Merawa kel musuh-musuh Jesus eme peminpin agama. Mbaru denga ipebetehken Jesus kejahaten kalak e arah perumpaman-perumpaman. Emaka arih-arih kalak Parisi guna njebak Jesus. Iusahaken kalak e gelah ikataken Jesus ranan si erban ia banci itangkap janah iserahken ku gubernur Roma. Igalari kalak e piga-piga pengikutna guna njebak Jesus.​—Lukas 6:7.

Nungkun kalak e man Jesus, nina, “O Guru, iteh kami maka kai si ikatakenndu ras si iajarkenndu e benar, la kam erpilihen, janah iajarkenndu dalan Dibata sentudu ras kebenaren. Banci ntah lang sigalari pajak kepala man Kaisar?” (Lukas 20:​21, 22) Jesus la tertipu alu kata-kata pujin kalak si munapik ras licik e. Adi ikatakenna, ‘Lang, la banci sigalari pajak e,’ banci ia ituduh mberontak ngelawan pemerentah Roma. Tapi adi nina, ‘Ue, galari pajak e,’ kalak si lit i je si la senang iperentah Roma, banci kalak e curiga janah iserang kalak e Jesus. Jadi kai jawapen Jesus?

Nina Jesus, “O kalak si munapik, ngkai maka icubai kena aku? Cidahken man bangku sen logam guna pajak e.” Ibereken kalak e sada dinar, jenari nungkun Jesus, “Gambar ras gelar ise enda?” Ijawap kalak e, “Kaisar.” Jenari ibereken Jesus petunjuk si seh kel tepatna, “Adi bage, bereken man Kaisar kai si memang jadi bagin Kaisar, tapi man Dibata kai si memang jadi bagin Dibata.”​—Matius 22:​18-​21.

Jengang kalak e megi jawapen Jesus. Lanai teh kalak e mbelasken kai pe, emaka lawes kalak e. Tapi lit denga si atena njebak Jesus, eme arah peminpin agama Saduki.

Kalak Saduki si la tek kerna kekeken nungkun man Jesus kerna kekeken ras perjabun ilakomangani. a Ning kalak e, “O Guru, nina Musa, ‘Adi lit sekalak dilaki mate tapi la lit anakna, senina si mate e arus ngempoi ndeharana e guna mereken kesusuren man seninana ndai.’ Lit pitu kalak si ersenina. Sintua erjabu dungna mate, la lit kesusurenna, emaka iempoi senina si mate e ndeharana e. Bage ka si terjadi man si peduaken ras si peteluken seh ngayak si pepituken. Dungna diberu e pe mate. Adi bage, i bas kekeken, ndehara ise nge ia pagi arah si pitu e? Sebap kerinana nggo pernah ngempoi ia.”​—Matius 22:​24-​28.

Ijawap Jesus kalak Saduki alu nggunaken tulisen Musa si iteki kalak e, nina, “La iangkai kena Kitap si Badia ntah pe kuasa Dibata, eme sebapna maka kena nggo salah. Sebap sanga kalak e keke i bas si mate nari, dilaki ntah pe diberu la erjabu bage pe la ipejabuken, tapi kalak e bali bagi malekat si i surga. Tapi kerna kalak mate ipekeke, lenga kin pernah ibaca kena i bas buku Musa, kerna kejadin rambah duri? Paksa si e nina Dibata man Musa, ‘Aku kap Dibata Abraham, Dibata Isak, ras Dibata Jakup.’ Ia labo Dibata kalak mate tapi Dibata kalak si nggeluh. Tuhu-tuhu kel kena nggo salah.” (Markus 12:​24-​27; Keluaren 3:​1-6) Jengang kerina kalak megi jawapen Jesus e.

Enggo sinik iban Jesus kalak Parisi ras kalak Saduki ndai, emaka gundari ersada arih kalak e guna nguji Jesus. Nungkun me sekalak ahli Undang-Undang Musa, nina, “O Guru, perentah si apai nge si mbelinna i bas Undang-Undang Musa?”​—Matius 22:36.

Nina Jesus, “Enda me si pentingna, ‘Begikenlah, o Israel, Jahwe kap Dibatanta, Jahwe si sada e ngenca Dibata, janah arus ikelengindu Jahwe Dibatandu alu kerina kegeluhenndu, pusuhndu, perukurenndu ras gegehndu.’ Si peduaken, ‘Arus ikelengindu kalak si deban bagi kam ngkelengi dirindu.’ La lit perentah si deban si belinen asangken enda.”​—Markus 12:​29-​31.

Megi jawapen Jesus e, nina ahli Undang-Undang e, “O Guru, payo si ikatakenndu, sentudu ras kebenaren, ‘Dibata e sada, janah la lit Dibata si deban selain Ia.’ Janah, ngkelengi Ia alu kerina gegeh, pusuh, ras perukuren, bage pe ngkelengi kalak si deban bagi diri sendiri, e ndauh pentingen asangken kerina persembahen tutungen ras korban.” Erkiteken idah Jesus ijawapna alu pentar, nina man bana, “Kam la ndauh i bas Kerajan Dibata nari.”​—Markus 12:​32-​34.

Enggo telu wari dekahna Jesus ngajar i bas rumah pertoton (tanggal 9, 10, ras 11 Nisan). Piga-piga kalak bali bagi ahli Undang-Undang e meriah akapna megiken Jesus. Tapi beda ras peminpin-peminpin agama e. Gundari kalak e ‘lanai pang nungkun man Jesus.’