Sanga itadingken Jesus Jerusalem i bas wari Senin ciger, mulih ia ku Betani si lit i bagin timur i Deleng Saitun. Banci jadi erberngi ia i rumah temanna eme Lasarus, Maria, ras Marta.

Gundari erpagi-pagi tanggal 11 Nisan. Jesus ras murid-muridna lawes ka ku Jerusalem. Enda me wari si terakhir Jesus ku rumah pertoton ras ngajar jelma si nterem. Kenca si e irayakenna me Paskah, itetapkenna ka Peringet-ingeten kerna kematenna, jenari iadili me ia ras iukum mate.

Sanga kalak e erdalan arah Betani nari ngelewati Deleng Saitun ku Jerusalem, idah Petrus batang ara si isumpahi Jesus nderbih, nina, “O Guru, nenlah! Batang ara si isumpahindu e nggo kerah.”​—Markus 11:21.

Engkai maka iban Jesus batang ara e kerah? Nina Jesus, “Situhuna adi lit kiniteken kena janah la kena ragu-ragu, labo ngenca banci iban kena bagi si kuban man batang ara e, tapi adi ikataken kena pe man deleng enda, ‘Angkatlah bandu jenari benterken bandu ku lawit,’ e banci terjadi. Adi erkiniteken kena, kerina si ipindo kena i bas toto pasti ialoken kena.” (Matius 21:​21, 22) Mulihi ka ikataken Jesus maka kiniteken banci mindahken deleng.​—Matius 17:20.

Alu erban batang ara e kerah, iajarken Jesus gelah kalak e erkiniteken man Dibata. Nina Jesus, “Kerina si itotoken kena ras si ipindoken kena, erkinitekenlah maka e nggo ialoken kena janah pasti ialoken kena.” (Markus 11:24) Seh kel pentingna pelajaren e man kerina pengikut Jesus! Terutama man rasul-rasulna si nandangi ngadapi percuban si mberat. Tapi lit denga pelajaren si deban arah batang ara si kerah e kerna kiniteken.

Bagi batang arah e, penampilen bangsa Israel banci nipu. Nggo lit perjanjin bangsa enda ras Dibata. Tempa-tempa ipatuhi kalak e Undang-Undang Dibata. Tapi bangsa mbuktiken maka kurang kinitekenna janah la ngasilken buah si mejile. Kalak e pe nulak Anak Dibata! Emaka, alu erban batang ara si la erbuah e jadi kerah, icidahken Jesus kai pagi si terjadi man bangsa e si la erbuah ras si la erkiniteken.

La ndekah kenca si e, Jesus ras murid-murid masuk ku Jerusalem. Bagi biasa, Jesus lawes ku rumah pertoton janah mulai ia ngajar. Imam-imam kepala ras peminpin-peminpin agama segat atena Jesus. Banci saja erkiteken perbahanen Jesus man kalak si nukari sen bas rumah pertoton, ning kalak e, “Ja nari datndu kuasa ngelakoken kerina enda? Ise si mereken kuasa e man bandu?”​—Markus 11:28.

Ngaloi Jesus, “Aku pe lit sada penungkunenku man kena. Jawap dage aku gelah kujawap ka kari i ja nari kudat kuasa ngelakoken enda kerina. Peridin Johanes e, i bas surga nari nge ntah i bas manusia nari? Jawap dage.” Gundari Jesus si nungkun kalak e. Arih-arih kalak e guna njawapsa, “Adi sikataken, ‘Surga nari,’ ikatakenna ka kari, ‘Engkai kena la tek man bana?’ Tapi pang nge kita ngatakenca, ‘I bas manusia nari’? Mbiar kalak e man jelma si nterem, sebap kerina kalak tek maka Johanes tuhu-tuhu sekalak nabi.”​—Markus 11:​29-​32.

La banci ijawap kalak e Jesus. Emaka nina kalak e man Jesus, “La iteh kami.” Ijawap Jesus ka, “Aku pe la kukataken man kena ja nari kudat kuasa ngelakoken enda kerina.”​—Markus 11:33.