Sanga Jesus ngajar i daerah Kesarea Pilipi, kira-kira 25 kilometer arah Deleng Hermon, ikataken Jesus man rasul-rasulna, “Situhuna, lit piga-piga kalak si tedis i jenda si la pagi ngenanami kematen sope idahna lebe Anak manusia reh i bas Kerajanna.”​—Matius 16:28.

Pasti merhat kel murid-murid ngangkai ranan Jesus e. Kira-kira seminggu kenca si e, ibaba Jesus telu rasulna eme Petrus, Jakup, ras Johanes, ku deleng si meganjang. Banci saja enda nggo tengah berngi, sebap nggo madat mata rasul-rasul e. Sanga Jesus ertoto, idah kalak e salih rupa Jesus. Ersinar ayona bagi matawari janah uisna si arah darat jadi mbentar ras terang kel.

Jenari idah kalak e “Musa ras Elia.” Ngerana-ngerana dua dilaki e ras Jesus kerna “uga Jesus lawes, si nandangi terjadi kari i Jerusalem.” (Lukas 9:​30, 31) Bali bagi si nggo pernah ikataken Jesus, jelas me si imaksudken eme kematen Jesus ras kekekenna. (Matius 16:21) Kai si icakapken kalak e mbuktiken maka kematen Jesus arus terjadi, labo bagi si pernah ikataken Petrus.

Gundari, lanai madat mata rasul-rasul e. Luar biasa kel akap kalak e banci megiken janah ngenen kerina e. Kerina si idah kalak enda tempa-tempa tuhu terjadi, seh maka ngerana Petrus ras kalak e, nina, “O Guru, meriah ukur kami i jenda. Pediat kami erban telu kemah: sada man bandu, sada man Musa, janah sada nari man Elia.” (Markus 9:5) Banci saja iban Petrus atena kemah gelah banci idahna kalak e terdekahen.

Sanga ngerana Petrus, rempet lit embun si terang nutupi kalak e. Jenari, terbegi sora arah embun e, “Enda me AnakKu, si Kukelengi. Ia me si ngena ateKu. Begikenlah ia.” Sanga ibegi kalak e sora Dibata, erjimpuh rasul-rasul e perban seh kel biarna. Tapi ikataken Jesus man kalak e, “Tediskenlah, ula mbiar.” (Matius 17:​5-7) Kenca tedis rasul-rasul e, Jesus ngenca si banci idah kalak e. Lanai idah kalak e kai si nggo inenna ndai. Paginna, nusur kalak e arah deleng, janah iperentahken Jesus, “Ula kataken man ise pe kerna kai si nggo idah kena e seh asa Anak manusia ipekeke i bas si mate nari.”​—Matius 17:9.

Kerna kai si iidah kalak e, inen kalak e Elia lit i je, emaka nungkun rasul-rasul, “Dage, ngkai maka ahli-ahli Undang-Undang Musa ngataken maka Elia arus reh leben?” Nina Jesus ngaloi, “Elia nggo reh, tapi la itandai kalak e ia.” (Matius 17:​10-​12) Si sangana icakapken Jesus eme kerna Johanes Peridiken. Tanggung jawap Johanes Peridiken seri ras Elia. Elia nikapken pelayanen Elisa janah Johanes Peridiken nikapken pelayan Kristus.

Pasti terpegegehi kel Jesus ras rasul-rasul! Kai si inen kalak e ndai ncidahken kemulian Jesus si jadi Raja i bas Kerajan Dibata. Jadi, bagi si nggo ijanjiken Jesus, teluna rasul e ngidah “Anak manusia reh i bas Kerajanna.” (Matius 16:28) Sanga i deleng, ‘mata kalak e nge si ngidah kemulianna.’ Rusur ipindo kalak Parisi tanda si jadi bukti maka Jesus eme Raja si ipilih Dibata, tapi sada tanda pe la lit ibereken Jesus. Kai si inen kalak e i deleng ndai, erban kalak e tek maka janji-janji kerna Kerajan Dibata pasti terjadi. I bas pudi wari, itulis Petrus, “Reh tekna kami man kata-kata nubuat.”​—2 Petrus 1:16-​19.