Edenga iceritaken Jesus perumpaman kerna anak si bene, aturna min sadar kalak Parisi, ahli Undang-Undang Musa, bage pe pengalo cuke maka Dibata nggit ngampuni kalak si ertobat. (Lukas 15:​1-7, 11) Gundari, iceritaken Jesus ka perumpaman si debanna man murid-muridna, eme kerna dilaki si bayak ras pengurus rumahna.

Ituduh me pengurus e ngkeriken erta tuanna, emaka ipelawes tuanna e atena ia. Nina pengurus e i bas ukurna, “Kentisik nari ipengadi tuanku atena aku, kai nge ndia kuban? Aku lanai ngasup ncangkul, janah mela aku mindo-mindo.” Emaka ibanna me rencana, “Kuteh kai si arus kulakoken, gelah sanga ipengadina kari aku, banci ialo-alo kalak aku i bas rumah kalak e.” Jenari ilebuhna sekalak-sekalak si rutang man tuanna e, janah nungkun ia man si pertama, “Sekai utangndu man tuanku?”​—Lukas 16:​3-5.

Ijawap si pertama, “Dua ribu dua ratus liter minak saitun.” Banci saja tuanna e perbinaga minak ntah pe lit kebun saitunna. Jenari nina pengurus e, “Buatlah surat perjanjin utangndu. Kundulken jenari minter tulisken 1.100 liter.”​—Lukas 16:6.

Ngerana ka pengurus e man si debanna, “Adi kam, sekai utangndu?” Ijawapna, “Seratus guni gandum.” Nina pengurus e bana, “Buatlah surat perjanjin utangndu janah tulis 80 guni.” Emaka, lit 20 persen buena ikurangi pengurus e utang kalak ndai.​—Lukas 16:7.

Erdahin denga pengurus e ngurusi perduiten tuanna e, emaka banci denga ikurangina utang kalak si rutang man tuanna. Alu bage, banci ikuasai pengurus e kalak si rutang e, janah banci lit teman si nampati ia kari adi ipengadi arah dahinna e.

Dungna iteh tuanna e kai si terjadi. Ipujikenna pengurus e perban “cerdik perbahanenna,” aminna pe “la ia bujur.” Nina Jesus, “Cerdiken kap anak-anak doni enda i bas erurusen ras kalak si deban asangken anak-anak terang.”​—Lukas 16:8.

Labo ibenarken Jesus perbahanen pengurus e ntah pe labo iajarina gelah licik murid-muridna. Jadi, kai si iajarken Jesus? Nina, “Pakelah kebayaken si la benar guna ndatken teman kena, gelah adi keri kebayaken e, ialoken kalak e me kena i bas ingan tading si rasa lalap.” (Lukas 16:9) Emaka, umat Dibata, eme “anak-anak terang,” perlu kel gelah ngukuri wari si pepagi janah cerdik. Arus ipake kalak e ertana alu pentar gelah banci ngaloken kegeluhen si rasa lalap i bas wari si pepagi.

Dibata Jahwe ras Jesus ngenca si banci ngundang sekalak jelma guna merentah i bas Kerajan surga ntah pe i bas doni Pardis selaku rakyat i bas Kerajan e. Enda me pasu-pasu si tahan rasa lalap, la bagi erta si banci bene. Emaka, gundari sipakelah ertata guna Kerajan Dibata. Alu bage, reh rembakna kita ras Jahwe bage pe Jesus, janah ipasu-pasu kalak e kita i bas wari pepagi.

Nina Jesus ka, “Erkiteken si e, adi la kena setia sanga nggunaken kebayaken si la benar enda, ise kari si mpercayaken kebayaken situhu-tuhu man kena?” Maksud Jesus, adi lit sekalak jelma banci ngaturken ras make ertana alu pentar, ia pe banci ka ngelakoken erbage-bage tanggung jawap si ibereken Dibata.​—Lukas 16:11.

Ikataken Jesus ka adi merhat murid-murid ialoken i bas “ingan tading si rasa lalap,” la banci ipelebe kalak e erta. Ikataken Jesus, “La lit pelayan si banci jadi budak man dua tuan. Erkiteken pasti nembeh atena si sekalak janah ikelengina si deban, ntah pe setia ia man si sekalak tapi la diatena si deban. La kena banci jadi budak man Dibata bage pe man Kebayaken.”​—Lukas 16:​9, 13.