Sanga Jesus i deher Jerusalem denga, rehen kalak Jahudi ndahi ia. Piga-piga kalak nggit megiken ajarenna, tapi lit ka si atena nguji ia. Sekalak i bas kalak e nari eme ahli Undang-Undang Musa nungkun man Jesus, “O Guru, kai si arus kulakoken gelah ndatken kegeluhen si rasa lalap?”​—Lukas 10:25.

Iteh Jesus maka dilaki e nungkun labo guna meteh jawapenna, tapi banci saja atena gelah ibere Jesus jawapen si erban megelut akap kalak Jahudi. Situhuna nggom lit pendapat dilaki e, emaka la mis ijawap Jesus. Alu cara si pentar, iban Jesus gelah ijawap dilaki e menurut pendapatna.

Nungkun Jesus, “Kai kin si tertulis i bas Undang-Undang Musa? Kai si iangkaindu?” Iangkai dilaki e Undang-Undang Musa, emaka ibelaskenna ayat arah Ulangen 6:5 ras Imamat 19:​18. Nina, “‘Arus ikelengindu Jahwe Dibatandu alu kerina kegeluhenndu, pusuhndu, gegehndu, ras perukurenndu,’ ras ‘kalak si deban bagi dirindu sendiri.’” (Lukas 10:​26, 27) Bage kin jawapenna?

Nina Jesus man bana, “Tuhu jawapenndu ena. Teruslah lakoken e janah datndu kari kegeluhen.” Ngayak je saja kin kalak e ngerana? La puas dilaki e megi jawapen Jesus. Setuju min atena Jesus nandangi carana rukur bage pe carana erurusen ras kalak si deban gelah banci ‘ibuktikenna dirina benar.’ Emaka nina ka man Jesus, “Ise dage si arus kukelengi?” (Lukas 10:​28, 29) Tempa biasa saja penungkunen e tapi situhuna lang. Engkai?

Menurut kalak Jahudi, si igelari “teman” eme si ndalanken adat Jahudi saja. Iakap kalak e Imamat 19:18 setuju ras cara rukur si bage. Lit ka kalak Jahudi si erpengakap “la banci” erteman ras kalak arah bangsa si deban. (Perbahanen Rasul-Rasul 10:28) Emaka dilaki e, ras banci saja piga-piga pengikut Jesus pe erpengakap maka arus mehuli man kalak Jahudi, tapi man si labo kalak Jahudi banci ate-atena saja perbahanenna perban kalak e labo “teman” situhu-tuhu iakapna.

Uga Jesus nampatisa gelah benar cara kalak e rukur janah la erban dilaki e ras kalak Jahudi si deban megelut? Cerita me Jesus, “Sekalak dilaki lawes arah Jerusalem nari ku Jeriho. I bas dalan, irampok kalak ia, ibuatna kerinana, ipekpekina ia, jenari lawes perampok e, itadingkenna ia menam mate. Rembang lewat sekalak imam arah dalan e, tapi sanga idahna ia, isilahkenna, jenari iteruskenna perdalanenna. Bage ka pe sekalak Lewi, sanga seh ia bas ingan e, idahna ia, isilahkenna ka, jenari iteruskenna perdalanenna. Tapi sanga lewat kalak Samaria arah dalan e janah idahna ia, mekuah atena.”​—Lukas 10:​30-​33.

Pasti iteh dilaki ndai maka nterem imam ras kalak Lewi si tading i Jeriho janah ngelayani i rumah pertoton. Muat mulih arah rumah pertoton nari arus ilewati kalak e dalan 23 kilometer dauhna. Bahaya kel ngelewati dalan e perban lit perampok si cebuni i je. Bicara lit sekalak imam ras kalak Lewi ngidah temanna si kalak Jahudi merluken penampat, nggit nge kalak e nampatisa? I bas cerita e, la nggit kalak e nampatisa. Tapi si nampati kalak Jahudi e, eme kalak Samaria, si ianggap kalak Jahudi hina.​—Johanes 8:​48.

Uga kalak Samaria nampati kalak Jahudi e? Nina Jesus, “Ideherina ia, itamana minak ras anggur ku luka-lukana, janah ibalutina. Kenca si e, iangkatna ia ku keledena jenari ibabana ku penginapen ras irawatna. Pepagina, iberena dua dinar man pengurus penginapen, janah nina, ‘Rawatlah ia, adi la kari bias enda, kugalari kari kenca aku reh.’”​—Lukas 10:​34, 35.

Kenca dung cerita, Jesus, eme Guru si Pentar, nungkun man dilaki ndai, “Adi menurutndu, ise i bas kalak si telu enda si ngkelengi kalak si irampok ndai?” Banci saja la nggit dilaki e njawap “kalak Samaria,” emaka nina, “Kalak si rate mekuah man bana.” Arah cerita e iban Jesus jelas kai si arus ilakoken, nina “Laweslah janah ban ka lah bage.”​—Lukas 10:​36, 37.

Mejile kel cara Jesus ngajar! Adi mis ikataken Jesus man dilaki e maka kalak arah bangsa si deban pe temanna ka, nggit nge dilaki e ras kalak Jahudi si debanna si lit i je ngaloken ajaren Jesus? Banci saja lang. Tapi, ibere Jesus cerita si menukah iangkai ertina. Alu bage banci ijawap kalak e sendiri penungkunen, “Ise dage si arus kukelengi?” Jelas me, teman situhu-tuhu eme kalak si mbuktiken kekelengenna ras lias atena bagi si iperentahken Kitap si Badia.