Wari pepituken eme wari terakhir perayan Wari Raya Sapo-Sapo, janah i bas wari e ngajar Jesus i bas bagin rumah pertoton si igelari ingan “kotak-kotak persembahen.” (Johanes 8:​20; Lukas 21:1) Banci saja, bagin daerah e i deher Halamen Diberu.

Sedekah perayan e, tiap berngi daerah e iterangi. I je lit empat lampu minak si galang. Terang si ersinar arah lampu e seh ku ingan si ndauh. I je me sanga ikataken Jesus, “Aku kap terang doni. Ise pe si ngikutken aku, labo kari ia erdalan i bas gelap, tapi ialokenna me terang si mereken kegeluhen.”​—Johanes 8:​12.

La senang kalak Parisi megi si e, nina, “Kam ngerana kerna dirindu sendiri, emaka labo tuhu kesaksinndu e.” Ijawap Jesus, “Aminna pe kerna diriku aku ngerana, tuhu nge si kukataken enda, perban kuteh nge i ja nari aku reh janah ku ja kari aku lawes. Tapi kena, la iteh kena i ja nari aku reh janah ku ja kari aku lawes.” Nina Jesus ka, “Lit kap tertulis i bas Undang-Undang Musa, ‘Kesaksin si benar eme kesaksin i bas dua kalak nari.’ Aku ersaksi kerna diriku janah Bapak si nuruh aku pe ersaksi kerna aku.”​—Johanes 8:​13-​18.

La terterima kalak Parisi si ikataken Jesus, emaka nungkun kalak enda, “I ja kin Bapakndu?” Ijawap Jesus alu tegas, “Labo itandai kena aku ntah pe Bapakku. Adi itandai kena aku, pasti itandai kena ka nge Bapakku.” (Johanes 8:​19) Ngarap denga kalak Parisi gelah Jesus itangkap, tapi la lit si nangkapsa..

Iulangi Jesus ka kata-kata si pernah ibelaskenna, nina, “Lawes me aku, janah idarami kena pagi aku. Tapi, mate me kena i bas dosa kena. La kena banci reh ku ingan si nandangi kudahi e.” La iangkai kalak Jahudi janah sisungkun-sungkunen kalak e, “Munuh bana kin atena maka nina, ‘La kena banci reh ku ingan si nandangi kudahi e’?” Salah pengangkan kalak e perban la iteh kalak e ja nari Jesus rehna. Emaka ikataken Jesus, “Asal kena arah teruh nari, tapi asalku arah datas nari. Kena reh arah doni enda, tapi aku la arah doni enda.”​—Johanes 8:​21-​23.

Maksud Jesus eme pernah ia nggeluh i surga ope lenga reh ku doni, janah ia kap Mesias ntah pe Kristus si ijanjiken, si arusna itimai-timai peminpin-peminpin agama, tapi ihina kalak e ia, nina, “Ise kin kam?”​—Johanes 8:​25.

Ijawap Jesus kalak si nentang e, “Man kai nari kin aku ngerana ras kena?” Aminna pe bage, tetap denga Jesus ngerana kerna Bapakna janah ijelaskenna ngkai maka arus ibegiken kalak Jahudi ia, nina Jesus, “Ia si nuruh aku e benar kap, janah kai si kukataken man doni enda eme si kubegi arah Ia nari.”​—Johanes 8:​25, 26.

La seri bagi kalak enda, icidahken Jesus maka erkiniteken ia man Bapakna, nina Jesus, “Kenca ipeganjang kena Anak manusia, iteh kena me maka aku kalak si ijanjiken e, janah kerina si kulakoken enda labo menurut peratenku, tapi kerina si kukataken eme si iajarken Bapak man bangku. Si nuruh aku ras aku kap. Labo itadingkenNa aku sisada, perban lalap kulakoken si ngena ateNa.”​—Johanes 8:​28, 29.

Lit piga-piga i bas kalak e nari si nggo erkiniteken man Jesus, ikataken Jesus man kalak e, “Adi terus inget kena kai si kuajarken, tuhu-tuhu me kena murid-muridku, iteh kena me kebenaren e, janah kebenaren e si mbebasken kena.”​—Johanes 8:​31, 32.

Megi kerna pembebasen e, lit si rate mamang janah protes, nina, “Kami kesusuren Abraham kap janah la pernah kami jadi budak ise pe. Engkai maka nindu kami ibebasken?” Ijawap Jesus, “Situhuna, ise pe si erban dosa, budak dosa kap.” (Johanes 8:​33, 34) Aminna pe kalak e nggo piga-piga kali ikuasai bangsa si deban, la nggit kalak e ikataken budak. Tapi jelas me ikataken Jesus maka situhuna kalak e budak denga.

Nina Jesus ka, “Selain si e, sekalak budak labo tetap tading i rumah majikenna seh rasa lalap, tapi sekalak anak tetap tading i je seh rasa lalap.” (Johanes 8:​35) Sekalak budak la ndatken warisen janah ndigan pe banci ipelawes. Anak kandung saja ngenca ntah pe anak angkat i bas keluarga e ngenca si banci tetap tading i rumah e “seh rasa lalap” sedekah ia nggeluh. Emaka, adi la kin terterima kalak Jahudi maka kalak e budak dosa, e bahaya kel.

Nina Jesus ka, “Emaka adi ibebasken Anak e kena, kena tuhu-tuhu bebas.” (Johanes 8:​36) Jesus kap Anak. Emaka payo kel maka kebenaren kerna ia banci mbebasken kalak arah dosa ras kematen seh rasa lalap.