Enggo pernah iceritaken Jesus perumpaman kerna perluna terus ertoto. (Lukas 11:​5-​13) Gundari banci saja ia sangana i Samaria ntah pe i Galilea, mulihken ka iajarkenna maka penting kel terus ertoto. Si e iajarkenna alu perumpaman si deban:

“I bas sada kota, lit sekalak hakim si la mbiar man Dibata janah la mehamat man kalak. I bas kota e lit ka sekalak diberu si mbalu si terus ndahi ia janah nina, ‘Banlah keputusen si adil antara aku ras lawanku i pengadilen.’ I bas piga-piga waktu, la nggit hakim e, tapi dungna nina bas ukurna, ‘Aminna pe la aku mbiar man Dibata janah la nghamati kalak, tapi erkiteken diberu si mbalu enda terus ngganggu aku, kusampatilah ia gelah datna keadilen, alu bage lanai rusur idahina aku janah lanai ilatihina aku alu tuntutenna.’”​—Lukas 18:​2-5.

Kerna pemindon e, nina Jesus, “Begiken kai nina hakim e, aminna pe la ia kalak benar! Adi bage, pastilah ibereken Dibata keadilen man kalak si ipilihNa, si erlebuh man baNa suari ras berngi janah Ia pe sabar nandangi kalak e.” (Lukas 18:​6, 7) Kai ate Jesus si ijelaskenna kerna Bapakna?

Maksud Jesus, Dibata Jahwe labo seri ras hakim si la adil e. Maksudna eme: Adi manusia si la benar pe ijawapna pemindon si la erngadi-ngadi, terlebih-lebih ka Dibata. Ia Dibata si benar ras bujur, pasti ijawapna kalak si terus ertoto. Enda banci siteh arah kai si ikataken Jesus, “Kukataken man kena, pasti mis ibereken Dibata keadilen man kalak e.”​—Lukas 18:8.

Kalak si biasa-biasa saja ras kalak si mesera biasana iperlakoken alu la adil, tapi kalak si erkuasa ras kalak bayak ihamati. Tapi Dibata labo bage. Adi nggo seh pagi waktuna, ibereken Dibata me keadilen, kalak jahat iukumNa janah kalak si nembah Ia ngaloken kegeluhen si rasa lalap.

Si iajarken Jesus eme perlu kita terus ertoto. Gundari, icakapken Jesus kerna kiniteken si iperluken sanga ertoto. Ise si kinitekenna bali bagi diberu si mbalu e? Asa teremna kalak si tek maka “mis ibereken Dibata keadilen man kalak e”? Nina Jesus, “Sanga Anak manusia reh, tuhu-tuhu nge lit idapetina kiniteken si bagenda i bas doni?” (Lukas 18:8) Enda ncidahken maka sanga reh pagi Kristus la nterem kalak si erkiniteken.

Piga-piga kalak si megiken Jesus erpengakap maka kalak e erkiniteken. Iakapna ia lebih benar asangken kalak si deban. Emaka ibereken Jesus perumpaman man kalak e:

“Dua kalak dilaki lawes ku rumah pertoton guna ertoto, sada kalak Parisi ras sada nari pengalo cuke. Cinder kalak Parisi e janah mulai ertoto i bas pusuhna, ‘O Dibata, bujur ningku perban aku la bagi kalak si deban, la bagi tukang kompas, kalak si la benar, perlua-lua, ntah pe bagi pengalo cuke ah. Dua kali seminggu aku erpuasa. Kubereken sepersepuluh arah kerina penghasilenku.’”​—Lukas 18:​10-​12.

 Ate kalak Parisi gelah ikataken jelma si nterem kalak e kalak si benar janah gelah ipuji-puji kalak. Contohna tiap wari Senin ras Kamis nterem jelma i pajak, janah i je me kalak e puasa gelah idah kalak. Selain si e, tutus kel ate kalak e mereken sepersepuluh arah sinuan-sinuan. (Lukas 11:42) Piga-piga bulan si lewat, nina kalak e alu sombong, “Jelma si nterem enda, si la meteh Undang-Undang Musa, labo kap merga i lebe-lebe Dibata.”​—Johanes 7:​49.

Jenari iterusken Jesus perumpaman e, “Tapi pengalo cuke e cinder arah ndauh, natap ku langit pe la ia pang tapi itemtemina tentenna, nina, ‘O Dibata, mekuah min ateNdu aku, kalak perdosa enda.’” Pengalo cuke e meteruk ukur janah itehna kelemahenna. Emaka nina Jesus, “Kukataken man kena, sanga dilaki enda mulih ku rumahna, ia terbukti lebih benar asangken kalak Parisi e. Sebap ise pe si ipeganjangna bana ipemelaken me, tapi ise pe si ipeterukna bana ipeganjang me.”​—Lukas 18:​13, 14.

Pelajarenna, penting kel meteruk ukur. Persinget e erguna kel man murid-muridna si lit i tengah-tengah kalak Parisi si sombong ras mentingken keduduken. Janah persinget e erguna man kerina pengikut Jesus.