Kenca arah Perea nari, seh Jesus i Betani, kuta e kira-kira telu kilometer i timur Jerusalem. Maria ras Marta sangana erceda ate perban mbaru denga turangna mate eme Lasarus. Enterem kalak reh ngapuli.

Kenca ibegi Marta maka Jesus nggo nandangi seh, mis kiam ia ndahi Jesus. Ikataken Marta, “O Tuan, bicara i jenda min ndai kam, labo mate turangku e.” Banci saja e me si iukuri Marta ras Maria sedekah empat wari e. Aminna pe bage, Marta la nyerah, nina, “Tapi amin bage gia, tek nge aku maka kai pe ipindondu man Dibata iberekenNa nge.” (Johanes 11:​21, 22) Tek ia maka lit denga si banci ilakoken Jesus man turangna e.

Ijawap Jesus, “Nggeluh nge turangndu mulihken.” Iakap Marta maka si sangana icakapken Jesus eme kekeken bas doni i bas wari si pepagi. Iteh Marta maka Abraham ras umat Dibata si deban tek man kekeken. Emaka nina, “Kuteh nge maka nggeluh ia pagi sanga terjadi kekeken i bas wari pendungi.”​—Johanes 11:​23, 24.

Tapi, ngasup kin Jesus paksa si e mis mpekeke Lasarus? Iingetken Jesus man Marta maka nggo ibereken Dibata kuasa guna naluken kematen, nina, “Ise pe si erkiniteken man bangku, nggeluh mulihi aminna pe ia nggo mate, janah ise pe si nggeluh ras erkiniteken man bangku, ndigan pe la ia mate.”​—Johanes 11:​25, 26.

Labo maksud Jesus maka murid-murid si nggeluh denga paksa si e la banci mate. Jesus pe arus mate, bagi si nggo ikatakenna man rasul-rasulna. (Matius 16:21; 17:​22, 23) Kai maksud Jesus? Ikataken Jesus maka ise si erkiniteken man ia banci nggeluh si rasa lalap. Bicara mate pe, ialoken kalak e nge pagi kegeluhen si rasa lalap kenca ipekeke. Lit ka umat Dibata i bas pendungi jaman si banci saja labo pernah mate. Emaka, la soal kalak e pernah mate ntah lang, labo inanami kalak e kematen seh rasa lalap.

Gundari ngasup nge Jesus mpekeke Lasarus si nggo mate piga-piga wari? Ikataken Jesus, “Aku kap kekeken ras kegeluhen.” Kenca e, isungkunna Marta, “Tek nge kam kerna si e?” Ijawap Marta, “Tek aku Tuan, tek aku maka kam kap Kristus Anak Dibata si reh ku doni enda.” Erkiniteken Marta maka i bas paksa si e pe lit si banci ilakoken Jesus. Jenari, mis mulihken Marta ku rumah janah ikusikkenna man Maria, nina, “Enggo i jenda Guru, idilona kam.” (Johanes 11:​25-​28) Emaka, lawes Maria janah iikutken jelma si nterem ia perban iakap kalak e Maria lawes ku kuburen Lasarus.

Kepeken, Maria lawes ndahi Jesus. Sanga jumpa ras Jesus, erjimpuh ia ras iulangina kai si ikataken Marta, “O Tuan, bicara i jenda min ndai kam, labo mate turangku e.” Perban idah Jesus kalak si deban bage pe Maria tangis, ceda kel ate Jesus janah mamburen iluhna. Banci idah jelma si lit i je maka keleng kel atena Lasarus. Tapi lit ka si ngerana, ‘Adi banci iban Jesus kalak pentang jadi erpengidah, la kin ia ngasup erbanca gelah ula min ndai mate si Lasarus e?’​—Johanes 11:​32, 37.