Enggo melala cara ipake Jesus gelah iukuri jelma si nterem uga hubungenna ras Dibata. Sekali enda pe ngajar ka Jesus i lebe-lebe rumah kalak Parisi.

Piga-piga kalak ncakapken kerna sada kejadin. Si icakapken kalak e kerna “kalak Galilea si ibunuh [Gubernur] Pilatus sanga kalak e mereken korban.” (Lukas 13:⁠1) Kai maksud kalak e?

Ibuat Pilatus sen arah rumah pertoton guna mbangun paleren lau ku Jerusalem. Banci saja sen e idatna perban isampati si erdahin i rumah pertoton e. Ribun kalak Jahudi la setuju ras protes nandangi Pilatus, banci saja paksa si e me kalak Galilea e ibunuh. Kalak si ncakapken kerna si e erpengakap maka kalak Galilea ndai mate perban dosana. Tapi Jesus la setuju kerna si e.

Nungkun Jesus, “Erkiteken si enda terjadi man kalak Galilea, akap kena kin keleken dosana asangken kerina kalak Galilea si debanna?” Nina Jesus lang. Arah kejadin e, ipersingetina kalak Jahudi, nina, “Adi la kin kena ertobat, kerina kena pagi kernep ka bagi kalak e.” (Lukas 13:​2, 3) Icakapken Jesus ka kerna kejadin si deban si mbaru denga terjadi janah lit hubungenna ras pembangunen paleren lau e, nina:

“Uga kerna 18 kalak si mate perban idabuhi menara Siloam, akap kena kin belinen kesalahen kalak e asangken kerina kalak si debanna si tading i Jerusalem?” (Lukas 13:4) Mungkin kalak e erpengakap maka kalak e mate perban dosana sekalak-sekalak. Enda pe la isetujui Jesus. Itehna maka si e terjadi perban “kerina nge kalak banci kena sial.” (Pengerana 9:​11) Arusna ibuat kalak e pelajaren arah kejadin e nari. Nina Jesus, “Adi la kena ertobat, kerina kena pagi kernep ka bagi kalak e.” (Lukas 13:5) Engkai maka icakapken Jesus kerna si e gundari?

E lit hubungenna ras pelayanen si ilakokenna gundari, janah ikatakenna i bas perumpaman, “Lit me sekalak dilaki si mpuna batang ara i kebun anggurna, janah reh ia ndarami buahna tapi la lit datna kai pe. Jenari nina man si erdahin kebun e, ‘Enggo telu tahun aku reh ndarami buah ara i bas batangna enda, tapi la lit kudat. Tabah sajalah! La lit ertina ia turah i je.’ Ngaloi si erdahin e, ‘O Tuan, pediat ia turah sada tahun nari. Kukurak kari taneh si lit i sekelilingna janah kutama pupuk. Adi erbuah kari ia, merandal. Tapi adi lang, sitabah saja.’”​—Lukas 13:​6-9.

Enggo lebih telu tahun dekahna icubaken Jesus mpebelin kiniteken kalak Jahudi, tapi sitik denga ngenca si jadi murid-muridna janah kalak e ikataken asil arah kerja kerasna. Gundari tahun peempatken i bas pelayanenna, reh tutusna ate Jesus ndahiken dahinna. Erberita janah ngajar ia i Judea ras Perea, bali bagi ngkurak ras namaken pupuk i sekeliling batang ara Jahudi. Kai asilna? Sitik ngenca kalak Jahudi si ngalo-ngalo. Teremen arah bangsa e la nggit ertobat janah ikernepken me pagi.

La ndekah kenca si e, i bas wari Sabat, teridah ka perbahanen kalak e si erpenulak. Jesus sangana ngajar bas ingan pulung kalak Jahudi. Idahna sekalak diberu si nggo mbengkong 18 tahun dekahna perban irasuki malekat jahat. Mekuah ate Jesus ngidahsa, nina, “Ibebasken kam i bas penakitndu nari.” (Lukas 13:12) Itamaken Jesus tanna ku diberu e, janah mis pinter dagingna jenari imuliakenna Dibata.

Ngidah si e, merawa kepala ingan pulung e, nina, “Lit enem wari guna erdahin, i jelah kena reh ras ipepalem, ula bas wari Sabat.” (Lukas 13:14) Tek kepala e maka lit kuasa Jesus guna mpepalem, tapi isalahkenna kalak si reh guna ipepalem i bas wari Sabat! Ijawap Jesus alu masuk akal, “O kalak munapik, i bas wari Sabat, la kin ipulahi kena lembu ntah pe kelede kena i bas karangna nari janah ibaba kena gelah ibere minem? Apai ka diberu enda, ia kesusuren Abraham janah nggo 18 tahun ia iiket Setan, me patut ia ipulahi arah iketen e nari bas wari Sabat?”​—Lukas 13:​15, 16.

Mela iakap kalak si ngelawan Jesus ndai, tapi jelma si nterem meriah akapna ngidah mukjizat si iban Jesus. Kenca si e, iulihi Jesus nceritaken dua perumpaman kerna Kerajan Dibata, si pernah iceritakenna arah perahu i Lawit Galilea.​—Matius 13:​31-​33; Lukas 13:​18-​21.