Enggo ibereken Jesus pelajaren si penting sanga ia man i rumah sekalak peminpin Parisi. Gundari, ilanjutken Jesus perdalanenna ku Jerusalem, janah nterem kalak ngikutken ia. Nggit kin kalak e jadi pengikut Jesus la soal pengorbanen kai pe si arus ilakoken kalak e?

I bas perdalanen, ikataken Jesus kai si banci saja erban piga-piga kalak sengget, nina, “Adi lit kalak si reh bangku janah kelengen atena bapakna, mamakna, diberuna, anak-anakna, seninana, turangna, bage pe dirina sendiri, la ia banci jadi muridku.” (Lukas 14:26) Kai maksudna?

Si imaksud Jesus eme la banci kelengen ate pengikutna man keluargana asangken man Jesus. Pengikut Jesus la banci bagi dilaki i bas perumpaman Jesus si la ngaloken undangen ku pesta si mbelin perban mbaru denga ia erjabu.​—Lukas 14:20.

Ikataken Jesus maka la banci ikelengi muridna “dirina sendiri,” ntah geluhna sendiri. Selaku murid, arus kelengen atena Jesus asangken dirina sendiri, enda ertina arus ia nggit mate guna Jesus. Jelas me, guna jadi sekalak murid Jesus, perlu kel iukuri alu mbages sebap si e tanggung jawap si serius.

Banci saja, murid-murid ngenanami kiniseran ras isiksa pagi, emaka nina Jesus, “Ise pe si la maba tiang siksanna janah la ngikutken aku, la banci jadi muridku.” (Lukas 14:27) Bali bagi Jesus, murid-murid arus nggit ngenanami kiniseran, misalna ihina, bage pe ibunuh musuh.

Emaka, jelma si nterem si ras Jesus e arus tuhu-tuhu iukurina kerna ngasup ntah lang kalak e jadi murid Kristus. Gelah reh menukahna iangkai kalak e, iceritaken Jesus perumpaman, “Adi lit i bas kena nari atena mbangun sada menara, tentu kundul ia lebe janah ikirana biayana guna meteh bias nge ntah lang senna i bas ndungisa. Adi la bage, banci saja pondasina ngenca terbangunna tapi la banci idungina.” (Lukas 14:​28, 29) Emaka, ope lenga jadi murid Jesus, jelma si nterem si ras Jesus e arus tuhu-tuhu ngasup kapna bana ndalanken tanggung jawap. Iceritaken Jesus ka perumpaman si deban:

“Adi lit raja si erperang atena ras raja si deban, tentu kundul ia lebe janah ipindona pedah guna meteh ngasup nge ia ntah lang alu 10.000 tentera ngelawan raja si 20.000 tenterana. Adi la ia ngasup, isuruhna me sada kelompok utusenna mindo perdamen sanga ndauh denga musuh ndai. Bage ka pe, teklah kena, la banci kena jadi muridku adi la itadingken kena kerina erta kena.”​—Lukas 14:​31-​33.

Ranan Jesus e labo ngenca man jelma si nterem si lit i je. Ise pe si nggit jadi pengikutna arus nggit ngelakoken kerina e. Arus nggit mereken pengorbanen kai pe, termasuk geluhna. Emaka ope lenga erban keputusen, arus iukuri kel alu mbages janah ertoto.

Gundari, icakapken Jesus kerna si nggo pernah ipesehna i bas Kotbahna i Deleng. Paksa si e, ikatakenna murid-muridna “sira doni.” (Matius 5:​13) Bali bagi sira si banci erban pangan la meter macik, murid-murid pe nampati kalak si deban gelah la ngelakoken perbahanen si la mehuli janah ndauh i bas Dibata nari. Gundari, nina Jesus, “Sira tuhu mehuli. Tapi adi sira lanai masin, alu kai nari banci ipemasin?” (Lukas 14:34) I bas paksa si e, kalak si megiken Jesus meteh maka melala sira si idayaken nggo icampur pasir, emaka lanai lit gunana.

Arah perumpaman e, siteh maka kalak si nggo ndekah jadi murid Jesus pe arus tetap semangat. Ula min sempat jadi la erguna bagi sira si lanai masin janah iambekken kalak. Bicara sempat e terjadi, Dibata la senang janah kalak si deban pe banci dungna nghina Dibata. Iahken Jesus, “Ise pe si ercuping, begikenlah.”​—Lukas 14:35.