Jesus i Jerusalem denga guna ngerayaken Wari Raya Sapo-Sapo, janah terus iajarkenna kebenaren si penting. Piga-piga kalak Jahudi si lit i je ngerana man Jesus, “Kami kesusuren Abraham kap janah la pernah kami jadi budak ise pe.” Nina Jesus, “Kueteh nge kena kesusuren Abraham, tapi tetap iusahaken kena munuh aku, perban la ialoken kena kai si kuajarken. Kai si kucakapken eme kerna kai si kuidah sanga aku ras Bapakku, tapi kena ngelakoken kai si ibegi kena arah bapak kena.”​—Johanes 8:​33, 37, 38.

Isina kel si ikataken Jesus: Bapakna labo bapak kalak e. Tapi la iangkai kalak Jahudi, nina kalak e ka, “Bapak kami Abraham kap.” (Johanes 8:​39; Jesaya 41:8) Memang kalak enda kesusuren Abraham, teman Dibata. Eme sebapna akap kalak e maka kalak e pe nembah Dibata Abraham.

Sengget kel kalak e sanga ikataken Jesus, “Adi anak-anak Abraham kin kena, pasti ilakoken kena kai si ilakoken Abraham.” Payo, sekalak anak pasti ngusih bapakna. Nina Jesus ka. “Tapi gundari, ibunuh kena ate kena aku, padahal si kupebetehken eme kebenaren si kubegi i bas Dibata nari. Abraham labo bage perbahanenna.” Ikataken Jesus ka, “Ilakoken kena kai si ilakoken bapak kena.”​—Johanes 8:​39-​41.

Lenga iangkai kalak Jahudi ise si imaksud Jesus. Ikataken kalak e maka kalak e kesusuren Abraham si sah, labo anak haram. Nina kalak e, “Kami labo ilahirken arah perbahanen seks si salah. Sada ngenca Bapak kami, eme Dibata.” Tapi tuhu kin e? Nina Jesus, “Adi Dibata kin Bapak kena, pasti keleng ate kena aku, sebap aku reh ku jenda perban isuruh Dibata. Aku reh labo erkiteken peratenku, tapi erkiteken peraten Si nuruh aku. Engkai maka la iangka kena si kukataken e? Em perban la ialoken kena kata-kataku.”​—Johanes 8:​41-43.

Enggo iusahaken Jesus kel njelasken akibatna adi itulak kalak e ia. Gundari alu terus terang ikatakenna, “Bapak kena Iblis kap, janah nggit kena ngelakoken peraten bapak kena.” Uga kin bapak kalak e? Nina Jesus, “Tangtangna nari pe ia pemunuh kap, janah la ia tetap i bas kebenaren.” Nina Jesus ka, “Kalak si reh i bas Dibata nari, ibegikenna kap kata Dibata. Tapi kena labo i bas Dibata nari, emaka la kena nggit megikenca.”​—Johanes 8:​44, 47.

Erkiteken meser ranan Jesus e, merawa kalak Jahudi janah nina, “Me tuhu nge si ikataken kami ndai, ‘Kam kalak Samaria janah kam irasuki malekat jahat’?” Igelari kalak e Jesus “kalak Samaria” ncidahken maka la merga kap kalak e Jesus. Tapi la diate Jesus, janah iteruskenna ngerana, “Aku labo irasuki malekat jahat. Kuhamati nge Bapakku, tapi kena la ihamati kena aku.” Padahal, adi ihamati kalak e Jesus, selamat kalak e. Erjanji Jesus, “Ise pe si ngikutken kataku, ndigan pe la ia mate.” Enda labo ngertiken maka rasul-rasul ras pengikut Jesus si debanna la pernah mate, tapi maksudna la inanami kalak e “kematen si peduaken,” eme pengkernepen si rasa lalap janah la lit arapen kekeken.​—Johanes 8:​48-​51; Ketangkasen 21:8.

Akap kalak Jahudi maka Jesus sangana ncakapken kematen si biasa. Emaka nina kalak e, “Gundari nggo iteh kami maka tuhu-tuhu kam irasuki malekat jahat. Abraham ras nabi-nabi nggo mate, tapi nindu, ‘Ise pe si ngikutken kataku, ndigan pe la ia mate.’ Me labo kam belinen asangken bapak kami Abraham si nggo mate? . . . Ise kin iakapndu kam?”​—Johanes 8:​52, 53.

Enggo iperjelas Jesus kel maka ia Mesias. Tapi la mis ikatakenna, nina, “Labo lit gunana adi kumuliaken diriku sendiri. Bapakkulah si mereken kemulian man bangku, si ikataken kena Dibata kena. Labo itandai kena Ia, tapi aku kutandai. Janah adi kukataken maka la kutandai Ia, perbual kap aku seri ras kena.”​—Johanes 8:​54, 55.

 Iceritaken Jesus ka kerna usihen nini bulang kalak e si setia, “Meriah kel iakap bapak kena Abraham perban banci kari idahna wari kerehenku. Kerehenku e nggo idahna janah meriah iakapna.” Perban erkiniteken Abraham man janji Dibata, itimai-timaina kerehen Mesias. Tapi la tek kalak Jahudi janah nina, “Umurndu pe lenga lit 50 tahun, tapi nggo ka idahndu Abraham?” Ijawap Jesus, “Situhuna, ope lenga Abraham lit, aku nggo lit.” Payo kel si e, sebap Jesus nggo lit i surga ndauh ope lenga Abraham lahir.​—Johanes 8:​56-58.

Merawa kel kalak Jahudi megi si e. Iusahaken kalak e mbenteri Jesus alu batu. Tapi kiam Jesus janah la kena kai pe.