I bas rumah pertoton paksa wari Senin, 10 Nisan, ikataken Jesus kentisik nari mate me ia. Iteh Jesus maka kerna si e lit pengaruhna man gelar Dibata, nina Jesus, “O Bapak, muliakenlah gelarNdu.” Jenari, terbegi sora i langit nari, “Nggom Kumuliaken janah terus denga ka Kumuliaken.”​—Johanes 12:​27, 28.

Megi si e, mbiar kalak si lit i je janah kemamangen. Lit si erpengakap maka e sora lenggur. Si debanna ngataken, “Lit malekat si ngerana man bana.” (Johanes 12:29) Situhuna, e sora Jahwe! Janah labo enda tangtangna ibegi manusia sora Jahwe ngerana mulai kin Jesus ngelayani i doni.

Telu setengah tahun si lewat, kenca Jesus iperidiken, ibegi Johanes Peridiken sora Dibata ngerana kerna Jesus, “Enda me AnakKu si Kukelengi, ia me si ngena ateKu.” Kenca Paskah tahun 32 M, Jakup, Johanes, ras Petrus ngidah maka salih rupa Jesus. Teluna kalak e megi Dibata ngerana, “Enda me AnakKu, si Kukelengi. Ia me si ngena ateKu. Begikenlah ia.” (Matius 3:​17; 17:5) Tapi gundari, i bas si petelukaliken, banci ibegi jelma si nterem sora Jahwe!

Nina Jesus, “Sora e terbegi guna kena nge, labo guna aku.” (Johanes 12:30) Enda jadi bukti maka Jesus kap Anak Dibata, Mesias si ijanjiken.

Selain si e, segedang geluhna Jesus setia. Alu bage ia jadi usihen man kerina manusia, janah enda jadi bukti maka Setan si Iblis, penguasa doni enda, pantas ikernepken. Nina Jesus, “Gundari, doni enda sangana ihakimi, janah penguasa doni enda nandangi ipelawes.” Jenari nina ka, “Tapi, kenca iangkat aku arah doni enda nari, kutarik me manusia i bas erbage bangsa nari.” (Johanes 12:​31, 32) Alu “iangkat,” ntah pe mate i bas tiang, iban Jesus kalak rembak ras ia gelah banci nggeluh si rasa lalap. Jesus labo talu, tapi kematenna e ngertiken kemenangen.

Sanga ikataken Jesus kerna “iangkat,” ngerana jelma si nterem e, “Ibegi kami arah Undang-Undang Musa maka Kristus tetap lit seh rasa lalap. Engkai maka nindu Anak manusia arus iangkat? Ise kin Anak manusia e?” (Johanes 12:34) Amin pe nggo melala bukti, termasuk arah sora Dibata, teremen kalak si la ngakui maka Jesus kap situhuna Anak Dibata, eme Mesias si ijanjiken.

Bage si nggo pernah ikataken Jesus, ikatakenna ka ia “terang.” (Johanes 8:​12; 9:5) Ijawap Jesus, “Kentisik nari ngenca terang e lit i tengah-tengah kena. Erdalanlah sanga terang e lit denga, gelah la kena ikuasai kegelapen. . . . Sanga lit denga terang e, erkinitekenlah man terang e, gelah kena jadi anak-anak terang.” (Johanes 12:​35, 36) Kenca bage, lawes Jesus, sebap paksa tanggal 10 Nisan e lenga waktuna ia mate. Ia “iangkat” pagi, ntah pe mate i bas tiang, i bas tanggal 14 Nisan.​—Galati 3:​13.

Sedekah pelayanen Jesus, terjadi me kai si ikataken Jesaya sebap nterem kalak Jahudi si la tek man Jesus. Inubuatken Jesaya maka ipepentang me mata bangsa e, iban ukur kalak e jadi piher, janah lanai kalak e mulih man Jahwe guna ipepalem. (Jesaya 6:​10; Johanes 12:40) Teremen kalak Jahudi e keras kepala janah itulakna Jesus selaku Penyelamat si ijanjiken, dalan ndatken kegeluhen.

Nikodemus, Jusup arah Arimatea, nterem kalak si erkuasa “erkiniteken” man Jesus. Idukung kalak e nge Jesus? Ntah, mbiar nge kalak e ipelawes arah ingan pulung kalak Jahudi perban “ngenan atena ndatken kemulian arah manusia”?​—Johanes 12:​42, 43.

Ijelasken Jesus kai si arus ilakoken kalak si erkiniteken man bana, nina, “Ise pe si erkiniteken man bangku, labo man bangku saja ia erkiniteken, tapi erkiniteken ka ia man Si nuruh aku.” Seh kel pentingna kebenaren arah Dibata si iajarken Jesus, emaka ikataken Jesus, “Ise pe si ngidah aku, idahna ka Ia si nuruh aku. Ise pe si nulak aku janah la ialokenna kata-kataku, ihakimi me ia. Kata si nggo kupeseh e pagi si nghakimi ia i bas wari pendungi.”​—Johanes 12:​44, 45, 48.

Ikataken Jesus, “Kai si kukataken labo arah aku nari, tapi Bapak si nuruh aku nge si mereken perentah man bangku kerna kai si arus kukataken ras kai si arus kucakapken. Kuteh maka perentahNa e mereken kegeluhen si rasa lalap.” (Johanes 12:​49, 50) Ieteh Jesus maka kentisik nari iberekenna kegeluhenna man manusia si erkiniteken man ia.​—Roma 5:​8, 9.