Jesus i bas Samaria ntah pe Galilea denga. Isungkun kalak Parisi me ia kerna kerehen Kerajan Dibata, si iakap kalak e dem kemewahen ras keriahen. Ijawap Jesus, “Kerehen Kerajan Dibata labo idah kerina jelma. Selain si e labo ka ning kalak, ‘Nen i jenda!’ ntah, ‘I jah!’ Sebap Kerajan Dibata lit i tengah-tengah kena.”​—Lukas 17:​20, 21.

Piga-piga kalak erpengakap maka Kerajan si ikataken Jesus e merentah i bas pusuh kalak si nembah Dibata. Tapi e la masuk akal, sebap Kerajan Dibata la mungkin lit bas pusuh kalak Parisi teman Jesus ngerana paksa si e. Tapi Kerajan Dibata lit i tengah-tengah kalak e perban Jesus si jadi Raja bas Kerajan e sangana i tengah-tengah kalak e.​—Matius 21:5.

Kenca lawes kalak Parisi e, ijelasken Jesus terbuen kerna kerehen Kerajan e man murid-muridna. Nina, “Reh me paksana merhat kel kena ngidah sada wari i bas wari-wari Anak manusia, tapi la banci idah kena.” (Lukas 17:22) Maksud Jesus eme Anak manusia merentah i bas Kerajan Dibata bas wari si pepagi. Piga-piga murid Jesus pasti merhat kel metehsa, tapi kalak e arus sabar nimai seh asa waktu si nggo itentuken Dibata man Anak manusia.

Nina Jesus ka, “Nina kalak man kena, ‘Nen i jah!’ ntah ‘Nen i jenda!’ Ula lawes ntah pe ngikutken kalak e. Sebap bali bagi kilat si ersinar i bas sada bagin langit nari ku bagin langit si deban, bage ka me pagi Anak manusia i bas warina.” (Lukas 17:​23, 24) Uga carana gelah iteh murid-murid Jesus mesias si tuhu-tuhu? Ikataken Jesus maka kerehen Mesias si tuhu-tuhu bali bagi kilat si ersinar ku japa pe. Bukti kerehenna i bas Kerajan e pagi jelas teridah man kerina kalak si tuhu-tuhu nimaisa.

Iban Jesus kejadin-kejadin si mbarenda jadi perbandingen kerna perbahanen kalak i bas masa kerehenna, “Bali bagi si terjadi i bas jaman Nuah, bage ka me pagi si terjadi i bas wari-wari Anak manusia . . . Bage ka me si terjadi i bas jaman Lut: kalak e man, minem, nukur, erdaya, nuan, ras mbangun. Tapi i bas wari Lut ndarat arah Sodom nari, reh me udan api ras kertah i langit nari ngkernepken kalak e kerina. Bage ka me si terjadi pagi i bas wari Anak manusia ncidahken dirina.”​—Lukas 17:​26-​30.

Maksud Jesus labo maka kalak i bas jaman Nuah ras Lut ikernepken perban ngelakoken dahin si biasa ilakoken kalak, bagi man, minem, nukur-nukur, erbinaga, nuan, bage pe mbangun. Pastilah keluarga Nuah ras Lut pe ilakokenna kegiaten e. Tapi kalak si deban la iperdiatekenna peraten Dibata janah i bas waktu si uga kalak e nggeluh. Emaka ipersingeti Jesus murid-muridna gelah iperdiateken kalak e peraten Dibata janah terus ngelakokenca. Alu bage, paksa ikernepken Dibata pagi kalak si jahat, kalak e banci tetap nggeluh.

Arus itadingken murid-murid Jesus kai pe si lit bas doni si banci erban kalak e ndauh arah Dibata nari. Nina Jesus, “I bas wari e, kalak si lit i bas atap rumah tapi barang-barangna i bas rumah, ula ku teruh guna muatsa, bage ka pe kalak si lit i bas juma ula mulihken guna muat barang-barangna. Ingetlah diberu Lut.” (Lukas 17:​31, 32) Ia jadi patung sira.

Ikataken Jesus ka kerna keadan si terjadi pagi sanga Anak manusia merentah selaku Raja, nina Jesus, “I bas berngi e pagi, adi dua kalak i bas sada ingan medem, sada ibaba, tapi sada nari itadingken.” (Lukas 17:34) Emaka lit si iselamatken, tapi lit ka si lang janah mate me kalak e. 

Nungkun murid-murid Jesus, “I ja pagi e terjadi, Tuan?” Nina man kalak e, “I ja pagi lit mayat, i je ka kuliki pulung.” (Lukas 17:37) Payo, piga-piga murid Jesus bali bagi kuliki si banci idahna arah dauh-dauh nari. Emaka itandai kalak e pagi Kristus si tuhu-tuhu eme Anak manusia. I bas paksa si e pagi, ibereken Jesus me kebenaren si banci nelamatken murid-muridna.