Enggo ijelasken Jesus maka “rarasen si kitik” ngenca si pagi merentah i bas Kerajan surga. (Lukas 12:32) Pasu-pasu si luar biasa e arus iergai kalak e. Ikataken Jesus maka penting kel gelah ula kalak e tertaren-taren, alu bage banci jadi bagin i bas Kerajan.

Ate Jesus min murid-muridna nggo ersikap ngalo-ngalo ia sanga ia mulih. Nina, “Erbajulah ras ersikaplah, janah pastikenlah lampu kena tetap gara. Kena arus bagi kalak si nimai tuanna mulih i bas pesta perjabun nari, alu bage sanga ia reh janah ituktukna pintu, banci mis italangi kalak e. Ermeriah ukur me budak-budak si paksa tuanna reh, idapetina kalak e erjaga-jaga!”​—Lukas 12:​35-​37.

Arah perumpaman e, minter iangkai murid-murid uga arusna perbahanenna si sue ras si iarapken Jesus. Iceritaken Jesus kerna budak-budak si nggo ersikap nimai kerehen tuanna. Nina Jesus, “Janah adi reh ia [tuan] i bas giliren jaga si peduaken [kira-kira jam siwah berngi seh tengah berngi], ntah pe si peteluken [mulai tengah berngi seh kira-kira jam telu erpagi-pagi], idapetina kalak e nggo ersikap, ermeriah ukur me kalak e!”​—Lukas 12:38.

Enda labo nasehat gelah jadi si erdahin si rajin saja. I bas perumpaman e, lit ka iceritaken kerna Anak manusia eme Jesus. Ikataken Jesus man murid-muridna, “Kena pe, tetaplah ersikap, sebap Anak manusia pe reh i bas jam si la isangka kena.” (Lukas 12:40) Emaka i bas wari si pepagi, reh me Jesus, janah pengikut-pengikutna, terutama “rarasen si kitik,” arus nggo ersikap.

Merhat Petrus ngangkai alu jelas kai maksud Jesus, emaka isungkunna, “O Tuan, man kami saja nge ikatakenndu perumpaman enda ntah man kerina jelma ka nge?” Guna njawap si e, iceritaken Jesus ka perumpaman si deban, nina, “Ise situhuna pengurus si setia, si pentar, si ipilih tuanna ngurus pelayan-pelayan rumahna guna terus mereken pangan man kalak e i bas waktu si tepat? Ermeriah ukur me budak e adi sanga tuanna reh, idapeti tuanna ia ngelakoken pendahinna! Situhuna, ipilih tuanna kari ia ngurus kerina erta-ertana.”​—Lukas 12:​41-​44.

‘Tuan’ si imaksud eme Jesus, Anak manusia. Janah, “pengurus si setia” eme piga-piga anggota i bas “rarasen si kitik” nari, si pagin ibereken man bana Kerajan. (Lukas 12:32) Ikataken Jesus maka pengurus e ‘terus mereken pangan si bias i bas waktu si tepat’ man “pelayan-pelayan rumahna,” bali bagi Jesus mereken pangan rohani man Petrus ras murid si deban. Duana perumpaman e ncidahken maka Anak manusia nandangi reh i bas wari si pepagi. Paksa si e pagi, idah Jesus me pengurus si setia e ngelakoken dahinna, eme mereken pangan rohani man “pelayan-pelayan rumah” eme si ngikutken Jesus.

Kenca si e, ingetken Jesus murid-muridna gelah njaga perukuren ras perbahanenna. Adi la kalak e hati-hati, banci ka imusuhi kalak e turang seninana. Nina Jesus, “Tapi bicara nina budak e i bas ukurna, ‘Tuanku ndekah denga reh,’ jenari mulai ipekpekina pelayan-pelayan si dilaki ras si diberu, kenca si e man ras minem ia ngayak mabuk, reh me tuan budak ndai i bas wari si la isangkana ras i bas jam si la itehna, janah seh kel beratna kari ibanna ukumen kalak e janah ipersadana kari ia i bas ingan kalak si la setia.”​—Lukas 12:​45, 46.

Ikataken Jesus maka ia reh “guna mpegara api i bas doni.” Terjadi me si e. Ajaren Jesus mbuktiken maka ajaren ras kebiasan jelma si nterem e la tuhu, janah si e dungna erban kalak rubati ras lanai ersada, sebap “bapak ngelawan anakna si dilaki janah anak si dilaki ngelawan bapakna, nande ngelawan anakna si diberu janah anak si diberu ngelawan nandena, bibi simetua ngelawan permenna janah permen ngelawan bibi simetuana.”​—Lukas 12:​49, 53.

Kerina si ikataken Jesus ndai ikatakenna terutama man murid-muridna. Kenca si e, ngerana ka Jesus man jelma si nterem si lit i je. Teremen i bas kalak e nari si la ngaloken Jesus jadi Mesias, aminna pe nggo melala idah kalak e bukti. Emaka, nina Jesus, “Sanga idah kena embun si mbiring arah barat, mis ikataken kena, ‘Nandangi reh udan si seh kel mederna,’ janah e me si terjadi. Bage pe sanga idah kena angin selatan rembus, ikataken kena, ‘Melas kel kari wari,’ janah e me si terjadi. O kalak munapik, iteh kena cara ngangkai tanda-tanda i doni ras i langit, tapi ngkai maka la iteh kena cara ngangkai kai si terjadi gundari?” (Lukas 12:​54-​56) Jelas me, kalak e la ersikap guna ngalo-ngalo Mesias.