Kenca Jesus jumpa ras Maria ras Marta i deher Betani, lawes kalak e ku kuburen Lasarus. Kuburen e gua si itutup alu batu si galang. Nina Jesus, “Gulingken batu ena.” Erkiteken la iangkai Marta kai si nandangi ilakoken Jesus, ngerana Marta, “O Tuan, ia pasti nggo mbau, sebap nggo empat wari ia mate.” Nina Jesus, “La kin nggo kukataken adi tek kam idahndu me kemulian Dibata?”—Johanes 11:39, 40.

Igeser me batu e. Iangkat Jesus takalna janah ertoto ia, “O Bapa, bujur kukataken man baNdu sebap nggo ibegikenNdu aku. Kuteh nge maka katawari pe ibegikenNdu aku, tapi si enda kukataken guna kalak si tedis i jenda, gelah tek ia maka Kam kap si nuruh aku.” Alu ertoto i lebe-lebe jelma si nterem, icidahken Jesus man kalak maka kai si nandangi ilakokenna banci terjadi perban kuasa Dibata. Kenca bage, alu sora megang erlebuh Jesus, nina, “O Lasarus, ndaratkenlah!” I bas paksa si e pe mis ndarat Lasarus. Tanna, nahena, bage pe ayona ibaluti denga alu uis. Jenari nina Jesus, “Agui balutna e, jenari pediat ia lawes.”​—Johanes 11:​41-​44.

Enterem kalak Jahudi si reh ngapuli Maria ras Marta ngidah mukjizat e, janah dungna erkiniteken man Jesus. Tapi lit ka lawes ndahi kalak Parisi guna nceritaken kai si nggo ilakoken Jesus. Emaka, runggu me kalak Parisi ras imam-imam kepala i bas Pengadilen Agama Jahudi. Salah sada anggota bas Pengadilen Agama Jahudi e imam si mbelin eme Kayapas. Ngerana piga-piga anggota Pengadilen e, nina, “Enggo melala ibanna mukjizat, kai si arus silakoken? Adi sipediat ia terus bagenda, kerina kari kalak erkiniteken man bana. Dungna reh me kari kalak Roma, irampasna me rumah pertotonta ras bangsata.” (Johanes 11:​47, 48) Enggo ibegi kalak e cerita arah kalak si ngidah Jesus ‘ngelakoken melala mukjizat’ alu kuasa Dibata, tapi kalak e la senang janah jadi saingen akapna Jesus.

Kekeken Lasarus erban mela kel kalak Saduki si la tek man kekeken. Ngerana Kayapas eme kalak Saduki, “La kap iteh kena kai pe, janah la kap isadari kena maka padin sekalak jelma mate guna sada bangsa asangken kerina bangsa ikernepken.”​—Johanes 11:​49, 50; Perbahanen Rasul-Rasul 5:​17; 23:8.

Menurut Kayapas, Jesus arus ibunuh gelah la bene pengikut peminpin agama Jahudi. Tapi, ikataken Pustaka si Badia maka rananna e labo i bas “ukurna” nari. Ipake Jahwe me Kayapas selaku imam kepala, guna ernubuat kerna kematen Jesus si jadi tebusen. Tapi, labo man kalak Jahudi saja, Jesus pe jadi tebusen man kerina “anak-anak Dibata si nggo merap.”​—Johanes 11:​51, 52.

Berhasil Kayapas mpengaruhi Pengadilen Agama Jahudi gelah erban rencana guna munuh Jesus. Nikodemus, eme salah sada anggota Pengadilen Agama Jahudi si erteman ras Jesus, iceritakenna nge rencana e man Jesus? Labo siteh uga pastina, tapi banci saja e si erban Jesus lawes arah Jerusalem, sebap lenga seh waktu si nggo itetapken Dibata guna kematenna.