La seri tanggapen kalak nandangi si iajarken ras si ilakoken Jesus. Tanggapen kalak e sue ras isi pusuhna. Enda teridah sanga i bas Galilea. Simon si kalak Parisi ngundang Jesus man ku rumahna. Banci saja merhat ia langsung ngidah mukjizat Jesus. Nggit Jesus reh ku rumahna sebap iakapna enda sada kesempaten guna ngajar kalak si reh ku je. Bali bagi si nggo pernah ilakokenna sanga man ia ras pengalo cuke bage pe ras kalak perdosa.

Tapi, la ialo-alo kalak e Jesus bagi si arusna. I Palestina, dalan-dalanna mbue abu. Biasana kalak erselop, emaka kotor me nahe kalak e janah melas akapna. Jadi nahe tamu e biasana iburihi alu lau si mbergeh. Tapi la lit si mburihi nahe Jesus. Kebiasan si deban i bas daerah e eme, tamu ialo-alo alu iema ras iminaki bukna. Tapi la lit si ngelakoken si e man Jesus.

Ibenaken me acara man. Paksa kerina kalak kundul janahna man, alu erbuni-buni reh me ku ruangen e sekalak diberu si la iundang. Ia “sekalak diberu si terberita selaku kalak perdosa.” (Lukas 7:37) Memang kerina nge manusia erdosa, tapi diberu enda la mehuli lagu langkahna, banci saja ia sekalak pelacur. Mungkin nggo ibegina ajaren Jesus, termasuk undangenna man ‘si beraten, gelah ipegegehi.’ (Matius 11:​28, 29) Tersuruh ukurna arah ajaren ras kai si ilakoken Jesus, emaka gundari idahina Jesus.

Reh ia arah pudi Jesus janah erjimpuh ia i nahe Jesus. Naktaken iluh diberu e ku nahe Jesus, janah ielapna alu bukna. Iemana nahe Jesus jenari ibuatna minak si meherga si nggo itukurna janah icurcurkenna ku nahe Jesus. La senang Simon ngidah si e, nina bas ukurna, “Adi tuhu-tuhu nabi kin dilaki enda, pasti itehna ise ras diberu si uga kin si ndadap ia e, ia me kalak perdosa.”​—Lukas 7:​39.

Iteh Jesus perukuren Simon, emaka nina, “Simon, lit ateku si kukataken bandu.” Ngaloi Simon, “Katakenlah Guru!” Nina Jesus, “Dua kalak dilaki rutang man sekalak jelma, sekalak utangna 500 dinar janah sekalak nari 50. Sanga la lit kai pe i bas kalak e guna nggalarisa, isasapkenna utang kalak e. Adi bage, si apai nge i bas kalak e duana si kelengen atena perutangenna ndai?” Ijawap Simon, “Kuakap kalak si buen utangna.”​—Lukas 7:​40-​43.

Setuju Jesus. Jenari inenna diberu e, janah nina man Simon, “Idahndu nge diberu enda? Reh aku ku rumahndu, la iberendu lau guna mburihi naheku. Tapi diberu enda ibernakina naheku alu iluhna janah ielapna alu bukna. Kam, la iemandu aku, tapi diberu enda, mulai kin aku reh ndai la erngadi-ngadi iemana naheku alu lembut. La icurcurkenndu minak ku takalku, tapi diberu enda icurcurkenna minak wangi ku naheku.” Banci iteh Jesus maka diberu e tuhu-tuhu ertobat i bas pusuhna nari. Emaka nina, “Kukataken bandu, aminna pe dosa-dosana seh buena, nggo iampuni sebap mbelin kekelengenna. Tapi kalak si kitik kekelengenna, sitik ka iampuni.”​—Lukas 7:​44-​47.

Jesus labo setuju nandangi perbahanen diberu e. Tapi mekuah atena man kalak si mbue dosana janah tuhu-tuhu nggit ertobat guna ngikutken Kristus. Pasti meriah kel ukur diberu e megi kata-kata Jesus, “Dosa-dosandu nggo iampuni. . . . Kinitekenndu nggo nelamatken kam, laweslah alu dame.”​—Lukas 7:​48, 50.