Sanga man Jesus i rumah sekalak Parisi, lit ribun kalak nimai i darat. E bali bagi si terjadi i Galilea. (Markus 1:​33; 2:2; 3:9) Gundari i Judea, nterem kalak si jumpa atena ras Jesus guna megiken ia. Beda kel kalak e ras kalak Parisi si man ras Jesus.

Tangtangna, ikataken Jesus man murid-muridna kerna kai si nggo pernah ikatakenna. Nina, “Hati-hatilah nandangi ragi kalak Parisi, eme sipatna si munapik.” Iulihi Jesus persinget enda perban sanga man ndai idah Jesus maka seh kel munapikna kalak Parisi e. (Lukas 12:1; Markus 8: 15) Banci saja iusahaken kalak Parisi kel muniken kejahatenna alu tempa-tempa badia. Tapi si e la banci terus ibuniken, emaka nina Jesus, “Kerina si tertutup alu rapat terbuka nge pagi, janah kerina rahasia tereteh nge pagi.”​—Lukas 12:2.

Banci saja, teremen kalak si lit i je eme kalak Judea si lenga pernah megiken ajaren Jesus i Galilea. Emaka iulihina piga-piga inti ajarenna. Nina Jesus, “Ula kena mbiar man kalak si banci munuh daging tapi kenca si e kai pe la banci ilakokenna.” (Lukas 12:4) Iulihi Jesus ka maka pengikutna arus tek maka Dibata nggit nampati ras mere keperlun kalak e. Arus ka iakui pengikutna maka Jesus kap Tuan kalak e.​—Matius 10:​19, 20, 26-​33; 12:​31, 32.

Rempet lit sekalak dilaki i bas jelma si nterem e mindo man Jesus, “O Guru, suruhlah seninaku erbagi warisen ras aku.” (Lukas 12:13) Peraturen i bas Undang-Undang Musa nggo jelas maka lit hak anak sintua ngaloken warisen dua kali lipat, emaka la perlu ersoal kerna si e. (Ulangen 21:17) Banci saja dilaki enda merhat ngaloken terbuen warisen. La ibela Jesus si apai pe, tapi isungkunna ka, “Ise si ngangkat aku jadi hakim ntah pe jadi kelang-kelang i bas kena duana?”​—Lukas 12:14.

Ingetken Jesus kerina kalak e, “Teruslah buka mata kena janah hati-hatilah nandangi erbage-bage kerangapen, sebap aminna pe sekalak jelma melala ertana, kegeluhenna labo asil arah kai si lit i bas ia.” (Lukas 12:15) Uga buena pe erta sekalak jelma, lit nge waktuna pagi pasti ia mate janah itadingkenna ertana. Iceritaken Jesus ka perumpaman si ncidahken maka ergan kap gelar si mehuli i lebe-lebe Dibata:

“Lit sekalak dilaki si bayak, melala kel asil jumana. Emaka mulai ia rukur, ‘Lanai lit ingan mpepulung asil peraninku, jadi kai nge si arus kulakoken gundari?’ Nina ka, ‘Enda si kulakoken: Kusontarken saja lumbung-lumbungku, jenari kubangun tergalangen. I je kari kupepulung kerina gandumku ras barang-barangku, janah ningku man bangku: “Enggo melala barang-barangndu si mehuli si banci kari ertahun-tahun inanamindu. Pesenanglah bandu, man, minem, janah ermeriah-meriahlah.”’ Tapi nina Dibata bana, ‘O kalak si la masuk akal! I bas berngi enda, bene me kesahndu. Adi bage, man ise kari kerina si ipepulungndu e?’ Bage me jadina kalak si mpepulung erta man dirina, tapi la bayak i lebe-lebe Dibata.”​—Lukas 12:​16-​21.

Murid-murid bage pe kalak si megiken Jesus si deban banci saja tergoda guna mpepulung erta. Ntah, banci saja ilayani kalak e Jahwe tapi la alu bulat ukur perban kuatir nandangi keperlun geluh. Emaka iulihi Jesus nasehat si mejile si iberekenna sada tahun setengah si lewat i bas Kotbahna i Deleng:

“Ula nari kena kuatir kerna kegeluhen kena, kerna kai si ipan kena, kerna daging kena ntah kerna kai si ipake kena. . . . Perdiateken min perik kak: La ia nuan benih ntah pe rani, la lit lumbungna ntah pe gudangna, tapi ibere Dibata ia man. La kin kena ndauh ergan asangken perik-perik e? . . . Perdiatekenlah perturah bunga-bunga: La ia erdahin, la ia njait, Salomo si seh kel muliana pe, pakenna la bagi salah sada bunga e jilena. . . . Emaka ula nari kena kuatir kerna kai kari si ipan kena, ras kai kari si inem kena. Ula nari kena kuatirsa. . . . Iteh Bapak kena maka iperluken kena kerina e. . . . Teruslah darami KerajanNa, janah kerina enda ibereken kari man kena.”​—Lukas 12:​22-​31; Matius 6:​25-​33.

Ise pagi si terus ndarami Kerajan Dibata? Nina Jesus eme “rarasen si kitik,” eme kalak si erkiniteken si teremna 144.000 saja. Kai si ialoken kalak e? Nina Jesus, “Nggo meriah ukur Bapak kena mere Kerajan man kena.” Kalak e la ngayaki erta si banci itangko ntah bene. Tapi iusahaken kalak e ndatken “erta si i surga si la banci keri,” sebap i je me ingan kalak e merentah pagi ras Kristus.​—Lukas 12:​32-​34.