Gundari, lawes Jesus ku Jerusalem guna ikut Perayan Mengket. Perayan e mperingeti mulihi acara mengket rumah pertoton. Enggo lebih seratus tahun si lewat, ibangun Raja Antiokhus IV Epifanes arah Siria nari batar-batar i datas batar-batar si mbelin i rumah pertoton. Dungna, ikuasai anak-anak arah sekalak imam Jahudi mulihi Jerusalem, janah rumah pertoton e imengketi mulihi man Jahwe. Kenca si e, acara mengket e irayaken tiap tahun tanggal 25 Khislew. Bulan Khislew imulai arah akhir bulan Nopember seh asa awal Desember.

Sanga si e musim mbergeh, janah Jesus sangana erdalan i Serambi Salomo bas rumah pertoton. Jenari ikelilingi kalak Jahudi me Jesus, janah nina, “Asa ndigan nge ipediatndu kami tersungkun-sungkun? Adi Kristus kin kam, kataken man kami alu terus terang.” (Johanes 10:​22-​24) Ngaloi Jesus, “Enggo kukataken man kena, tapi la kena tek.” Memang la pernah mis ikataken Jesus man kalak e maka ia kap Kristus, bagi si ikatakenna man diberu Samaria i deher sumur. (Johanes 4:​25, 26) Tapi pernah ikatakenna man kalak e, “Ope lenga Abraham lit, aku nggo lit.”​—Johanes 8:​58.

Enggo melala ilakoken Jesus si sue ras nubuat kerna Kristus, ate Jesus min gelah kalak e sendiri si ngataken maka ia Kristus. Eme sebapna rusur ilarang Jesus murid-muridna ngataken man kalak si deban maka ia Mesias. Tapi gundari, alu terus terang ikataken Jesus man musuh-musuhna, “Pendahin si kulakoken i bas gelar Bapakku, e me si mere kesaksin kerna aku. Tapi la kena tek.”​—Johanes 10:​25, 26.

Engkai kalak e la tek? Nina Jesus, “La kena tek perban kena labo biri-biriku. Biri-biriku megiken soraku. Kutandai kalak e, janah ikutkenna aku. Kubereken man biri-biri e kegeluhen si la erkeri-kerin. Labo pagi ia ikernepken janah labo ise pe si ngerampok ia i bas tanku nari. Kai pe si ibereken Bapakku man bangku, ergan asangken kerina si debanna.” Ikataken Jesus ka kerna uga rembakna ia ras Bapakna, nina, “Aku ras Bapak sada kap.” (Johanes 10:​26-​30) Jesus sangana i doni, janah Bapakna i surga, emaka maksudna eme hubungenna si rembak kel janah sada tujunna.

Ranan Jesus e erban merawa kel kalak Jahudi, emaka sekali nari ibuat kalak e batu guna mbenteri ia. Tapi Jesus la mbiar, janah nina, “Enggo kucidahken man kena melala pendahin si mehuli i bas Bapak nari. Pendahin si apai si erbanca maka ibenteri kena ate kena aku alu batu?” Ngaloi kalak Jahudi, “Ibenteri kami kam labo perban pendahin si mehuli, tapi perban ihinandu Dibata. . . . Ijadikenndu dirindu dibata.” (Johanes 10:​31-​33) La pernah ikataken Jesus maka dirina dibata. Engkai maka ia ituduh bage?

Perban ikataken Jesus lit kuasana si menurut kalak Jahudi e kuasa Dibata ngenca. Misalna, ikataken Jesus maka iberekenna pagi “kegeluhen si la erkeri-kerin” man biri-birina, enda me pemere si la banci ibereken manusia biasa. (Johanes 10:28) La diate kalak Jahudi sanga Jesus ngerana alu terus terang ngataken maka ialokenna kuasa arah Bapakna.

Isimbak Jesus tuduhen kalak e, nina, “Lit tertulis i bas undang-undang kena [i bas Masmur 82:6], ‘Nina Dibata, “Kena me dibata-dibata.”’ . . . Adi i bas ayat, Dibata nggelari kalak si nentang selaku ‘dibata-dibata,’ cocok kin ikataken kena man bangku selaku kalak si ipebadiaken Bapak janah si isuruhNa ku doni, ‘Ihinandu kap Dibata,’ padahal si kukataken, ‘Aku Anak Dibata’?”​—Johanes 10:​34-​36.

Payo, hakim manusia si la adil pe igelari Kitap si Badia selaku “dibata-dibata.” Engkai maka kalak Jahudi merawa sanga ikataken Jesus, “Aku Anak Dibata”? Jenari nina Jesus, “Adi la kin dahin si ibereken Bapak si kulakoken, ula kena tek man bangku. Tapi adi kulakoken dahin e, aminna pe kena la tek man bangku, teklah kena man pendahin e. Alu bage, iangkai kena janah banci reh mbagesna pengangkan kena maka Bapak ersada ras aku janah aku ersada ras Bapak.”​—Johanes 10:​37, 38.

Megi si e, iusahaken kalak Jahudi nangkap Jesus, tapi kiam ka Jesus. Itadingkenna Jerusalem janah lawes ia, isebrangina Lau Jordan ku ingan Johanes mperidiken kalak kira-kira empat tahun si lewat. Banci saja ingan e la ndauh arah tepi selatan Lawit Galilea.

I je nterem kalak reh ndahi Jesus, janah nina kalak e, “Sada pe la lit iban Johanes mukjizat, tapi kerina si ikatakenna kerna dilaki enda tuhu.” (Johanes 10:41) Emaka nterem kalak Jahudi si erkiniteken man Jesus.