Perban ibunuh anggota Pengadilen Agama Jahudi atena Jesus, lawes Jesus ku kota Eperaim i sebelah timur laut kota Jerusalem. I je ia tading ras murid-muridna gelah ndauh arah musuh-musuhna. (Johanes 11:54) Kentisik nari wari Paskah tahun 33 M, emaka arus ka lawes Jesus. Lawes ia ku sebelah utara, ilewatina Samaria jenari nangkeng ku Galilea. Enda me si terakhir idahi Jesus daerah e ope lenga ia mate.

I bas tangtangna perdalanenna, sanga ia lawes arah kuta ku kuta si deban, jumpa ia ras sepuluh dilaki si sakit kusta. Lit erbage-bage jenis pinakit kusta. Kalak si sakit kusta banci keri deba anggota dagingna, bagi jari tan, jari nahe, ntah pe cuping. (Bilangen 12:​10-​12) Menurut Undang-Undang Dibata kalak si sakit kusta arus serko, “Najis, najis!” janah ingan kalak e arus ndauh arah jelma si nterem nari.​—Imamat 13:​45, 46, NW.

E me sebapna sepuluh kalak si sakit kusta ndai tetap ndauh arah Jesus. Tapi serko kalak e nina, “O Jesus, Guru, mekuah min atendu kami!” Sanga idah Jesus kalak e, nina, “Laweslah janah cidahken diri kena man imam-imam.” (Lukas 17:​13, 14) Teridah maka iergai Jesus Undang-Undang Dibata. Sebap menurut Undang-Undang e sekalak imam ngenca lit hakna ngataken maka kalak si sakit kusta nggo malem. Kenca si e, kalak e banci tading radu ras jelma si nterem.​—Imamat 13:​9-​17.

Tek si sepuluh kalak sakit kusta ndai man kuasa Jesus. Aminna pe lenga malem, lawes kalak e njumpai imam-imam. Sanga bas perdalanen, kiniteken kalak e man Jesus iupahi. Alu manjar-anjar mulai bene pinakit kalak e janah mulihken kalak e sehat!

Siwah kalak si ipepalem ndai iteruskenna perdalanenna. Tapi sekalak lang. Ia kalak Samaria, mulih ia ndahi Jesus. Engkai? Ngata bujur kel ia man Jesus perban kai si ilakokenna. “Imuliakenna Dibata alu sora si megang,” sebap itehna maka Dibata si erban ia nggo malem. (Lukas 17:15) Sanga jumpa ia ras Jesus, erjimpuh ia ngata bujur.

Nina Jesus man kalak si lit i sekelilingna, “La kin sepuluh kalak si ipepalem ndai? I ja siwah kalak nari? La nge lit si mulihken guna muliaken Dibata, selain dilaki enda si rehna i bas bangsa si deban nari?” Jenari nina Jesus bana, “Tediskenlah, laweslah, kinitekenndu nggo erban kam malem.”​—Lukas 17:​17-​19.

Alu mpepalem si sepuluh kalak si sakit kusta ndai, ibuktiken Jesus maka ia isuruh Dibata Jahwe. Sekalak arah si sepuluh kalak si ipepalem ndai labo ngenca ipepalem tapi banci ka idatna pagi kegeluhen si rasa lalap. I bas jamanta gundari, Jesus lanai igunaken Dibata guna mpepalem kalak. Tapi alu erkiniteken man Jesus, sidatken pagi kegeluhen si rasa lalap. Ngata bujur nge kita bagi kalak Samaria ndai?