksa lit percuban” banci saja arah keluargana ntah pe si debanna, dungna lanai ikutkenna Jesus.​—Matius 13:21; Lukas 8:​13.

Uga kerna benih si ndabuh i tengah-tengah peren duri? Ikataken Jesus man murid-muridna maka e maksudna kalak si nggo pernah megiken kata Dibata. Tapi “kuatir ia kerna kegeluhen i doni enda janah perban itipu kebayaken.” (Matius 13:22) Enggo lit kata Dibata i bas pusuh kalak e, tapi dungna kicat janah la erbuah.

Benih si terakhir eme benih si ndabuh i taneh si mehumur. Enda maksudna kalak si nggo megi kata Dibata janah itamana ku bas pusuhna. Kai asilna? Kalak e “erbuah.” Perban keadan, bagi umur ntah kesehaten la banci seri asilna. Lit si buahna 100 kali lipat, 60 kali lipat, ras si debanna 30 kali lipat. Payo, ipasu-pasu Dibata kap “kalak si kenca ibegina kata e alu pusuh si bujur ras mehuli, ibunikenna i bas pusuhna janah megenggeng ia seh erbuah.”​—Lukas 8:​15.

 Pasti meriah kel ukur murid-murid megiken penjelasen Jesus e! Gundari nggo tuhu-tuhu iangkai kalak e erti perumpaman ndai. Ate Jesus iangkai kalak e perumpaman e gelah banci ikataken kalak e kebenaren man kalak si deban. Nungkun Jesus, “Me labo itama kalak lampu i teruh tumba ntah pe i teruh ingan medem? La kin arusna itama i bas ingan lampu?” Emaka nina Jesus, “Ise pe si ercuping, begikenlah.”​—Markus 4:​21-​23.

Kenca ibegiken kalak e penjelasen kerna perumpaman kalak si ngambur benih, merhat denga murid-murid meteh terbuen. Ning kalak e, “Kataken min man kami erti perumpaman kerna sesa i juma e.”​—Matius 13:36.

Penungkunen kalak e mbuktiken maka kalak e la seri ras jelma si nterem si lit i tepi pantai ndai. Memang ibegiken kalak e ajaren Jesus tapi la kalak e merhat meteh terbuen erti perumpaman e ras kai manpaatna. Puas kap kalak e megi-megi saja. Ibandingken Jesus kalak si megiken i tepi pantai ndai ras murid-muridna si merhat meteh terbuen. Nina:

“Perdiatekenlah kai si ibegi kena. Adi mbue si ibereken kena, bage ka nge kari buena si ialoken kena, janah terbuen ka pe.” (Markus 4:​24) Tutus kel ate murid-murid megiken Jesus janah terus kalak e nungkun. Ipasu-pasu me kalak e alu terbuen penjelasen. Jenari iceritaken Jesus ka perumpaman kerna page ras sesa, nina,

“Si ngambur benih si mejile eme Anak manusia, juma eme doni enda. Benih si mejile eme kalak si masuk pagi ku bas Kerajan surga, tapi sesa eme anak-anak si jahat, janah musuh si ngamburkenca eme Iblis. Paksa peranin eme kedungen jaman enda, janah si rani eme malekat-malekat.”​—⁠Matius 13:​37-​39.

Kenca ijelaskenna perumpaman e, ikatakenna kai pagi si terjadi. I bas pendungi jaman enda, si rani eme malekat-malekat, iserapkenna pagi kalak Kristen palsu si bali bagi sesa arah “kalak si masuk pagi ku bas Kerajan surga.” “Kalak si bujur” ipersada pagi janah ersinar kalak e “i bas Kerajan Bapakna.” Janah uga kerna “anak-anak si jahat”? Ikernepken me pagi kalak e “tangis janah erderep ipenna ban suina.”​—Matius 13:​41-​43.

Kenca si e, ipasu-pasu Jesus ka murid-muridna alu telu perumpaman. Pertama, “Kerajan surga bali bagi erta si terbuni i juma, si idat kalak jenari ibunikenna mulihi. Erkiteken meriah kel ukurna, lawes ia, idayakenna kerina si lit i bas ia, jenari itukurna me juma e.”​—Matius 13:44.

Nina ka, “Kerajan surga pe bali ka bagi sekalak perbinaga keliling si ndarami mutiara si mejile. Kenca jumpa ia sada mutiara si seh kel ergana, lawes ia, idayakenna kerina si lit i bas ia, jenari itukurna mutiara ndai.”​—Matius 13:​45, 46.

I bas perumpaman si pertama, idayaken perbinaga keliling e “kerina si lit i bas ia” guna ndatken mutiara si seh kel ergana. Si peduaken, dilaki si ndarami erta si terbuni i bas juma “idayakenna kerina si lit i bas ia” guna nukur juma e. Arah duana perumpaman e, ijelasken Jesus pentingna pengorbanen guna ndatken kai si meherga. Kalak si nandai Dibata pe perlu erban pengorbanen si mbelin. (Matius 5:3) Piga-piga kalak si megiken perumpaman Jesus e nggo mbuktiken maka tuhu-tuhu kalak e merhat nandai Dibata janah jadi pengikut Jesus.​—Matius 4:​19, 20; 19:27.

Dungna, ipeseri Jesus Kerajan surga ras jala si mpepulung erbage-bage ikan. (Matius 13:47) Sanga ikan-ikan e ipisahken, ikan si mejile itama ku inganna tapi si la mejile iambekken. Ikataken Jesus maka i bas kedungen jaman enda pe pagi, ipisahken malekat-malekat me kalak si jahat arah kalak si bujur nari.

Jesus pe ikataken njala sanga ilebuhna murid-muridna si pertama jadi “si njala manusia.” (Markus 1:​17) Tapi perumpamanna kerna njala e terjadi i bas wari si pepagi eme i bas “kedungen jaman enda.” (Matius 13:49) Emaka iteh rasul-rasul bage pe murid-murid si megiken Jesus maka lit pagi si luar biasa si terjadi.

Buen idat kalak e manpaat arah perumpaman Jesus asangken kalak si i tepi pantai ndai. Erkiteken “man murid-muridna ikatakenna kerina alu jelas.” (Markus 4:​34) Jesus “bagi sekalak tuan rumah, si mpedarat erta-ertana si mbaru ras si nggo ndekah.” (Matius 13:52) Sanga iceritaken Jesus kerna perumpaman-perumpaman e labo atena ncidahken maka beluh ia ngajar. Tapi, ibagikenna atena kebenaren si meherga man murid-muridna. Jesus tuhu-tuhu sekalak “guru” si luar biasa.