Arah Galilea nari, lawes Jesus ras murid-muridna nyebrangi Lau Jordan ku sebelah selatan ngelewati Perea. Paksa terakhir Jesus i Perea, ikataken Jesus man kalak Parisi pendapat Dibata kerna cerai. (Lukas 16:18) Gundari, e igunaken kalak e guna nguji Jesus.

Itulis Musa maka sekalak diberu banci iceraiken adi ilakokenna “lagu langkah si man kemelanken.” (Ulangen 24:1) Erbage-bage pendapat kalak kerna alasen guna cerai. Lit si erpengakap maka alasen e sepele. Emaka nungkun kalak Parisi, “Menurut undang-undang, banci nge iceraiken sekalak dilaki ndeharana alu alasen kai pe?”​—Matius 19:3.

Asangken ncakapken pendapat manusia kerna cerai, ituriken Jesus uga pendapat Dibata kerna perjabun. Nina, “Lenga kin pernah ibaca kena maka tangtangna nari Dibata njadiken manusia selaku dilaki ras diberu? Nina Dibata, ‘Erkiteken si enda me sekalak dilaki nadingken bapakna ras mamakna jenari ersada ia ras ndeharana, janah duana jadi sada daging.’ Emaka kalak e lanai bo dua, tapi sada. Erkiteken si e, kai si nggo ipersada Dibata, la banci isirangken manusia.” (Matius 19:​4-6) Sanga Adam ras Hawa ipersada Dibata, labo ateNa gelah i bas sada wari pagi sirang kalak e.

Nina kalak Parisi ngaloi Jesus, “Adi bage, ngkai maka isuruh Musa dilaki mereken surat cerai guna nceraiken ndeharana?” (Matius 19:7) Nina Jesus, “Perban kena keras kepala, ipediat Musa kena nceraiken ndehara kena, tapi tangtangna nari labo bage.” (Matius 19:8) “Tangtangna” nari labo maksudna i bas jaman Musa; tapi maksudna sanga iban Dibata perjabun i taman Eden.

Kenca si e, ikataken Jesus kebenaren si penting enda, nina, “Kukataken man kena maka ise pe si nceraiken ndeharana, adi labo erkiteken perbahanen seks si salah, [Junani, porneia], janah erjabu ia ras kalak si deban, ia nggo erlua-lua.” (Matius 19:9) Menurut Pustaka si Badia, perbahanen seks si salah ngenca si banci jadi alasen guna cerai.

Megi si e, nina murid-muridna, “Adi bage kin keadanna man sekalak dilaki ras ndeharana, ulin la erjabu.” (Matius 19:10) I je nari sipelajari maka perjabun e arusna seh rasa lalap!

Kerna kalak si la erjabu, ijelasken Jesus alasenna maka lit piga-piga kalak la banci erhubungen seks erkiteken nggo bage ia mulai lahirna nari. Lit ka si la erjabu perban kalak si deban si erbanca. Si debanna, lit nge sura-surana i bas erhubungen seks, tapi la ikutkenna sura-surana e gelah banci ilakokenna terbuen i bas ngelayani Dibata janah la terganggu. Nina Jesus, “Pediatlah kalak si banci [la erjabu], ndalankenca.”​—Matius 19:12.

Gundari, ibabai kalak me anak-anak man Jesus. Tapi irawai murid-murid Jesus kalak e, la ate kalak e Jesus terganggu. Ngidah si e, nina Jesus man kalak e, “Pediatlah anak-anak e reh man bangku. Ula ambati ia, sebap man kalak si bagenda me Kerajan Dibata. Situhuna, ise pe si la ngaloken Kerajan Dibata bagi sekalak anak-anak, ia la banci masuk ku bas.”​—Markus 10:​14, 15; Lukas 18:15.

Enda pelajaren si mejile kel! Gelah banci ngaloken Kerajan Dibata, kita arus meteruk ukur ras nggit erlajar bagi anak-anak. Ibuktiken Jesus maka keleng atena anak-anak e, idakepna kalak e janah ipasu-pasuna. Jesus pe keleng atena kerina kalak si “ngaloken Kerajan Dibata bagi sekalak anak-anak.”​—Lukas 18:17.