Gundari nggo “jam 12” ciger. Kerina daerah e gelap “seh asa jam 3 karaben.” (Markus 15:33) Seh kel gelapna tapi enda labo perban gerhana. Gerhana biasana terjadi sanga bulan baru, tapi enda sangana minggu Paskah janah bulan purnama. Adi gerhana kentisik ngenca gelap tapi enda seh kel dekahna. Enda pasti Dibata si erbanca!

Bayangken uga perasan si nokohi Jesus sanga si e. Paksa si e, lit empat diberu si ndeheri tiang siksan. Kalak e eme nande Jesus, Salome, Maria Magdalena, Maria nande rasul Jakup si Kitik.

Rasul Johanes ras Maria si sangana erceda ate lit “i deher tiang siksan.” Itatap Maria anakna si ipebelinna e sangana ipakuken, seri akapna suina bagi itebak “sada pedang si gedang.” (Johanes 19:25; Lukas 2:​35) Amin pe mesui kel iakap Jesus, sempat denga ia ngukuri nandena. Ipala-palaina nulihken Johanes janah nina man nandena, “O Nande, gundari nari ia me anakndu!” Jenari itulihkenna ka ku Maria, janah nina man Johanes, “Gundari nari, ia me nandendu!”​—Johanes 19:​26, 27.

Ibereken Jesus tanggung jawap ngurus nandena si nggo mbalu e man Johanes, rasul si ikelengina. Erkiteken iteh Jesus maka seninana lenga tek man ia. Selain nikapken keperlun nandena iperdiateken Jesus ka keperlun rohani nandena. Enda tuhu-tuhu usihen si mehuli!

Kenca lanai gelap, nina Jesus, “Muas aku.” Enda erbanca kai si ikataken bas kitap si badia terjadi. (Johanes 19:28; Masmur 22:16) Iteh Jesus maka sanga si e ia la ilindungi Bapakna, gelah kesetian Jesus tuhu-tuhu teruji. Nina Jesus, “Eli, Eli, lama sabakhtani?” si ertina, “O Dibataku, Dibataku, ngkai maka itadingkenNdu aku?” Piga-piga kalak si cinder i je mulai ngataken, “Nen! Ilebuh-lebuhna Elia.” Kenca si e, lit sekalak si kiam, irendamna sada bunga karang i bas anggur si macem, itamana e ku bas buluh, kenca si e iberekenna man Jesus gelah inemna. Jenari ning kalak e, “Pediat saja ia! Sinen ntah reh kin Elia mpenusursa.”​—Markus 15:​34-​36.

Nina Jesus, “Enggo dung!” (Johanes 19:30) Kerina si isuruh Bapakna nggo dung ilakokenna bas doni. Dungna nina Jesus, “O Bapak, kuserahken geluhku ku bas tanNdu.” (Lukas 23:46) Tek Jesus maka banci ia ipegeluh Jahwe mulihi. Kenca bage nina, mate me ia.

Kenca si e, terjadi gempa si megegeh, janah batu-batu pe pecahen. Perban gegehna gempa e, kuburen-kuburen si lit i darat Jerusalem pe terbuka janah mayat-mayat pe merap ku darat. Kalak si ngidah kejadin e dungna lawes ku “kota si badia” janah ikatakenna kai si idahna.​—Matius 12:11; 27:​51-53.

 Sanga Jesus mate, tirai si mekapal ras gedang si misahken Ingan si Badia ras Ingan Sibadiana bas rumah pertoton merigat jadi dua, merigat datas nari ku teruh. Kejadin si luar biasa enda mbuktiken maka Dibata merawa man kalak si munuh AnakNa. Kejadin e pe ngertiken maka mulai paksa si e terbuka me dalan man manusia guna masuk ku Ingan Sibadiana eme surga.​—Heber 9:​2, 3; 10:​19, 20.

Kerina kalak e jadi mbiar. Sanga perwira si njaga ia ngidah kejadin e, nina, “Ia pasti Anak Dibata.” (Markus 15:39) Banci saja ibegi perwira e sanga iakui Jesus maka ia anak Dibata paksa iadili Pilatus. Gundari nggo tek perwira e maka si ikataken Jesus e tuhu, ia me Anak Dibata.

Kenca terjadi kejadin si luar biasa e, mulih me jelma si nterem ku rumahna janahna ‘mekpeki bana’ perban mela janah ceda kel ate kalak e. (Lukas 23:48) Enterem kalak si ngenen kematen Jesus arah dauh-dauh nari, termasuk murid-murid Jesus si diberu si pernah ikut ras ia erberita. Kalak e pe ikut ngidah kejadin si luar biasa e.