Kenca Jesus iperidiken, mis icubai Iblis ia piga-piga kali. Ope lenga imulai Jesus pe pelayanenna, iusahaken musuh e kel gelah gagal Jesus. Ikataken Jesus kerna si jahat e, “Reh me penguasa doni enda. Tapi labo ia erkuasa nandangi aku.”​—Johanes 14:30.

Banci iidah rasul Johanes kai si nandangi terjadi man ‘naga si galang e, nipe si pertama, si igelari Iblis ras Setan.’ Musuh manusia si kejam e isampetken arah surga nari, janah “merawa kel ia sebap itehna maka waktuna kentisik nari ngenca.” (Ketangkasen 12:​9, 12) Melala bukti man kalak Kristen maka ‘waktu tading kentisik nari ngenca.’ Kentisik nari, ‘naga eme nipe si pertama,’ isampetken ku lubang si seh kel bagesna janah la banci erkai pe sedekah 1.000 tahun, eme paksa Jesus merentah bas Kerajan Dibata.​—Ketangkasen 20:​1, 2.

Sedekah 1.000 tahun e, kai si terjadi i doni? Ise saja si tading i je janah uga keadanna? Ipebetehken Jesus jawapenna. I bas perumpaman kerna biri-biri ras kambing, ikatakenna kai masa depan man kalak si bujur si bali bagi biri-biri, si nggit nampati senina-senina Jesus. Ikataken Jesus ka kai si nandangi terjadi man kalak si bali bagi kambing. Nina Jesus, “Kalak enda pagi [si bagi kambing] mate si rasa lalap, tapi kalak si benar [si bagi biri-biri] ngaloken kegeluhen si rasa lalap.”​—Matius 25:46.

Si enda nampati kita ngangkai kai maksud kata-kata Jesus man penjahat si ipakuken i sampingna. Janji Jesus man penjahat e la seri ras janjina man rasul-rasulna si setia. Rasul-rasulna e ikut pagi merentah ras Jesus bas Kerajan Dibata. Tapi man penjahat si nggo ertobat e ikataken Jesus, “Situhuna kukataken bandu wari enda: Kam ras aku i Pardis pagi.” (Lukas 23:43) Man dilaki e ibereken arapen nggeluh i Pardis, taman si seh kel jilena. Emaka banci sidat kesimpulen eme kerina kalak si bagi biri-biri nggeluh ka i Pardis pagi.

Uga pagi keadanna bas doni? Nina rasul Johanes, “Kemah Dibata lit i tengah-tengah manusia. Ras manusia me Ia tading, janah jadi umatNa me manusia. Ras kalak e me Dibata. Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.”​—Ketangkasen 21:​3, 4.

Penjahat si i sebelah Jesus pe ipekeke pagi guna nggeluh i Pardis. Janah labo ia saja si ipekeke. Nina Jesus, “Reh me waktuna maka kerina kalak si lit i bas kuburen megi sorana pagi, jenari ndarat me. Kalak si mehuli perbahanenna ipekeke guna nggeluh si rasa lalap, tapi kalak si jahat perbahanenna ipekeke guna ihakimi.”​—Johanes 5:​28, 29.

Uga kerna rasul-rasul Jesus si setia bage pe kalak si deban si ikut pagi ras Jesus ku surga? Nina Pustaka, “Kalak e me pagi si jadi imam-imam Dibata ras imam-imam Kristus. Kalak enda merentah jadi raja-raja radu ras Kristus sedekah 1.000 tahun.” (Ketangkasen 20:6) Raja-raja si ikut merentah ras Kristus e tangtangna dilaki ras diberu si lit i doni. Emaka pastilah banci iangkai kalak e janah mekuah atena manusia i doni.​—Ketangkasen 5:​10.

Paksa si e, manpaat korban tebusen Jesus e banci tuhu-tuhu igejapken manusia i doni. Lanai pagi kalak e ipengaruhi dosa janah kematen pe lanai lit! Isampati Jesus ras teman-temanna pagi manusia jadi sempurna. Kerina kalak e pagi nggeluh ermeriah ukur. Kegeluhen si bage me si tangtangna ibereken Dibata man Adam ras Hawa. Ate Dibata gelah kalak e ermeriah ukur janah kesusurenna ndemi doni enda.

I bas akhir Pemerentahen Jesus si Seribu Tahun, kerina si ipindoken Jahwe nggo dung ilakoken Jesus. Kenca e, ibereken Jesus me Kerajan surga e bage pe kerina manusia si nggo sempurna man Bapakna. Jesus tuhu-tuhu meteruk ukur, itulisken rasul Paulus kerna si e, nina, “Kenca kerina iban patuh man Kristus, Kristus selaku Anak pe patuh man Dibata si nggo erban kerinana patuh man bana, alu bage Dibata ngenca si jadi Penguasa kerinana.”​—1 Korinti 15:28.

Jelas me, tuhu-tuhu penting kel tugas Jesus i bas njadiken peraten Dibata. I bas wari si pepagi, janah seh rasa lalap, peraten Dibata e terus pagi ijelasken, janah Jesus terus jadi “dalan, kebenaren, ras kegeluhen.”​—Johanes 14:6.