Kenca ipepalem Jesus sekalak dilaki si besar dagingna, Jesus i rumah kalak Parisi denga. Sanga man, iperdiateken Jesus tamu-tamu si milih ingan si mehamat, emaka enda jadi kesempaten man Jesus guna ngajari kerna meteruk ukur.

Nina Jesus, “Adi iundang kalak kam ku pesta perjabun, ula kundul i bas ingan si mehamatna. Banci saja lit kalak si hamaten asangken kam iundang ka. Kenca si e, kalak si ngundang kena duana reh janah nina, ‘Enda ingan kundulna.’ Emaka mela iakapndu janah miser kam ku pudi.”​—Lukas 14:​8, 9.

Nina Jesus ka, “Adi iundang kam, laweslah janah kundul arah pudi, alu bage sanga reh kalak si ngundang kam e, ikatakenna kari bandu, ‘O Teman, arah lebe kam kundul.’ Jenari datndu kehamaten i lebe-lebe kerina tamu.” Enda labo ngenca soal sopan ntah lang. Ijelasken Jesus, “Sebap ise pe si ipeganjangna bana ipeteruk me, janah ise pe si ipeterukna bana ipeganjang me.” (Lukas 14:​10, 11) Jesus ngiahken kalak e gelah meteruk ukur.

Jenari, ngerana Jesus man kalak Parisi si ngundang ia, ijelaskenna ise si man undangen adi isenangkenna atena Dibata, nina, “Adi ibanndu acara man-man i bas suari ntah berngi wari, ula lebuhndu teman-temanndu ntah pe senina-seninandu ntah kade-kadendu, ntah tetanggandu si bayak. Sebap, banci saja iundangna ka kam kari guna mbalassa. Tapi adi ibanndu pesta, undanglah kalak si mesera, si cacat, si lumpuh, ras si pentang. Ermeriah ukur me pagi kam, sebap la ngasup kalak e mbalassa bandu.”​—Lukas 14:​12-​14.

Biasa nge adi siundang ateta temanta, kade-kadeta, bage pe tetanggata bas acara man. Nina Jesus pe enda labo salah, janah banci sialoken melala pasu-pasu adi siundang kalak si merluken penampat, bagi kalak si mesera, si cacat, ntah pe si pentang. Nina Jesus man kalak Parisi, “Idatndu pagi balasenna sanga kalak si benar ipekeke.” Megi si enda, ngerana me sekalak i bas tamu e nari bana, “Ermeriah ukur me kalak si man i bas Kerajan Dibata.” (Lukas 14:15) Isadari tamu e maka kehamaten si mbelin kel guna “man i bas Kerajan Dibata.” Tapi labo kerina kalak bage perukurenna. Emaka, iceritaken Jesus perumpaman:

“Sekalak dilaki erban pesta man berngi si mbelin, janah nterem si iundangna. . . . Isuruhna budakna ndahi kalak si iundang guna ngataken, ‘Mari, sebap kerina nggo isikapken.’ Tapi, kerinana mulai erban alasen. Lit si ngataken, ‘Enggo kutukur selambar juma janah kunen ateku. Emaka, ula sangkut ukurndu, la banci aku reh.’ Nina si deban, ‘Enggo kutukur lima pasang lembu janah kucubaken ateku guna ngenen mejile ntah lang, emaka ula sangkut ukurndu.’ Nina si debanna ka, ‘Aku la banci reh, mbaru denga aku erjabu.’ ”​—Lukas 14:​16-​20.

La masuk akal kel alasen kalak enda. Biasana juma ntah pe binatang, nggom leben iperiksa maka itukur. Emaka situhuna lanai bo perlu dua dilaki e meriksasa. Dilaki si peteluken nggo erjabu, labo sangana nikapken perjabunna. Emaka, ia pe aturna banci nge reh ku acara si penting e. Megi alasen kalak enda, dungna merawa dilaki si erban pesta e, janah nina man budakna,

“Mislah kam lawes ku pasar-pasar si galang ras ku gang-gang kota, baba ku jenda kalak si mesera, si cacat, si pentang, ras si lumpuh.” Kenca ilakoken budak e, lit denga ingan i bas pesta e. Emaka nina dilaki si erban pesta e man budakna, “Laweslah ku dalan-dalan ras ku gang-gang i kuta-kuta, iahken kalak e reh, gelah dem rumahku e. Sebap, kalak si iundang ndai, la sada pe man i bas pestaku.”​—Lukas 14:​21-​24.

 Perumpaman e njelasken man banta maka Dibata Jahwe ras Jesus Kristus ngundang kalak masuk ku bas Kerajan surga. Kalak si pertama iundang eme kalak Jahudi terutama peminpin-peminpin agama. Tapi teremen i bas kalak e si nulak Jesus, alu bage la ialoken kalak e undangen e. Emaka undangen e ibereken man kalak si deban. Man ise? Eme man kalak si dungna eragama Jahudi bage pe kalak Jahudi si la merga iakap peminpin-peminpin agama. Kenca si e, undangen si peteluken eme si terakhir, nandangi ibereken man kalak si iakap kalak Jahudi la pantas nembah Dibata.​—Perbahanen Rasul-Rasul 10:​28-​48.

Payo kel kai si ikataken tamu enda ndai, “Ermeriah ukur me kalak si man i bas Kerajan Dibata.”