I Perea, mbaru denga iajarken Jesus maka “kalak si pertama jadi si terakhir pagi, janah si terakhir jadi si pertama.” (Matius 19:30) Si e iperjelasna alu perumpaman kerna kalak si erdahin bas kebun anggur:

“Kerajan surga e bali bagi tuan rumah si ndarat paksa erpagi-pagi guna ndarami si erdahin i bas kebun anggurna. Kenca ersada arihna ras kalak si erdahin e maka upahna sada dinar per wari, isuruhna kalak e ku kebun anggurna. Kira-kira jam siwah erpagi-pagi ndarat ka ia janah idahna kalak si la lit pendahinna bas pajak. Nina man kalak e, ‘Kena pe berkatlah ku kebun anggurku. Kubereken kari upah si cocok man kena.’ Emaka lawes me kalak e. Kira-kira jam 12 ciger ras jam 3 karaben, ndarat ka ia mulihi janah ilakokenna ka bagi si ndai. Dungna, kira-kira jam lima karaben ndarat ia janah jumpa ras kalak si deban si cinder-cinder saja, janah nina man kalak e, ‘Engkai kena la erdahin janah cinder saja i jenda sada wari ben?’ Ijawap kalak e, ‘Perban la lit kalak si ndilo kami.’ Nina ngaloi, ‘Kena pe berkatlah ku kebun anggurku.’”​—Matius 20:​1-7.

Sanga icakapken Jesus kerna “Kerajan surga” ras “tuan rumah,” mis iangkai kalak e maksud Jesus eme Dibata Jahwe. I bas Kitap-Kitap si Badia, Jahwe rusur ikataken si mada kebun anggur. Kebun anggur e ngertiken bangsa Israel. (Masmur 80:​9, 10; Jesaya 5:​3, 4) Kalak si nggeluh menurut perjanjin Undang-Undang Musa bali bagi si erdahin bas kebun anggur. Tapi perumpaman Jesus labo nceritaken kerna kai si nggo lewat. Tapi kerna kai si terjadi i bas jamanna.

Iceritaken Jesus maka piga-piga kalak si erdahin sada warin iarapkenna upah sada wari. Kalak enda cocok ngertiken peminpin-peminpin agama ras kalak Parisi si ngaku nggo kerja keras erdahin man Dibata.

Peminpin-peminpin agama erpengakap maka kalak Jahudi si biasa-biasa saja la seri tutusna ras kalak e i bas nembah Dibata. I bas perumpaman Jesus, kalak Jahudi si biasa-biasa e bali bagi kalak si pudin erdahin i bas kebun anggur. Lit si erdahin “jam siwah erpagi-pagi,” jam 12 ciger, jam 3 karaben, bage pe jam 5 karaben.

Menurut kalak si nterem pengikut Jesus eme kalak si ‘labo merga.’ (Johanes 7:​49) Sope jadi murid Jesus, kalak enda nelayan ntah pe budak. Tapi, i bas tahun 29 M, isuruh “si mada kebun anggur” me Jesus guna ndilo kalak e gelah erdahin ras Dibata. Kalak enda me si “perpudi” erdahin, eme si erdahin jam lima karaben.

Idungi Jesus perumpamanna nina, “Paksa nggo berngi, nina si mada kebun anggur e man mandorna, ‘To dilo kalak si erdahin e janah galari upahna, si pudin erdahin lebe bereken upahna janah si leben erdahin pudin bereken.’ Paksa reh si erdahin jam lima karaben, tiap kalak ngaloken sada dinar. Emaka, paksa reh si leben erdahin, iakapna ialokenna terbuen, tapi kalak e pe igalari sada dinar. Kenca ialokenna, mulai kalak e jungut-jungut man tuan rumah e, nina, ‘Kalak si pudin enda sada jam ngenca erdahin. Tapi ipeserindu kami ras ia, kami erdahin pagi-pagi nari seh ben janah kena las matawari!’ Ngaloi tuan e man sekalak i bas kalak e nari, ‘O Teman, labo aku salah man bandu. La kin nggo sada arihta adi upahndu sada dinar? Buat upahndu janah laweslah. Kubereken ateku upah man si pudin reh seri ras upahndu. Me ate-ateku nge adi jangku? Entah cian kin atendu perban aku bujur?’ Emaka, si perpudi pagi jadi si perlebe, janah si perlebe jadi si perpudi.”​—Matius 20:​8-​16.

La iangkai murid-murid bagin si terakhir arah perumpaman Jesus. Kai maksudna peminpin agama kalak Jahudi si erpengakap maka ia kalak si “perlebe” jadi kalak si “perpudi”? Janah uga pagi murid-murid Jesus jadi kalak si “perlebe”?

Murid-murid Jesus si ianggap kalak Parisi ras si debanna jadi kalak si “perpudi,” dungna jadi si “perlebe,” si ngaloken upah sada warin. Kenca mate Jesus, bangsa Israel si lit i doni itulak Dibata jenari ipilihNa bangsa si mbaru eme “Israel si jadi jang Dibata.” (Galati 6:​16; Matius 23:38) Johanes Peridiken pe iturikenna kerna si e sanga icakapkenna kerna peridin alu kesah si badia. Kalak si “perpudi” jadi si perlebe i bas ngaloken peridin e, janah ibereken ka man bana kehamaten jadi saksi kerna Jesus “seh ku ujung doni.” (Perbahanen Rasul-Rasul 1:​5, 8; Matius 3:​11) Terjadi me perubahen si luar biasa eme peminpin agama dungna jadi kalak si “perpudi.” Emaka iadapi murid-murid Jesus me pagi tentangen arah peminpin agama nari.