Meriah ukur 12 rasul erberita ku sebelang Galilea, janah iceritaken kalak e man Jesus “kerina si nggo ilakoken ras si iajarken kalak e.” Pasti latih akap kalak e. Lanai lit waktu kalak e guna man perban nterem jelma si reh bage pe si lawes. Emaka nina Jesus, “Ota kita ku ingan si melungen, ngadi kita kentisik.”​—Markus 6:​30, 31.

Inangkihi kalak e kapal, banci saja i deher Kapernaum, janah lawes kalak e ku ingan si melungun i sebelah timur Lau Jordan, daerah si dauhen sitik asangken Betsaida. Sanga ngidah si e, lawes jelma si nterem e ngayakisa, janah leben kalak e seh asangken Jesus ras murid-muridna.

Sanga nusur arah kapal, idah Jesus jelma si nterem janah mekuah atena sebap kalak enda bali bagi biri-biri si la lit permakanna. Emaka mulai Jesus “ngajar janah melala si iajarkenna” kerna Kerajan. (Markus 6:​34) Ipepalemna ka “kerina si perlu ipepalem.” (Lukas 9:​11) Kenca si e, idahi murid-murid me Jesus janah nina, “Ingan enda melungen janah wari pe nggo ben. Suruhlah kalak e lawes, gelah itukurna panganna i kuta-kuta si ndeher jenda nari.”​—Matius 14:15.

Nina Jesus, “La perlu kalak enda lawes, kena saja si mere kalak e man.” (Matius 14:16) Aminna pe nggo iteh Jesus kai si nandangi ilakokenna, isungkunna Pilipus, nina, “I ja nge situkur pangan guna kalak si nterem enda?” Ngaloi Pilipus, “Aminna tersitik pe ibereken man tiap kalak, labo bias 200 dinar guna nukur roti.” (Johanes 6:​5-7) Situhuna isungkunna Pilipus guna nguji ia, sebap ia rehna arah Betsaida nari eme kota si deher i je. Tapi labo nukur pangan si jadi jalan keluarna. I je lit 5.000 dilaki, lenga termasuk diberu ras anak-anak. Emaka, kerina kalak e banci saja teremna lebih 10.000 kalak!

Banci saja, la mungkin iakap Andreas mere man kalak bage teremna, nina, “I jenda lit sekalak anak-anak. I bas ia lit lima roti barli ras dua ikan si kitik. Tapi bias kin man kalak si bagenda teremna?”​—Johanes 6:9.

Sanga nggo ndeher Paskah tahun 32 M, melala dukut i deleng e, emaka ipindoken Jesus man murid-muridna gelah ikataken kalak e man jelma si nterem gelah kundul alu erkelompok, lit si 50 janah lit si 100 kalak i bas kelompok. Ibuat Jesus lima roti ras dua ikan janah ngata bujur ia man Dibata. Kenca si e, icepik-cepikkenna roti e janah isuruhna murid-muridna mbagikensa man jelma si nterem e. Kerina kalak e man seh asa besur. Luar biasa kel si e!

Kenca besur kalak e kerina, nina Jesus man murid-muridna, “Pepulung kerina sisana, gelah ula lit si terbuang.” (Johanes 6:12) Sisa pangan si ipepulung kalak e lit 12 keranjang buena!