Jesus sangana bas perdalanen arah Perea nari ku Jerusalem. Sekalak anak perana kiam ngayaki Jesus janah erjimpuh i lebe-lebena. Dilaki e “sekalak peminpin,” banci saja ia kepala ingan pulung kalak Jahudi ntah pe anggota pengadilen agama Jahudi. Nina, “O Guru Si Mehuli, kai nge si arus kulakoken gelah ndatken kegeluhen si rasa lalap?”​—Lukas 8:​41; 18:18; 24:20.

Ngaloi Jesus, “Engkai maka ikatakenndu aku mehuli? La lit ise pe si mehuli selain Dibata.” Ikataken anak perana e Jesus “mehuli,” perban e biasana ipake guna ngelebuh guru. Aminna pe Jesus guru si mehuli, tapi ikatakenna man dilaki e maka Dibata ngenca si patut ikataken “Mehuli.”

Nina Jesus man dilaki e, “Adi atendu ndatken kegeluhen, teruslah dalanken perentah Dibata.” Emaka nungkun anak perana e, “Si apai?” Ituriken Jesus lima arah Sepuluh Perentah Dibata, eme kerna munuh, erlua-lua, nangko, erbual, janah nghamati orang tua. Kenca si e, ikatakenna ka sada perentah si penting kel, nina, “Arus ikelengindu kalak si deban bagi kam ngkelengi dirindu.”​—Matius 19:​17-​19.

Ijawap dilaki e, “Kerina nggo kudalanken. Kai nari kin si kurang?” (Matius 19:20) Iakapna ia kurang mehuli gelah banci ndatken kegeluhen si rasa lalap. Ngidah pemindonna si tutus kel, ‘keleng ate Jesus ia.’ (Markus 10:21) Tapi lit si ngambati dilaki e.

Keleng kel ate dilaki e ertana, emaka nina Jesus, “Sada si lenga ilakokenndu: Laweslah, dayaken ertandu janah bereken senna man kalak mesera, alu bage lit pagi ertandu i surga. Kenca si e, mari jadilah pengikutku.” Situhuna, banci ibereken dilaki e senna man kalak mesera si la banci mbalassa, nce ia jadi murid-murid Jesus. Tapi, idah Jesus cinder dilaki e jenari lawes ia janahna sedih. Perban keleng kel ate dilaki e ertana si melala, lanai idahna erta situhu-tuhu. (Markus 10:​21, 22) Nina Jesus, “Seh kel serana kalak si melala senna masuk ku bas Kerajan Dibata!”​—Lukas 18:24.

Nina Jesus ka, “Situhuna, nukahen unta masuk ku lubang jarum jait asangken kalak bayak masuk ku Kerajan Dibata.” Mamang ate murid-murid megi kata-kata Jesus, emaka nungkun kalak e, “Adi bage, ise si banci selamat?” Iakap kalak e seh kel serana guna ndatken keselamaten. Emaka nina Jesus, “Kai si la mungkin terjadi i bas manusia, tapi i bas Dibata kai pe banci terjadi.”​—Lukas 18:​25-​27.

Ikataken Petrus maka kalak e la seri ras dilaki si bayak ndai. Nina, “Enggo itadingken kami kerinana janah ikutken kami kam. Dage, kai nge si ialoken kami pagi?” Nina Jesus ngaloi, “Iban Dibata pagi kerinana jadi mbaru, sanga Anak manusia kundul i bas tahtana si mulia. Paksa si e pagi, kena si nggo ngikutken aku kundul i bas 12 tahta janah ngadili 12 suku Israel.”​—Matius 19:​27, 28.

Pasti si icakapken Jesus eme kerna kai si terjadi i bas wari si pepagi, sanga doni enda mulihi bagi taman Eden. Iupahi pagi Petrus ras murid-murid si deban guna ikut merentah doni Pardis radu ras Jesus. Upah e tuhu-tuhu la sebanding ras pengorbanen kai pe si nggo iban kalak e!

Labo i bas wari si pepagi ngenca kalak e ngaloken upah. Gundari pe nggo lit ialoken kalak e. Nina Jesus, “Ise pe si nggo nadingken rumahna ntah ndeharana ntah seninana ntah orang tuana ntah anakna erkiteken Kerajan Dibata ialokenna pagi erlipat-lipat terbuen i bas jaman si gundari, janah i bas jaman si nandangi reh, kegeluhen si rasa lalap.”​—Lukas 18:​29, 30.

Ku japa pe murid-murid e lawes, banci kalak e rembak ras teman kalak e sada kiniteken. Pertemanen kalak e banci lebih rembak janah lebih meherga iakap kalak e asangken ras anggota keluargana sendiri. Sayang kel, dilaki si bayak ndai la idatna pasu-pasu enda bage pe i bas Kerajan surga.

Nina Jesus ka, “Tapi nterem kalak si pertama jadi si terakhir pagi, janah si terakhir jadi si pertama.” (Matius 19:30) Kai maksudna?

Selaku peminpin kalak Jahudi, anak perana si bayak ndai termasuk i bas “kalak si pertama.” Perban ipatuhina perentah Dibata, situhuna cocok ia jadi murid Jesus. Tapi kelengen atena ertana i bas geluhna. La seri ras kalak si biasa-biasa saja, kalak e itehna maka si iajarken Jesus e eme kebenaren ras dalan guna ndatken kegeluhen. Banci ikataken, kalak e kalak “si terakhir,” tapi gundari nggo jadi “si pertama.” Jadi raja pagi kalak e ras Jesus i surga janah merentah doni Pardis.