Gundari, akhir tahun 32 M, kira-kira telu tahun kenca Jesus iperidiken. Edenga irayaken Jesus ras murid-muridna Wari Raya Sapo-Sapo i Jerusalem. Banci saja kalak enda lit denga i deher kota e. (Lukas 10:38; Johanes 11:1) Tading enem bulan nari waktu pelayanen Jesus, janah banci saja waktu e ipakena guna erberita i Judea ntah i Perea si lit i sebrang Lau Jordan. Kalak si lit i jah pe perlu megiken berita si meriah.

Kira-kira dua tahun si lewat, kenca Paskah tahun 30 M, piga-piga bulan erberita Jesus i Judea. Kenca si e, lawes ia ku Galilea ngelewati Samaria. Sanga Paskah tahun 31 M, iusahaken kalak Jahudi i Jerusalem munuh Jesus. Emaka sedekah sada setengah tahun kenca si e, rusuren Jesus ngajar i Galilea bagin utara janah nterem kalak jadi pengikutna. I Galilea, ibere Jesus pelatihen man rasul-rasulna, janah nina, “Sanga kena erberita, kataken, ‘Kerajan surga nggo ndeher.’” (Matius 10:​5-7) Gundari, isuruhna ka atena muridna erberita i Judea.

Guna si e, ipilih Jesus 70 murid, jenari isuruhna kalak e lawes dua-dua. Emaka lit 35 pasang perberita Kerajan i daerah e. I je, “mbelang man peranin, tapi kurang si erdahin.” (Lukas 10:2) Leben 70 murid e lawes ku ingan-ingan si nandangi idahi Jesus. Kalak e isuruh mpepalem kalak sakit janah meritaken berita si meriah.

La isuruh Jesus kalak e ngajar i bas ingan-ingan pulung kalak Jahudi, tapi ku rumah-rumah. Nina Jesus, “Ku rumah ise pe kena masuk, kataken lebe, ‘Mbera lit kedamen bas rumah enda.’ Adi lit si ngarapken dame i je, tading me kedamen kena bas ia.” Kai si man pesehen kalak e? Nina Jesus, “Kataken bana, ‘Kerajan Dibata nggo ndeher.’”​—Lukas 10:​5-9.

Perentah si ibereken Jesus man 70 muridna mirip ras perentah si iberekenna man 12 rasulna kira-kira setahun si lewat. Ibere Jesus penginget maka labo kerina jelma ngaloken kalak e. Tapi, usaha kalak enda banci erban kalak si tutus nggit ngaloken Jesus janah erlajar i bas ia nari.

La ndekah kenca si e, mulih me si 70 kalak ndai alu ermeriah ukur, nina, “O Tuan, malekat-malekat jahat pe patuh man kami sanga igunaken kami gelarndu.” Meriah kel ukur Jesus megi si e, janah nina, “Kuidah Setan nggo ndabuh bagi kilat i langit nari. Enggo kubereken man kena kuasa guna merjaki nipe ras kacip gelang.”​—Lukas 10:​17-19.

Ibere Jesus jaminen man pengikutna maka banci nge iadapi kalak e erbage-bage bahaya tempa-tempa merjaki nipe ras kacip gelang. Ijamin Jesus ka maka i bas wari si pepagi, Setan ipelawes janah ndabuh i bas surga nari. Ikataken Jesus man 70 murid e, aminna pe kalak e banci ngelakoken si luar biasa, lit si lebih ­penting asangken si e, nina, “Aminna pe bage, ula ermeriah ukur perban malekat-malekat jahat e patuh man kena, tapi ermeriah ukurlah perban gelar kena nggo itulis i surga.”​—Lukas 10:20.

Meriah kel ukur Jesus janah ipujina Bapakna i lebe-lebe jelma si nterem, erkiteken nggo ibereNa kuasa si luar biasa man murid-muridna kalak si biasa-biasa saja. Kenca si e, itulihkenna ku murid-murid, nina, “Ermeriah ukur me kalak si ngidah kai si idah kena. Situhuna, nterem nabi bage pe raja, merincuh ngidah kai si idah kena gundari e, tapi la banci, janah merincuh kalak e megi kai si ibegi kena, tapi la banci.”​—Lukas 10:​23, 24.