I bas wari Sabat, Jesus i Jerusalem denga. Sanga erdalan ia ras murid-muridna, idah kalak e sekalak pemindo-mindo si pentang mulai kin lahirna nari. Nungkun murid-murid man Jesus, “O Guru, dosa ise nge si erbanca ia pentang mulai lahirna nari? Dosana ntah dosa orang tuana?”​—Johanes 9:2.

Banci saja, tersungkun-sungkun murid-murid kerna banci ntah lang sekalak jelma nggo erdosa sanga i bas beltek denga. Ijawap Jesus, “Ia pentang labo perban dosana ntah pe dosa orang tuana. Tapi gelah erkelangken ia, teridah me perbahanen Dibata.” (Johanes 9:3) Emaka dilaki e pentang labo perban dosana ntah pe dosa orang tuana. Tapi erkiteken dosa Adam, kerina jelma si lahir lanai sempurna, emaka banci saja lahirna nari pe nggo cacat. Mekuah kel ate dilaki e, tapi si enda jadi kesempaten man Jesus guna ngelakoken dahin Dibata, bali bagi si ilakokenna guna mpepalem kalak si sakit.

Iingetken Jesus uga pentingna ngelakoken si e alu ngataken, “Sanga ciger denga wari, arus sidahiken pendahin Si nuruh aku, sebap reh me berngi janah paksa si e ise pe la banci erdahin. Sanga aku i bas doni enda denga, aku kap terang doni.” (Johanes 9:4, 5) Kentisik nari Jesus mate, tempa-tempa lit i bas kuburen si gelap, janah la banci ngelakoken kai pe. Emaka sanga ia nggeluh denga, ia kap sumber terang man doni.

Ipepalem Jesus nge dilaki e? Ue. Ercidur Jesus ku taneh, icampurna taneh e ras cidurna, ibanna e jadi salep mata. Jenari, itamakenna ku mata dilaki e janah nina, “To cucilah matandu i kolam Siloam.” (Johanes 9:7) Ilakokenna janah dungna erpengidah ia. E me tangtangna ia banci ngidah! Pasti meriah kel akapna!

Luar biasa kel iakap tetanggana bage pe kalak si deban si nandai dilaki e, tersungkun-sungkun kalak e, “La kin ia dilaki si biasa kundul mindo-mindo?” Piga-piga kalak ngatakenca, “Ue, ia me kalakna.” Tapi si la tek ngataken, “Labo, mirip saja nge.” Tapi dilaki si nggo erpengidah e ngataken, “Ue, aku kap jelmana.”​—Johanes 9:​8, 9.

Emaka isungkun kalak e ia, “Uga maka kam banci erpengidah?” Ijawapna, “Dilaki si gelarna Jesus, iadukna taneh ras cidurna, jenari itamakenna ku mataku, janah nina, ‘To cucilah matandu i kolam Siloam.’ Emaka lawes aku janah kucuci mataku, jenari nggo banci aku erpengidah.” Isungkun kalak e, “I ja dage ia?” Ijawapna, “La kuteh.”​—Johanes 9:​10-​12.

Ibaba kalak e me dilaki e ndahi kalak Parisi si merhat ka meteh uga ia banci erpengidah. Ngaloi dilaki e, “Lit si itamakenna ku mataku, jenari kucuci mataku, janah dungna nggo banci aku erpengidah.” La senang akap kalak Parisi ngenen pemindo-mindo e nggo erpengidah, malahen ipandangi kalak e Jesus alu ngataken, “Ia labo arah Dibata nari perban la ipatuhina wari Sabat.” Si deban ngataken, “I ja nge banci kalak si erdosa erban mukjizat si bage!” (Johanes 9:​15, 16) Emaka la seri pendapat kalak e.

Emaka mis isungkun kalak e dilaki si gundari nggo erpengidah e, “Enggo ibanna kam erpengidah, jadi uga pendapatndu kerna ia?” Alu la ragu-ragu, ijawap dilaki e, “Ia sekalak nabi.”​—Johanes 9:​17.

La nggit kalak Jahudi tek kerna si e. Banci jadi, curiga ka kalak e maka ersada arih Jesus ras dilaki e nipu jelma si nterem. Emaka arus akap kalak e nungkun man orang tua dilaki si pentang e guna meteh tuhu ntah lang anakna e pentang mulai kin lahirna nari.