Jesus nggo dung ertoto ras rasul-rasulna si setia. “Kenca ngendeken puji-pujin, lawes kalak e ku Deleng Saitun.” (Markus 14:26) Lawes kalak e ku sebelah timur ku taman Getsemane. Rusur Jesus ku je.

Kenca seh kalak e i je, ngadi Jesus i bas ingan si mejile, melala batang saitun i je. Nina Jesus man waluh rasulna, “Kundullah kena i jenda, ertoto aku lebe ku jah.” Tapi ibaba Jesus telu rasulna eme Petrus, Jakup, ras Johanes. Nina Jesus man telu rasulna e, “Ceda kel ateku, tempa mate atena. Timai i jenda janah teruslah erjaga-jaga ras aku.”​—Matius 26:​36-​38.

Kenca si e miser Jesus ku lebe, “erjimpuh ia i taneh janah mulai ertoto.” Kai si itotokenna? Nina Jesus, “Bapak, kerina banci ilakokenNdu. Agui min calung enda i bas aku nari. Tapi, labo peratenku, peratenNdulah si jadi.” (Markus 14:​35, 36) Kai maksud Jesus? La nge ia nggit ndalanken tugasna jadi Si Nebus manusia? Labo bage!

Sanga Jesus i surga banci idahna uga kejamna perbahanen kalak Roma man kalak si ndatken ukumen mate. Kenca Jesus jadi manusia, perasanna bali bagi manusia si banci nggejapken ate mesui. Tapi labo e si terus iukurina. Si jadi tangkelenna eme ia mate bagi penjahat. Enda banci erban gelar Bapakna ihina kalak. Jesus nandangi ipakuken i tiang perban tuduhen nghina Dibata.

Kenca ndekah Jesus ertoto, mulihken ia janah idapetina telu rasulna paksana medem. Nina man Petrus, “La kin banci kena tetap erjaga-jaga sada jam saja ras aku? Teruslah erjaga-jaga janah teruslah ertoto, gelah ula kena nyerah ku bas percuban.” Iteh Jesus nge maka ceda pusuh rasul-rasulna e janah nggo latih akap kalak e. Emaka nina Jesus, “Pusuh tuhu semangat, tapi daging lemah.”​—Matius 26:​40, 41.

Lawes ka Jesus mulihi janah ipindokenna gelah iagui Dibata “calung” e. Kenca si e mulihken ka Jesus janah idapetina kalak e paksana medem. Padahal kalak e arusna ertoto gelah ula nyerah ku bas percuban. Sanga inasehati Jesus kalak e “la iteh kalak e uga njawapsa.” (Markus 14:40) Jenari lawes ka Jesus petelu kaliken, erjimpuh ia janah ertoto.

Getem kel pusuh Jesus perban kematenna selaku penjahat banci erban gelar Bapakna ihina kalak. Ibegiken Jahwe toto AnakNa enda, janah isuruh Jahwe sada malekat guna mpegegehi Jesus. Enggo pe bage, labo ia ngadi ertoto man Bapakna, tapi “terus ia ertoto reh gegehna.” Seh kel beratna tanggung jawap Jesus e! Arapen kegeluhen si rasa lalap man Jesus bage pe man kerina manusia si erkiniteken sangana iperjuangken. Enda me sebapna ngkai maka “naktaken panasna ku taneh bali bagi taktak dareh.”​—Lukas 22:44.

Idahi Jesus ka petelu kaliken rasul-rasulna, janah idapetina ka kalak e paksana medem. Nina Jesus, “Engkai maka kena medem ras istirahat i bas paksa si bagenda? Nenlah! Enggo seh jamna Anak manusia ihianati i bas tan kalak perdosa. Tediskenlah, ota kita lawes. Nen! Si nghianati aku nggo ndeher.”​—Matius 26:​45, 46.