Sanga Jesus ras rasul-rasulna bas ruangen i loteng, nina Jesus man kalak e, “Ula pediat latih ukur kena. Erkinitekenlah man Dibata, janah erkiniteken ka lah man bangku.”​—Johanes 13:36; 14:1.

Ikataken Jesus alasenna ngkai maka la perlu kalak e mbiar kenca lawes ia. Nina, “Melala ingan tading i bas rumah Bapakku. . . . Aku lawes nikapken ingan man kena, reh denga pagi aku janah kubaba kena ku inganku e. Alu bage, i ja aku, i je ka kena.” La iteh rasul-rasul maka Jesus sangana ncakapken kerna dirina si nandangi lawes ku surga. Nina Tomas, “O Tuan, la kap teh kami i ja ingan si idahindu e. Uga ka maka banci teh kami dalanna?”​—Johanes 14:​2-5.

Ijawap Jesus, “Aku kap dalan, kebenaren, ras kegeluhen.” Kalak si banci masuk ku rumah Bapak i surga eme kalak si ngaloken Jesus ras ajarenna bage pe kalak si ngusih ia. Nina Jesus, “Ise pe la banci ndahi Bapak adi la kin arah aku.”​—Johanes 14:6.

Nina Pilipus, “O Tuan, cidahken dage Bapak man kami, gelah puas iakap kami.” Banci saja merhat Pilipus ngidah Dibata bagi si nggo pernah iban Dibata man Musa, Elia, ras Jesaya. Situhuna kai si idatken rasul-rasul e ndauh ulin asangken kai si idah Musa, Elia, ras Jesaya. Nina Jesus, “Bage dekahna aku nggo ras kena. Tapi kam, o Pilipus, lenga kin itandaindu aku? Ise si nggo ngidah aku, nggo ka idahna Bapak.” Seri kel sipat-sipat Jesus ras Bapakna. Perban rusur rasul-rasul e ras Jesus janah banci idah kalak e sipat-sipat Jesus, kalak e bagi nggo ngidah Bapak. Memang belinen nge Bapak e asangken Anak. Nina Jesus, “Kerina si kukataken man kena, labo i bas aku nari.” (Johanes 14:​8-​10) Iteh rasul-rasul maka iakui Jesus kai si iajarkenna e rehna arah Bapakna nari.

 Enggo idah rasul-rasul Jesus erban mukjizat ras mberitaken berita si meriah kerna Kerajan Dibata. Gundari ikataken Jesus man kalak e, “Ise pe si erkiniteken man bangku, ilakokenna ka nge pendahin si kulakoken, janah ilakokenna pagi pendahin si terbelinen.” (Johanes 14:12) Labo maksudna ilakoken rasul-rasul pagi mukjizat si hebaten asangken si nggo ilakoken Jesus. Maksudna eme dekahen pagi kalak e erberita, belangen daerahna erberita, janah buen kalak si ijumpai kalak e.

Amin pe Jesus nandangi lawes, labo itadingkenna rasul-rasulna. Erjanji Jesus, “Kai pe si ipindo kena i bas gelarku, kubereken nge.” Ikatakenna ka, “Kupindoken me man Bapak, janah iberekenNa man kena penampat si deban, si rasa lalap ras kena, eme kesah si badia si ncidahken kebenaren.” (Johanes 14:​14, 16, 17) Ijamin Jesus maka ialoken murid-muridna pagi kesah si badia. Si enda terjadi i bas wari Pentakosta.

Nina Jesus, “Kentisik nari, lanai bo idah doni enda aku. Tapi kena, idah kena nge aku, perban aku nggeluh janah kena pe nggeluh ka nge pagi.” (Johanes 14:19) Kenca Jesus ipekeke janah sope lawes ia ku surga, banci idah murid-muridna ia. Janah i bas wari si pepagi murid-muridna e pe ipekeke janah ras Jesus i surga.

Kenca e ikataken Jesus, “Ise pe si ngaloken janah ndalanken perentah-perentahku, eme kalak si ngkelengi aku. Kalak si ngkelengi aku, ikelengi Bapakku ka nge, janah aku pe ngkelengi ia ras kucidahken me diriku alu jelas man bana.” Nungkun rasul Judas, si igelari ka Tadius, nina, “O Tuan, kai kin si terjadi maka icidahkenndu dirindu alu jelas man kami tapi man doni enda lang?” Ijawap Jesus, “Ise pe si ngkelengi aku, ipatuhina nge kataku. Bapakku pe ngkelengi ia. . . . Ise pe si la ngkelengi aku, labo ipatuhina kata-kataku.” (Johanes 14:​21-​24) La bagi pengikut Jesus, jelma si nterem la nggit ngakui maka Jesus kap dalan, kebenaren, ras kegeluhen.

Kenca lawes Jesus, uga banci iinget murid-muridna kai si nggo iajarkenna? Nina Jesus, “Penampat e, eme kesah si badia, si ikirimken Bapak pagi i bas gelarku, iajarina pagi kena kerna kai pe janah ingetkenna kerna kerina si nggo pernah kukataken man kena.” Enggo idah rasul-rasul uga hebatna kesah si badia e, kai si ikataken Jesus e pasti erban kalak e tenang. Nina Jesus ka, “Kutadingken man kena kedamen. Kubereken man kena kedamenku. . . . Ula pediat latih ukur kena ntah pe mbiar.” (Johanes 14:​26, 27) Murid-murid Jesus itegu-tegu ras ilindungi Jahwe, emaka la perlu kalak e mbiar.

Kentisik nari idah kalak e me bukti maka Dibata e tetap ngelindungi. Nina Jesus, “Reh me penguasa doni enda. Tapi labo ia erkuasa nandangi aku.” (Johanes 14:30) Judas nggo berhasil ikuasai Iblis, tapi Jesus la banci ikuasai Iblis. La lit kelemahen Jesus si banci igunaken Iblis guna ngambati peraten Dibata. Kematen pe la banci igunaken Iblis guna naluken Jesus. Engkai maka lang? Nina Jesus, “Kulakoken kai si iperentahken Bapak.” Perban belinen Bapak asangken Jesus, tek Jesus maka banci ipekeke Bapakna ia.​—Johanes 14:31.