Labo itutup-tutupi Jesus man Pilatus maka ia sekalak raja. Tapi kerajanna labo jadi ancamen man pemerentahen Roma. Nina Jesus, “Kerajanku labo bagin i bas doni enda nari. Adi Kerajanku bagin i bas doni enda nari, pasti nggo iperjuangken pengikut-pengikutku gelah ula aku iserahken man kalak Jahudi. Tapi, Kerajanku labo bagin i bas doni enda nari.” (Johanes 18:36) Payo, lit Kerajan Jesus tapi labo i bas doni enda.

Lenga puas Pilatus megi jawapen Jesus e, emaka nina, “Adi bage, raja dage kam?” Ipediat Jesus ia erban kesimpulen si benar, nina, “Kam sendiri si ngatakenca maka aku raja. Arus kubereken kesaksin kerna kebenaren, perban guna si e me aku ilahirken janah reh ku doni enda. Tiap kalak si ngikutken kebenaren, ibegikenna nge soraku.”​—Johanes 18:37.

Pernah ikataken Jesus man Tomas, “Aku kap dalan, kebenaren, ras kegeluhen.” Gundari Pilatus pe nggo itehna maka tujun Jesus ku doni enda guna ersaksi kerna “kebenaren,” terutama kebenaren kerna Kerajanna. Jesus tetap setia man kebenaren amin pe arus mate. Nungkun Pilatus, “Kai kin kebenaren e?” tapi labo itimaina jawapen Jesus. Enggo bias iakap Pilatus keterangen si ibegina guna erban keputusen.​—Johanes 14:6; 18:38.

Idahi Pilatus mulihi jelma si nterem si lit i darat istana. Banci saja Jesus i deher Pilatus sanga ia ngerana man imam-imam kepala ras man jelma si nterem e, “La lit kudat kesalahen kai pe bas dilaki enda.” Emaka merawa jelma si nterem e megi keputusen e, janah ning kalak e, “Iajuk-ajukna kalak si lit i belang-belang Judea alu pengajarenna. Tangtangna i Galilea, gundari nggo seh jenda.”​—Lukas 23:​4, 5.

Mamang ate Pilatus ngidah jelma si nterem e. Sanga imam-imam kepala ras jelma si lit i je serko, isungkun Pilatus me Jesus, “La kin ibegindu maka seh kel lalana tuduhen kalak e man bandu?” (Matius 27:13) La ialoi Jesus. Mamang ate Pilatus ngidah Jesus tenang saja sanga megi tuduhen e.

Ikataken kalak Jahudi maka Jesus mulai ngajar arah Galilea nari. Perban si e, iteh Pilatus me Jesus kalak Galilea. Emaka, iteh Pilatus uga carana gelah ula ia si ngadili Jesus. Herodes Antipas (anak Herodes Agung) eme penguasa Galilea. Ia sangana i Jerusalem paksa perayan Paskah e. Jadi iserahken Pilatus me Jesus man Herodes. Herodes Antipas enda me si motong kerahung Johanes Peridiken. Emaka sanga ibegina kerina mukjizat si iban Jesus, iakap Herodes maka Jesus e Johanes si nggeluh mulihi.​—Lukas 9:​7-9.

Meriah ukur Herodes banci ngidah Jesus. Labo perban ia merhat nampati Jesus ntah pe mastiken maka tuduhen kalak man Jesus tuhu ntah lang. Tapi ‘ngarap ia banci ngidah mukjizat si iban Jesus.’ (Lukas 23:⁠8) Tapi, la lit kai pe si iban Jesus. Sanga Herodes nungkun Jesus, la ijawap Jesus. Perban kecewa, ‘ihina’ Herodes ras prajuritna me Jesus. (Lukas 23:11) Ipakeken kalak e baju si mejile man Jesus janah itokohi kalak e ia. Kenca si e, ikirim Herodes mulihi Jesus ku Pilatus. Situhuna Herodes ras Pilatus ermusuhen, tapi gundari erteman meriah kalak e.

Sanga Jesus nggo mulih, ilebuh Pilatus kerina imam-imam kepala, penguasa kalak Jahudi, ras jelma si nterem, nina, “Enggo kuperiksa ia i lebe-lebe kena, tapi la lit kudat salahna bagi si ikataken kena ndai. Herodes pe la idatna salahna, emaka ikirimna ia mulihken man kami. La lit kai pe si erbanca ia patut iukum mate. Emaka, kuligasi sajalah ia jenari kubebasken.”​—Lukas 23:​14-​16.

Iusahaken Pilatus kel mbebasken Jesus. Itehna perban cian nge ate imam-imam maka itangkap kalak e Jesus. Lit ka si erban Pilatus reh merhatna mbebasken Jesus. Sanga Pilatus kundul i kursi penghakimen, ikirim diberuna berita man bana, “Ula campurindu urusen kalak si benar e, sebap kunipiken ia janah mbiar kel aku iban nipi e.”​—Matius 27:19.

Kai si ilakoken Pilatus guna mbebasken Jesus?