Setahun si lewat, ope lenga ia iperidiken Johanes, Jesus itandai selaku tukang kayu. Tapi gundari ia itandai selaku dilaki si banci erban melala mukjizat. Emaka kalak Nasaret merhat kel ngidah Jesus ngelakoken mukjizat-mukjizat e.

Reh merhatna kalak e metehsa sanga Jesus masuk ku ingan pulung kalak Jahudi bagi si biasa ilakokenna. Si biasa ilakoken i je eme ertoto ras mbacaken buku-buku Musa, bagi si biasa ilakoken “bas ingan-ingan pulung kalak Jahudi tiap wari sabat.” (Perbahanen Rasul-Rasul 15:21) Piga-piga bagin arah buku nubuat pe ibacaken. Sanga cinder Jesus guna mbaca, nterem kalak si itandaina perban mbarenda rusur ia reh ku ingan pulung kalak Jahudi e. Gulungen Jesaya ibereken man bana. Idatna bagin si ngataken kerna Kalak si ipilih alu kesah si badia Jahwe, enda lit i bas Jesaya 61:​1, 2.

Ibacaken Jesus kerna kai si pagi iberitaken Kalak si ipilih e, eme kerna mbebasken kalak si itaban, erban kalak pentang erpengidah, janah tahun si mehuli arah Jahwe pe nandangi reh. Jenari ibereken Jesus gulungen e man petugas janah kundul ia. Kerina kalak ngenen ia. Emaka, ibereken Jesus penjelasen agak gedang, i bas penjelasen e ikatakenna kerna si penting enda, “Gundari terjadi me ayat si edenga ibegi kena.”​—Lukas 4:21.

Jengang kel kalak “megi kata-katana si mehuli si ndarat i bas babahna nari,” janah nina kalak e, “La kin ia anak Jusup?” Iteh Jesus maka merhat kel kalak e ngidah ia erban mukjizat bagi si nggo ibegi kalak e. Emaka nina Jesus, “Pasti ikataken kena bangku, ‘O dokter, pepalemlah bandu. Lakoken ka i jenda, i kutandu, bagi si nggo ibegi kami kerna kai si ilakokenndu i Kapernaum.’” (Lukas 4:​22, 23) Ate kalak Nasaret mukjizat e ilakoken i bas kutana lebe. Emaka iakap kalak e Jesus la ngergai kalak e.

Perban iteh Jesus perukuren kalak e, ikatakenna piga-piga contoh si pernah terjadi i Israel. I bas jaman Elia, melala diberu si mbalu i Israel, tapi Elia labo isuruh ndahi kalak e. Ia isuruh ndahi diberu si mbalu si labo kalak Israel i Sarpat, i kota Sidon. I je iban Elia mukjizat si banci nelamatken kegeluhen diberu si mbalu e bage pe anakna. (1 Raja-Raja 17:​8-​16) Janah i bas jaman Elisa, enterem kalak Israel si sakit kusta, tapi sekalak ngenca si ipepalem nabi eme Naaman kalak Siria.​—2 Raja-Raja 5:​1, 8-​14.

Contoh si ikataken Jesus e ncidahken maka kalak e mentingken bana ras la erkiniteken. Megi si e uga tanggapen anak kuta Jesus? Merawa kalak si lit i bas ingan pulung e janah ibaba kalak e Jesus ndarat arah kota e. Ibaba kalak e ia ku deleng si i datasna ibangun kota Nasaret, janah ianjumken kalak e atena Jesus i je nari. Tapi kiam Jesus je nari. Gundari Jesus lawes ku Kapernaum si lit i sebelah barat Lawit Galilea.