Edenga iulihi Jesus ajarenna kerna toto, tapi labo e saja ngenca ajaren si pernah iulih-ulihina sedekah ia ngelayani. Sanga mbarenda Jesus i Galilea, Jesus ituduh ngelakoken mukjizat alu penampat penguasa malekat-malekat jahat. Gundari i Judea, bage ka me si terjadi.

Sanga ipelawes Jesus malekat jahat si erban sekalak dilaki lanai banci ngerana, luar biasa akap jelma si nterem. Tapi si nentang Jesus nuduh ia, nina, “Ipelawesna malekat-malekat jahat alu penampat Balsebul, penguasa malekat jahat e.” (Lukas 11:15) Lit ka si atena nguji Jesus, emaka ipindo kalak e Jesus erban tanda ntah pe mukjizat arah surga.

Iteh Jesus maka kalak e nguji ia ngenca, emaka ijawap Jesus kalak e bali bagi njawap kalak si mandangi ia i Galilea. Ikatakenna kai si masuk akal, eme kerajan si terpecah pasti kernep. Isungkunna, “Adi Setan ngelawan dirina sendiri, terpecah-pecah kap ia. Uga kerajanna e banci ipertahanken?” Nina Jesus ka, “Adi alu penampat jari Dibata aku mpelawes malekat jahat, e tandana Kerajan Dibata nggo tuhu-tuhu reh alu la isadari kena.”​—Lukas 11:​18-​20.

Sanga ikataken Jesus “jari Dibata,” banci saja kalak si lit i je nginget bangsa Israel paksa jaman Musa. Kenca kalak si lit i bas istana Paro ngidah Musa ngelakoken mukjizat, nina kalak e, “Jari Dibata kap e!” Selain si e, Sepuluh Perentah si lit i bas dua papan batu e, “jari Dibata” ka si nulissa. (Keluaren 8:​19, NW; 31:​18, NW) “Jari Dibata” eme kesah si badiaNa, janah kesah e si erban Jesus banci mpelawes malekat jahat, bage pe mpepalem kalak sakit. Erkiteken Jesus e calon Raja Kerajan Dibata janah nggo ilakokenna erbage-bage mukjizat, banci ikataken maka Kerajan Dibata nggo lit i tengah-tengah kalak e.

Ngasup Jesus mpelawes malekat-malekat jahat jadi bukti maka ndauh belinen kuasa Jesus asangken Setan. Bali bagi si ikataken Jesus maka sada rumah banci ikuasai sekalak jelma adi gegehen ia asangken si njagai rumah e. Iulihi Jesus ka perumpamanna kerna malekat jahat si ndarat arah sekalak dilaki. Adi ipediat dilaki e dirina rusur lolah janah la ngukuri kai si mehuli, reh ka mulihi malekat jahat e radu ras pitu malekat jahat si debanna. Dungna, nggo reh kelekna keadan dilaki e asangken si nggona. (Matius 12:​22, 25-​29, 43-​45) Bage me si terjadi man bangsa Israel paksa jaman Jesus.

Lit sekalak diberu si megiken Jesus, janah ikatakenna, “Ermeriah ukurlah diberu si melahirken ras mpepinemken kam!” Diberu-diberu kalak Jahudi merhat kel jadi nande sekalak nabi, apai ka jadi nande Mesias. Emaka, banci saja iakap diberu e pasti meriah kel ukur Maria jadi nande Jesus, Guru si Pentar. Tapi nina Jesus, “Lang, tapi ermeriah ukur me kalak si megiken kata Dibata ras ndalankenca!” (Lukas 11:​27, 28) La pernah ikataken Jesus maka Maria arus ipuji-puji ntah pe ihamati lebih asangken si debanna. Sekalak jelma ermeriah ukur labo erkiteken lit hubungen perkade-kadenna ntah pe perban beluhna, tapi erkiteken ngelayani Dibata alu setia.

Bali bagi i Galilea, gundari ipersingeti Jesus kalak e perban ipindo kalak e tanda arah surga. Ikataken Jesus maka la lit tanda kai pe si ibereken selain “tanda Juna.” Juna jadi tanda sanga ia lit bas beltek ikan sedekah telu wari. Juna pe jadi tanda perban erberita ia alu pang seh maka nggit kalak Niniwe ertobat. Jenari ikataken Jesus kerna dirina, “Situhuna, i jenda lit si belinen asangken Juna.” (Lukas 11:​29-32) Aminna pe Salomo seh kel pentarna seh maka reh ratu i selatan nari, Jesus tetap belinen asangken Salomo.

Nina Jesus ka, “Kenca lampu ipegeluh, labo itamaken kalak i bas ingan si terbuni ntah pe i teruh tumba, tapi i bas ingan lampu.” (Lukas 11:33) Bali bagi namaken lampu i ingan si terbuni, banci saja la lit gunana iakap Jesus ia ngajar ras ngelakoken mukjizat i lebe-lebe kalak e, sebap kalak e la ngangkai mukjizat e erkiteken la terang pengidah kalak e.​—Lukas 11:34.

Edenga ipelawes Jesus malekat jahat ras ipepalemna dilaki si mbarenda la banci ngerana. Tapi, la tersuruh ukur kalak si nentang Jesus guna muji Dibata ras mpebetehken man kalak kerna kai si ilakoken Jahwe. Emaka ibereken Jesus penginget, “Erkiteken si e, hati-hatilah gelah terang si lit i bas kam e labo kegelapen. Emaka, adi kerina dagingndu terang janah la lit baginna si gelap, kerinana jadi terang bali bagi sanga kam iterangi lampu.”​—Lukas 11:​35, 36.