Ikataken Pilatus man nterem kalak si atena munuh Jesus, “La lit kudat salahna bagi si ikataken kena ndai. Herodes pe la idatna salahna.” (Lukas 23:​14, 15) Gundari, icubaken Pilatus cara si deban guna mbebasken Jesus, nina, “Menurut kebiasan kena, arus kubebasken sekalak tahanen tiap Wari Paskah. Jadi, nggit nge kena adi kubebasken Raja Kalak Jahudi enda?”​—Johanes 18:39.

Iteh Pilatus lit sekalak penjahat si terkenal gelarna Barabas. Ia perampok, pemunuh, ras pemberontak. Nungkun Pilatus, “Si apai ate kena kubebasken man kena, Barabas ntah Jesus si igelari Kristus?” Perban nggo ipengaruhi imam-imam kepala, ipindo kalak e gelah Barabas si ibebasken. Isungkuni Pilatus ka, “Si apai ate kena si kubebasken i bas dua kalak enda?” Ijawap kalak e, “Barabas”!​—Matius 27:​17, 21.

Kecewa Pilatus megisa, nungkun ka ia, “Adi bage, kai si arus kulakoken man Jesus si igelari Kristus?” Kerina kalak e ngataken, “Bunuh ia i bas tiang!” (Matius 27:22) Ibunuh kalak e atena kalak si la ersalah. Nina Pilatus ka, “Engkai? Kejahaten kai kin si ilakokenna? Kai pe la lit kudat si erbanca ia patut iukum mate. Emaka, kuligasi sajalah ia jenari kubebasken.”​—Lukas 23:22.

Amin pe nggo iusahaken Pilatus guna mbebasken Jesus, tapi serko jelma si nterem e, “Bunuh ia i bas tiang!” (Matius 27:23) Tuhu-tuhu nggo berhasil jelma si nterem e ipengaruhi peminpin-peminpin agama! Padahal Jesus labo penjahat ntah pe pemunuh. Jesus kalak si mehuli, janah lima wari si nggo lewat ia ialo-alo selaku Raja sanga masuk ku Jerusalem. Banci saja murid-murid Jesus lit i tengah-tengah jelma si nterem e, tapi tetap kalak e sinik janah iusahaken kalak e gelah ula itandai kalak.

Iidah Pilatus maka usahana e la berhasil. Reh gejekna jelma si nterem e, emaka ibuat Pilatus lau janah iburihina tanna i lebe-lebe jelma si nterem. Nina Pilatus, “Aku la ertanggung jawap nandangi dareh dilaki enda. Kenalah si arus ertanggung jawap.” Megi si e pe, la erkusur ukur kalak e, malahen ikatakenna, “Kami ras anak-anak kami si nanggungsa darehna.”​—Matius 27:​24, 25.

Iteh Pilatus nge situhuna kai si arus ilakokenna, tapi pentingen akapna ngikuti sura-sura jelma si nterem. Emaka bagi pemindon kalak e, ibebasken Pilatus me Barabas. Kenca si e isuruhna prajuritna nangtangi uis Jesus ras ngeligasi ia.

Kenca Jesus isiksa, ibaba prajurit-prajurit me Jesus ku ingan tading gubernur. Kerina pasuken ngkelilingi ia. Iban kalak e ka mahkota i bas peren duri nari, janah itamakenna ku takal Jesus. Itamaken kalak e ka buluh ku tanna si kanan janah ipakeken kalak e man bana jubah si megara, bali bagi si biasa ipake bangsawan. Ihina kalak e Jesus, nina, “Mejuah-juah, o Raja Kalak Jahudi!” (Matius 27:​28, 29) Jenari iciduri kalak e ia janah iparapna ayo Jesus. Ibuat kalak e buluh ndai, kenca si e ipekpeki kalak e takal Jesus, akibatna reh bagesna duri mahkota e nucuk ku takal Jesus.

Tapi Jesus tetap tenang, enda erban Pilatus kemamangen. Iusahaken Pilatus ka sekali nari gelah Jesus la ibunuh. Nina, “Nenlah! Kubaba ia ndarat gelah iteh kena maka kai pe labo lit kudat salahna.” Banci saja iakap Pilatus erkusur kari ukur kalak e kenca idah kalak e Jesus nggo luka-luka. Tedis Jesus i lebe-lebe jelma si nterem e, janah nina Pilatus, “Nenlah dilaki enda!”​—Johanes 19:​4, 5.

Ikataken Pilatus bagenda perban nggo mekuah atena ngenen Jesus janah iergaina Jesus. Amin pe nggo meratahen daging Jesus tapi tetap ia tenang.