I bas Deleng Saitun nggo iceritaken Jesus perumpaman kerna sepuluh singuda-nguda ras talenta. Gundari iceritakenna perumpaman si terakhir kerna biri-biri ras kambing. Enda kerina jawapen nandangi penungkunen rasul-rasul kerna kerehen Jesus bage pe pendungi jaman enda.

Imulai Jesus me nceritaken perumpaman enda, nina, “Sanga Anak manusia reh i bas kemulianna, janah kerina malekat-malekat ikut ras ia, kundul me ia pagi i tahtana si mulia.” (Matius 25:31) Sebelumna rusur ikataken Jesus maka ia “Anak manusia.” Jadi ia me si rusurna icakapken i bas perumpaman enda.​—⁠Matius 8:​20; 9:6; 20:​18, 28.

Ndigan perumpaman enda terjadi? Si enda terjadi sanga Jesus “reh i bas kemulianna” ras malekat-malekatna janah kundul i bas “tahtana si mulia.” Nggo pernah icakapkenna kerna “Anak manusia reh i datas embun i langit alu kuasa ras kemulian si mbelin” ras malekat-malekatna. Ndigan si e terjadi? “Kenca wari-wari kiniseran e.” (Matius 24:​29-​31; Markus 13:​26, 27; Lukas 21:27) Jadi, perumpaman enda terjadi pagi sanga reh Jesus i bas kemulianna. Kai pagi si ilakokenna?

Nina Jesus, “Sanga Anak manusia reh . . . , kerina pagi bangsa ipepulung i lebe-lebena janah ipisahkenna pagi kalak e, bali bagi permakan misahken biri-biri i bas kambing nari. Itamana pagi biri-biri arah kananna, tapi kambing-kambing arah kirina.”​—Matius 25:​31-33.

Nina Jesus man biri-biri si ngena atena, “Kenca si e, nina Raja man si arah kananna, ‘Mari, kena si nggo ipasu-pasu Bapakku, alokenlah Kerajan si nggo isikapken man kena mulai kin doni enda ijadiken.’” (Matius 25:34) Ngkai maka ngena ate Raja nandangi biri-biri e?

Nina Raja, “Sanga aku melihe, ibere kena aku man. Sanga aku muas, ibere kena aku minem. Sanga aku jadi kalak pertandang, ialoken kena aku alu mehuli. Sanga aku la ruis, iuisi kena aku. Sanga aku sakit, iurus kena aku. Sanga aku bas penjara, idahi kena aku.” Biri-biri enda eme “kalak si benar.” Sanga isungkun kalak e katawari kin ilakokenna perbahanen si mehuli e, nina Raja, “Kai pe si ilakoken kena man sekalak i bas seninaku si kitikna enda, ilakoken kena e man bangku.” (Matius 25:​35, 36, 40, 46) Si e labo ilakoken kalak e bas surga, sebap i je labo lit kalak si sakit ntah pe si melihe. Enda pasti ilakoken man senina-senina Kristus i doni.

Kai si terjadi man kambing si lit i sebelah kiri Jesus? Nina Jesus, “Kenca si e nina [Raja] pagi man si arah kirina, ‘Kena si nggo isumpahi, laweslah i bas aku nari, ku bas api si la banci mate si nggo isikapken man Iblis ras malekat-malekatna. Sebap sanga aku melihe, la ibere kena aku man, janah sanga aku muas, la ibere kena aku minem. Sanga aku jadi kalak pertandang, la ialoken kena aku alu mehuli. Sanga aku la ruis, la iuisi kena aku. Sanga aku sakit janah i bas penjara, la iurus kena aku.’” (Matius 25:​41-​43) Pengukumen enda cocok perban kambing-kambing e la mehuli perbahanenna man senina-senina Kristus i doni.

Nina Jesus ka, “Emaka [ikataken Raja], ‘Situhuna, kai pe si la ilakoken kena man sekalak i bas si kitikna enda, la ka ilakoken kena e man bangku.’ Kalak enda pagi mate si rasa lalap, tapi kalak si benar ngaloken kegeluhen si rasa lalap.” (Matius 25:​45, 46) Jadi iteh rasul-rasul maka penghakimen e si nentukenca sekalak jelma banci nggeluh si rasa lalap ntah mate si rasa lalap.

Ijawap Jesus penungkunen rasul-rasulna gelah pengikutna banci rukur ras nampati kalak e mereksa perbahanenna.