Sedekah pelayanen Jesus, rusur iajarkenna maka seh kel pentingna meteruk rukur. (Lukas 14:​8-​11) Semangat kel Jesus ndarami kalak si meteruk ukur janah nggit ngelayani Dibata. Paksa si e, banci saja piga-piga i bas kalak e itandai denga selaku kalak perdosa.

Iperdiateken kalak Parisi ras ahli Undang-Undang Musa maka kalak si iakapna la merga e, eme kalak si nggit ndeher ras Jesus janah nggit meteh ajarenna. Protes kalak e, nina, “Ialo-alo dilaki enda kalak perdosa janah man ia ras.” (Lukas 15:2) Ganjangen akap kalak Parisi ras ahli Undang-Undang Musa dirina asangken kalak si la ngangkai Undang-Undang Musa. Ibanna kalak e bagi abu si lit bas nahena. Isalahgunaken peminpin istilah am haarets, si ertina “rakyat negri,” guna nggelari kalak e.

La seri bagi Jesus, mehamat ia man kerina kalak, icidahkenna perkuah atena ras lias atena. Emaka, nterem kalak si biasa ianggap la merga termasuk kalak si itandai perdosa pe nggit megiken Jesus. Sanga ibegi Jesus maka ipandangi kalak Parisi ras ahli-ahli Undang-Undang Musa ia, uga tanggapen Jesus?

Iceritaken Jesus perumpaman si kena ku pusuh, mirip ras perumpaman si iceritakenna i Kapernaum. (Matius 18:​12-​14) I bas perumpaman e, tempa-tempa kalak Parisi lit i bas rarasen biri-biri Dibata, tapi kalak si ianggap la merga ipeseri bagi biri-biri si nggo ndauh janah papak. Enda me perumpamanna:

“Adi lit sekalak i bas kena 100 biri-birina, janah bene sada, la kin itadingkenna si 99 e i bas taneh si melala turah dukut janah lawes ndarami si bene ndai ngayak dat? Kenca idatna, itamana i bas barana janah meriah kel ukurna. Sanga ia mulih ku rumah, ilebuhna teman-temanna ras tetanggana, nina man kalak e, ‘Ermeriah ukurlah ras aku, sebap nggo kudat biri-biriku si bene.’”​—Lukas 15:​4-6.

Ijelasken Jesus perumpamanna, “Bage ka me, belinen keriahen ukur i surga erkiteken sekalak perdosa si ertobat, asangken si 99 kalak si benar si la perlu ertobat.”​—Lukas 15:7.

Pasti sengget kel kalak Parisi perban icakapken Jesus kerna pertobaten. Benar akap kalak e dirina janah lanai perlu akapna ertobat. Piga-piga i bas kalak e nari pernah mandangi Jesus perban man ras pengalo cuke bage pe ras kalak perdosa. Tapi ijawap Jesus, “Aku reh labo ndilo kalak si benar, tapi kalak perdosa.” (Markus 2:​15-​17) La senang Jahwe ras malekat-malekat i surga ngenen kalak Parisi si sombong e, tapi seh kel riahna akap kalak e adi lit kalak si ertobat.

Guna ncidahken maka lit keriahen i bas surga sanga lit perdosa si ertobat, iceritakenna ka perumpaman, “Adi lit sekalak diberu sepuluh sen logam pirakna, janah bene sada, la kin ipegeluhna lampu janah isapuna rumahna, jenari idaramina alu megermet ngayak dat? Janah sanga idatna, ilebuhna teman-temanna ras tetanggana, nina, ‘Ermeriah ukurlah ras aku, sebap nggo kudat sen logam pirakku si bene.’”​—Lukas 15:​8, 9.

Iulangi Jesus ka pelajaren arah si e, nina, “Bage ka me, lit keriahen ukur i bas malekat-malekat Dibata erkiteken sekalak perdosa si jera dingen robah.”​—Lukas 15:10.

Bayangkenlah keriahen ukur malekat-malekat paksa lit sekalak jelma si ertobat! Apai ka adi ia kalak si merentah pagi i bas Kerajan surga, janah ganjangen kedudukenna asangken malekat-malekat. (1 Korinti 6:​2, 3) Sitik kel pe la cian ate malekat-malekat. Jadi uga arusna perasanta sanga lit kalak si ertobat?