I bas wari Minggu tanggal 16 Nisan nggo kosong kuburen Jesus. Enda erban murid-murid sedih ras bingung. (Matius 28:​9, 10; Lukas 24:11) I bas wari e, lawes me Kleopas ras murid si deban arah Jerusalem nari ku Emaus si dauhna kira-kira 11 kilometer.

Kalak e paksana ercakap-cakap kerna kai si nggo terjadi. Jenari reh sekalak dilaki janah ikut erdalan ras kalak e. Nina dilaki e nungkun, “Kai nge si sangana icakapken kena e?” Nina Kleopas, “Kalak pertandang nge kam i bas Jerusalem enda maka la itehndu kai si terjadi pudi wari enda?” Nungkun ka dilaki e, “Kai kin?”​—Lukas 24:​17-​19.

Ijawap kalak e, “Kerna Jesus kalak Nasaret. Iarapken kami maka ia me si mbebasken Israel.”​—Lukas 24:​19-​21.

Kenca e, iceritaken Kleopas ras temanna ndai kai si terjadi i bas wari e. Ikataken kalak e maka lit piga-piga diberu si lawes ku kuburen Jesus, tapi nggo kosong kuburen e. Kenca e, iidah diberu-diberu e kejadin si luar biasa. Lit malekat-malekat si ngataken maka Jesus nggo nggeluh. Piga-piga murid si deban pe reh ku kuburen janah “idapeti kalak e tuhu bagi si ikataken diberu-diberu ndai.”​—Lukas 24:24.

La iangkai Kleopas ras temanna e kai kin situhuna si terjadi. Jadi, isampati dilaki e atena gelah isadari kalak e maka Jesus nggo ipekeke. Nina dilaki e, “O Bodoh, mesera kel kena tek nandangi kai si ikataken nabi-nabi! La kin arus inanami Kristus kiniseran gelah ia imuliaken?” (Lukas 24:​25, 26) Kenca e, melala ijelasken dilaki e keterangen kerna Kristus si itulis i bas Kitap si Badia.

Teluna kalak e nandangi seh i Emaus. Tapi merhat denga dua murid e megi penjelasen dilaki ndai, emaka ning kalak e, “I jendalah kita, sebap wari nggo ben janah nandangi gelap.” Emaka tading ia ras kalak e. Sanga ia man ras kalak e, ertoto ia, icepik-cepikkenna roti e, janah ibagikenna man kalak e. Dungna, itandai kalak e Jesus, tapi rempet lanai idahna Jesus. (Lukas 24:​29-​31) Gundari nggo tek kalak e maka Jesus nggo nggeluh!

Semangat kel kalak e duana ngerana, nina, “Balosam malem kel ateta ngerana ras ia bas dalan ndai paksa ijelaskenna Kitap si Badia man banta?” (Lukas 24:32) Minter kalak e mulihken ku Jerusalem janah ijumpaina rasul-rasul ras murid-murid si deban. Ope lenga si dua kalak e ngerana, ikataken murid-murid e, “Tuhu-tuhu Tuan nggo ipekeke janah icidahkenna bana man Simon!” (Lukas 24:34) Jenari iceritaken si dua kalak enda uga kalak e ngidah Jesus.

Rempet cinder Jesus i tengah-tengah kalak e! Sengget kel murid-murid e, erkiteken ikunci kalak e pintu perban mbiar man kalak Jahudi. Tapi gundari Jesus tuhu-tuhu lit i tengah-tengah kalak e. Alu tenang nina Jesus man kalak e, “Mbera lit kedamen i bas kena.” Tapi mbiar kalak e kerina. Bagi si mbarenda, ‘iakap kalak e si idahna e begu.’​—Lukas 24:​36, 37; Matius 14:​25-​27.

Gelah tek kalak e maka Jesus labo begu, icidahkenna tan ras nahena, nina, “Engkai maka kena mbiar? Engkai maka kena ragu? Enda aku, nenlah tan ras naheku. Dadap aku janah nen, begu la lit daging ras tulanna, tapi aku lit daging ras tulanku bagi si idah kena.” (Lukas 24:​36-​39) Seh kel riahna iakap kalak e janah kemamangen kalak e, tapi lenga kalak e tuhu-tuhu tek nandangi kai si idahna.

 Gelah reh tekna kalak e, nina Jesus, “Lit pangan kena?” Ibereken kalak e sada potong ikan si nggo ipanggang janah ipan Jesus. Jenari nina Jesus, “Sanga aku ras kena denga [ope lenga aku mate] pernah kukataken maka kerina si tertulis i bas Undang-Undang Musa, Ajaren Nabi-Nabi, ras Masmur arus terjadi.”​—Lukas 24:​41-​44.

Enggo isampati Jesus si Kleopas bage pe temanna guna ngangkai Kitap si Badia. Gundari isampati Jesus atena kalak si lit i je, nina, “Lit tertulis maka inanami Kristus pagi kiniseran janah ipekeke i bas si mate nari i bas wari si peteluken, janah i bas gelarna berita kerna pertobaten guna pengampunen dosa, iberitaken pagi man kerina bangsa mulai Jerusalem nari. Kena me si jadi saksi i bas kerina enda.”​—Lukas 24:​46-​48.

Paksa si e, rasul Tomas la lit i je. I bas pudi wari, semangat kel kalak e ngatakenca man Tomas, “Enggo idah kami Tuan!” Nina Tomas, “Adi lenga kin kuidah bekas paku i bas tanna, janah adi lenga kin kutamaken jari-jariku ku je, bage pe adi lenga kin kujemak tulan rangrangna, labo aku tek.”​—Johanes 20:25.

Waluh wari kenca si e, pulung ka murid-murid bas ruangen si ikunci. Sekalenda lit Tomas i je. Rempet reh Jesus ku je, nina, “Mbera lit kedamen i bas kena.” Nina Jesus man Tomas, “Tamakenlah jari-jarindu ku jenda, nenlah tanku, janah jemaklah tulan rangrangku. Ula nai kam ragu, tapi teklah.” Nina Tomas, “O Tuanku ras Dibataku!” (Johanes 20:​26-​28) Gundari Tomas nggo tek maka Jesus si isuruh Dibata, nggo tuhu-tuhu nggeluh.

Nina Jesus, “Perban nggo idahndu nge aku maka kam nggo tek? Ermeriah ukurlah kalak si tek aminna pe lenga idahna.”​—Johanes 20:29.