Kenca Jesus ngajar janah mpepalem nterem kalak i Judea ras i Jerusalem, isebrangina Lau Jordan guna ngajar i kota-kota i Perea. Tapi kentisik nari mulihken ka ia ku Jerusalem.

Sanga Jesus i Perea, lit sekalak dilaki si nungkun man Jesus, “O Tuan, sitik kin ngenca kalak si iselamatken?” Banci saja iteh dilaki e maka peminpin-peminpin agama sijawapen kerna asa teremna kalak si iselamatken pagi. Jesus la nggit ncakapken kerna si e. Tapi ijelaskenna kai si arus ilakoken sekalak jelma gelah banci selamat, nina, “Usahakenlah asa ngasupndu masuk arah pintu si sempit.” Emaka arus erjuang kel gelah banci selamat. Engkai? Ikataken Jesus, “Sebap nterem pagi kalak masuk atena, tapi la banci.”​—Lukas 13:​23, 24.

Guna ncidahken uga pentingna kel erjuang, ijelasken Jesus alu perumpaman, nina, “Kenca ikunci tuan rumah pintu, cinder kena i darat, ituktuki kena pintuna, ning kena, ‘O Tuan, buka min.’ . . . Tapi nina man kena, ‘La kena kutandai. Laweslah i bas aku nari, o kalak jahat!’ ”​—Lukas 13:​25-​27.

Arah perumpaman e ijelasken Jesus maka kalak si reh terlambat lanai banci masuk, perban pintuna nggo itutup ras ikunci. Arusna terlampasen min ia reh aminna pe la cocok kapna waktuna. Si enda terjadi man kalak si arusna ndatken manpaat arah pengajaren Jesus, tapi la igunaken kalak e kesempaten guna ngutamaken ibadat si benar, janah la kalak e nggit ngaloken Jesus, si isuruh Dibata guna nelamatken kalak e. Dungna, ipelawes me, “tangis janah erderep ipen” kalak e. Tapi kalak arah kerina bangsa, ‘arah timur, barat, utara, bage pe selatan nari, kundul guna man i bas Kerajan Dibata.’​—Lukas 13:​28, 29.

Nina Jesus, “Kalak si terakhir [bagi kalak Jahudi si iakap la meherga bage pe kalak arah bangsa si deban] jadi si pertama pagi, janah kalak si pertama [eme peminpin agama si sombong perban kalak e kesusuren Abraham] jadi si terakhir pagi.” (Lukas 13:30) Kalak si la meteh ngata bujur e “jadi si terakhir pagi,” ngertiken maka labo kalak e masuk ku bas Kerajan Dibata.

Kenca si e, reh piga-piga kalak Parisi janah nina man Jesus, “To lawes, tadingken ingan enda, sebap ibunuh Herodes [Antipas] atena kam.” Banci saja Raja Herodes nge si mberitaken kerna si e, gelah mbiar Jesus janah lawes arah daerah e. Herodes nggo munuh Johanes Peridiken, janah labo mungkin ibunuhna ka nabi si deban. Tapi ikataken Jesus man kalak Parisi, “To kataken man biang kerangen ah, ‘Gundari ras pagi kupelawes malekat-malekat jahat ras kupepalem kalak, janah i bas wari si peteluken dung me dahinku.’” (Lukas 13:​31, 32, cataten i teruh) Igelari Jesus me Herodes “biang kerangen” guna ncidahken uga licikna Herodes e. Tapi Jesus la nggit iatur Herodes ntah pe kalak si deban. Iusahakenna ngelakoken dahin si isuruh Bapakna sue ras waktu si nggo itentuken Bapakna, labo si itentuken manusia.

Iterusken Jesus perdalanenna ku Jerusalem, sebap nina, “Sekalak nabi la banci ibunuh i darat Jerusalem.” (Lukas 13:33) La lit nubuat Pustaka si Badia si ngataken maka Mesias mate i bas kota e. Jadi ngkai ikataken Jesus ia ibunuh i je? Jerusalem eme pusat ibadat, i je lit mahkamah agung Pengadilen Agama Jahudi si anggotana 71 kalak, janah biasana i je me ingan ngadili kalak si ianggap nabi palsu. Selain si e, korban-korban binatang pe ipersembahken i je, emaka sadar Jesus maka ia pe pasti ibunuh i je.

Nina Jesus, “O Jerusalem, Jerusalem, pemunuh nabi-nabi ras si mbenteri kalak si isuruh ndahi kam, seh kel rusurna ateku mpepulung anak-anakndu bali bagi indung manuk mpepulung anak-anakna i teruh kabengna! Tapi la kena nggit. Rumah pertoton kena itadingken pagi.” (Lukas 13:​34, 35) Ialoken kalak e nge pagi akibatna perban nulak Anak Dibata!

Ope lenga Jesus seh i Jerusalem, iundang sekalak Parisi Jesus man i rumahna i bas wari Sabat. I je lit sekalak dilaki si besar dagingna (perban mbuesa cairen bas daging, biasana i paha ras nahe). Tamu-tamu si deban merhat meteh kai si nandangi ilakoken Jesus man dilaki e. Isungkun Jesus kalak Parisi ras ahli-ahli Undang-Undang Musa, “Banci nge mpepalem bas wari Sabat ntah lang?”​—Lukas 14:3.

La lit si njawapsa. Emaka ipepalem Jesus dilaki e janah nina, “Ise i bas kena nari adi anakna ntah lembuna ndabuh ku bas sumur i bas wari Sabat, la mis itarikna?” (Lukas 14:5) Sekali nari, la lit si nimbak ranan Jesus si masuk akal e.