Paksa Jesus muat ku Jerusalem, singgah Jesus ras murid-muridna i rumah Sakeus. Murid-murid e erpengakap “Kerajan Dibata” mis reh janah Jesus jadi Rajana. (Lukas 19:11) Lenga iangkai murid-murid kerna si e, la teh kalak e Jesus arus mate. Emaka iceritaken Jesus sada perumpaman gelah iteh kalak e maka Kerajan Dibata labo reh i bas paksa si e.

Nina, “Sekalak bangsawan lawes ku negri si ndauh guna ndatken kuasa selaku raja, kenca si e mulih me ia.” (Lukas 19:12) Perdalanen si bage pasti ndekah. Ise maksudna “sekalak bangsawan” si lawes ku “negri si ndauh?” Ia me Jesus si lawes ku surga ku ingan Bapakna si mereken ia kuasa selaku raja.

I bas perumpaman e, ope lenga lawes “sekalak bangsawan” e, ilebuhna sepuluh budakna janah iberekenna tiap kalak sada mina pirak. Jenari nina, “Pakelah sen enda erban usaha ngayak aku mulih.” (Lukas 19:13) Mina pirak e seri ras sen. Sada mina ergana seri ras upah kalak si ku juma si dekahna lebih telu bulan.

Iteh murid-murid maka kalak e me budak si sepuluh si lit bas perumpaman e, sebap i bas perumpaman sebelumna nggo pernah ikataken Jesus maka kalak e me jadi kalak si rani. (Matius 9:​35-​38) Pastilah labo guna mperani gandum situhu-tuhu kalak e isuruh Jesus. Tapi peranin si imaksud Jesus eme mpepulung murid-­murid si pagin merentah i bas Kerajan Dibata. Kai pe si lit i bas kalak e igunakenna guna ndahiken tugas e.

Kai deba nari si ipebetehken Jesus bas perumpaman e? Ikatakenna maka “segat ate penduduk negri e ia janah ikirim kalak e sada kelompok utusen guna ngataken man bana, ‘La ate kami dilaki enda jadi raja kami.’” (Lukas 19:14) Iteh murid-murid maka kalak Jahudi la atena senang ngenen Jesus janah lit ka si atena munuh Jesus. Kenca Jesus mate janah lawes ku surga, isiksa kalak Jahudi me murid-murid Jesus. Enda mbuktiken maka la kalak e nggit Jesus jadi Rajana.​—⁠Johanes 19:​15, 16; Perbahanen Rasul-Rasul 4:​13-​18; 5:40.

Uga si sepuluh budak ndai nggunaken mina e ngayak “sekalak bangsawan” e “jadi raja” janah kenca ia mulih? Nina Jesus, “Ilebuhna budak-budakna si nggo iberena sen gelah itehna asa kai asil usaha kalak e. Reh me budak si pertama janah nina, ‘O Tuan, nggo kudat untungna sepuluh mina arah sada mina si iberekenndu.’ Nina man budakna e, ‘Merandal. Kam budak si mehuli! Erkiteken setia kam i bas si kitikna, kubereken ikuasaindu sepuluh kota.’ Kenca si e, reh budak si peduaken, nina, ‘O Tuan, nggo kudat untungna lima mina arah sada mina si iberekenndu.’ Nina ka man budak enda, ‘Kam pe kuasaindulah lima kota.’”​—Lukas 19:​15-​19.

Adi seri tutusna ate murid-murid bagi budak e ndai i bas erban murid-murid, pasti senang kel Jesus janah ipasu-pasuna kalak e. Memang labo seri keadan, kesempaten, ras kengasupen kerina murid-murid Jesus. Tapi Jesus, si nggo “jadi raja,” pasti masu-masu usaha kalak e.​—Matius 28:​19, 20.

Lit budak si la bagi kalak e, iceritaken Jesus ka, “Tapi reh me budak si deban, nina, ‘O Tuan, enda minandu mbarenda, kubuniken i bas uis. Bagenda, mbiar aku bandu, sebap kam kalak jahat. Ibuatndu kai si labo itabungndu janah iperanindu kai si la isuanndu.’ Nina man budak e, ‘O Budak si jahat! Kuhakimi kam alu kata-katandu ena. Itehndu aku kalak jahat, kubuat kai si la kutabung janah kuperani kai si la kusuan. Adi bage, ngkai maka la itamandu senku bas bank? Gelah kenca aku mulih, banci kubuat sen e ras bungana.’ Jenari nina man kalak si cinder i je, ‘Buat sen mina si lit bas ia, bereken man budak si sepuluh sen minana.’”​—Lukas 19:​20-24.

Perban budak e la nggit erdahin guna nambahi erta tuanna, rugi me dungna budak e. Emaka, arah perumpaman e banci iangkai rasul-rasul e adi kalak e la tutus erdahin, kalak e la banci merentah ras Jesus.

Pasti reh semangatna murid-murid si setia e megi kata-kata Jesus. Idungi Jesus kata-katana alu ngataken, “Kalak si lit bas ia ibereken terbuen, tapi man kalak si la lit bas ia, si lit i bas ia e pe ibuat i bas ia nari.” Ikatakenna ka maka iukum me pagi musuh-musuhna si nulak ia “jadi rajana.” Jenari iterusken Jesus perdalanenna ku Jerusalem. ​—Lukas 19:​26-​28.